హైదరాబాద్ నుండి విజయవాడ మీదుగా ప్రయాణించే వాహనదారులకు పెద్ద శుభవార్త. ప్రస్తుతం నాలుగు లేన్లుగా ఉన్న 65వ జాతీయ రహదారి (NH 65) ఇప్పుడు ఆరు లైన్లుగా విస్తరించనుంది. ఈ విస్తరణ ప్రాజెక్టుకు కేంద్ర ప్రభుత్వం గ్రీన్ సిగ్నల్ ఇచ్చింది. కాగా, ఈ రహదారి, తెలంగాణ మరియు ఆంధ్రప్రదేశ్ రాష్ట్రాల మధ్య ప్రధాన రవాణా మార్గంగా ఉంది.
ప్రాజెక్టు వివరాలు:
-
పొడవు: మొత్తం 269 కిలోమీటర్లు ఉన్న రహదారిలో 229 కిలోమీటర్ల మేర నాలుగు వరసల నుంచి ఆరు లేన్లకు విస్తరించనున్నారు.
-
నోటిఫికేషన్: విస్తరణ కోసం అవసరమైన భూసేకరణకు సంబంధించి కేంద్ర ప్రభుత్వం తాజాగా నోటిఫికేషన్ విడుదల చేసింది.
-
అధికారుల నియామకం: భూసేకరణ ప్రక్రియను పర్యవేక్షించడానికి తెలంగాణ, ఆంధ్రప్రదేశ్‌లలో ప్రత్యేక అధికారులను నియమిస్తున్నట్లు నోటిఫికేషన్‌లో పేర్కొంది.
భూసేకరణ బాధ్యతలు (తెలంగాణ)
తెలంగాణ రాష్ట్రంలో భూసేకరణ బాధ్యతలను ఆయా ప్రాంతాల ఆర్డీఓలకు (RDOs) అప్పగించారు. ప్రధానంగా భూసేకరణ చేపట్టనున్న ప్రాంతాలు..
-
యాదాద్రి భువనగిరి జిల్లా: చౌటుప్పల్ మండలంలోని 9 గ్రామాలు.
-
నల్గొండ జిల్లా: చిట్యాల (5 గ్రామాలు), నార్కట్‌పల్లి (5), కట్టంగూర్ (4), నకిరేకల్ (2), కేతేపల్లి (4) మండలాలు.
-
సూర్యాపేట జిల్లా: సూర్యాపేట (4), చివ్వెంల (6), కోదాడ (4), మునగాల (5) మండలాలు.
భూసేకరణ బాధ్యతలు (ఆంధ్రప్రదేశ్)
ఆంధ్రప్రదేశ్ లోని ఎన్టీఆర్ జిల్లాలో భూసేకరణ బాధ్యతలను అక్కడి జాయింట్ కలెక్టర్లకు అప్పగించారు. భూసేకరణ జరిపే ప్రాంతాలు:
- ఎన్టీఆర్ జిల్లా: నందిగామ (4 గ్రామాలు), కంచికచర్ల (4), జగ్గయ్యపేట (7), పెనుగంచిప్రోలు (3), ఇబ్రహీంపట్నం (12), విజయవాడ రూరల్ (1), విజయవాడ వెస్ట్ (2), విజయవాడ నార్త్ (1) మండలాలు/ప్రాంతాలు.
ఈ విస్తరణ పూర్తయితే, హైదరాబాద్-విజయవాడ మధ్య ప్రయాణ సమయం మరింత తగ్గి, ప్రయాణం సులభతరం కానుంది. ఇక భూ సేకరణ పూర్తయ్యాక నేషనల్ హైవే అథారిటీ ఆఫ్ ఇండియా (NHAI) టెండర్ల ప్రక్రియను ప్రారంభించనుంది.
