హైదరాబాద్ నగర పోలీస్ కమిషనర్ (సీపీ) సజ్జనార్‌తో అగ్ర కథానాయకులు చిరంజీవి, నాగార్జున, దిగ్గజ దర్శకుడు ఎస్ఎస్. రాజమౌళి, TDFC చైర్మన్ దిల్ రాజు తదితరులు సినీ ప్రముఖులు భేటీ అయ్యారు. ఇటీవల పైరసీ వెబ్‌సైట్‌ ఐబొమ్మ (iBomma) నిర్వాహకుడు ఇమ్మడి రవిని సైబర్ క్రైమ్ పోలీసులు అరెస్ట్ చేసిన నేపథ్యంలో సినీ పెద్దలు సీపీని కలిసి కృతజ్ఞతలు తెలిపారు. సినీ రంగానికి నష్టం కలిగించే ఇలాంటి పైరసీ కార్యకలాపాలను కట్టడి చేయడంలో పోలీస్ శాఖ కృషిని సినీ పెద్దలు అభినందించారు.
కీలక వివరాల వెల్లడించిన సీపీ సజ్జనార్..
భేటీ అనంతరం సీపీ సజ్జనార్ మీడియాతో మాట్లాడారు. పైరసీతో సినీ రంగానికి జరుగుతున్న నష్టాన్ని వివరించారు, ఇమ్మడి రవి అరెస్టుకు సంబంధించిన వివరాలను వెల్లడించారు:
కేసులు: ఐబొమ్మ నిర్వాహకుడు ఇమ్మడి రవిపై ఐటీ యాక్ట్, కాపీ రైట్ యాక్ట్ కింద మరో 4 కేసులు నమోదు చేసినట్లు తెలిపారు.
పైరసీ నెట్‌వర్క్: రవి అంతకుముందు అరెస్ట్ అయిన ప్రశాంత్, శివరాజ్ కంటే ముందు నుంచే పైరసీ చేస్తున్నాడని తెలిపారు. ఒక వెబ్‌సైట్‌ను బ్లాక్ చేస్తే, కొత్త సైట్‌ను తయారు చేసి మొత్తం 65 మిర్రర్ వెబ్‌సైట్లను నిర్వహించాడని వెల్లడించారు.
సినిమాల సంఖ్య: నిందితుడి హార్డ్ డిస్క్‌లో 21 వేల సినిమాలు ఉన్నాయని, అందులో 1972లో విడుదలైన ‘గాడ్‌ఫాదర్’ నుంచి మొన్న వచ్చిన ‘ఓజీ’ వరకు ఉన్నాయని పేర్కొన్నారు.
ఆర్థిక నష్టం: రవి పైరసీ ద్వారా **రూ. 20 కోట్లు** సంపాదించగా, అందులో రూ. 3 కోట్లు సీజ్ చేశామని తెలిపారు.
ప్రమాదకర డేటా: నిందితుడి వద్ద 50 లక్షల మంది సబ్‌స్క్రైబర్ల డేటా ఉంది. ఇంత డేటా అతని వద్ద ఉండటం ప్రమాదకరం అని సీపీ సజ్జనార్ హెచ్చరించారు.
ఇతర నేరాలు: పైరసీ ద్వారా నష్టం చేయడమే కాకుండా, ఇమ్మడి రవి బెట్టింగ్ యాప్‌లను కూడా ప్రమోట్ చేస్తున్నాడని, దీనివల్ల చాలా మంది చనిపోయారని సీపీ తెలిపారు.
