ఆంధ్రప్రదేశ్ హైకోర్టు ట్రాఫిక్ పోలీసులపై మరోసారి తీవ్ర ఆగ్రహం వ్యక్తం చేసింది. ద్విచక్ర వాహనదారులు హెల్మెట్ వినియోగంపై నిర్లక్ష్యంగా వ్యవహరిస్తున్నారని, గత మూడు నెలల్లో ఈ నిర్లక్ష్యం వల్ల 667 మంది ప్రాణాలు కోల్పోయారని ఆక్షేపించింది. ట్రాఫిక్ విభాగం ఐజీని వివరణ ఇవ్వాలని ఆదేశించడంతో పాటు, హెల్మెట్ పెట్టుకోని బైకర్ల ఇళ్లకు నోటీసులు పంపాలని సూచించింది.
బైకర్లు హెల్మెట్ పెట్టుకోకపోవడం వల్ల ప్రమాదాల సంఖ్య పెరుగుతున్నదని, భారీ జరిమానాలు విధించడం కంటే కఠిన చర్యలు తీసుకోవాలని హైకోర్టు పేర్కొంది. ఉల్లంఘనలపై సంబంధిత వ్యక్తుల ఇళ్లకు విద్యుత్, నీటి సరఫరా నిలిపివేసే అంశాన్ని పరిశీలించమని ట్రాఫిక్ పోలీసులకు సూచించింది.
హైదరాబాద్-విజయవాడ పోలిక
హైకోర్టు వ్యాఖ్యానంలో విజయవాడలో హెల్మెట్ వినియోగం తక్కువగా ఉందని, తెలంగాణలో పరిస్థితి భిన్నమని పేర్కొంది. తెలంగాణలో ట్రాఫిక్ నియమాలు కఠినంగా అమలవుతున్నాయని, రాష్ట్రంలో ట్రాఫిక్ పోలీసుల వైఫల్యం వల్ల వాహనదారులు నిర్లక్ష్యంగా వ్యవహరిస్తున్నారని అభిప్రాయపడింది. వీడని ఆగ్రహంతో, రవాణా శాఖ కమిషనర్‌ను కూడా ప్రతివాదిగా చేర్చిన హైకోర్టు, ట్రాఫిక్ ఐజీ ఈ నెల 18న జరిగే విచారణకు హాజరుకావాలని ఆదేశించింది.
