‘పుష్ప 2’ సినిమా విడుదల సందర్భంగా జరిగిన ప్రీమియర్‌లో సంధ్య థియేటర్ వద్ద జరిగిన తొక్కిసలాటలో రేవతి అనే మహిళా అభిమాని మృతి చెందడం, ఒక బాలుడు గాయపడటం తీవ్ర విషాదకర సంఘటనలుగా మారాయి. ఈ ఘటనపై సీఎం రేవంత్ రెడ్డి అసెంబ్లీలో మాట్లాడటంతో.. ఈ అంశం మరోసారి చర్చనీయాంశం అయింది. దీంతో ప్రెస్ మీట్ ఏర్పాటు చేసిన అల్లు అర్జున్, ఈ విషయంలో తన బాధను వ్యక్తం చేస్తూ వివరణ ఇచ్చారు.
అల్లు అర్జున్ తనపై జరుగుతున్న తప్పుడు ప్రచారం గురించి ఆవేదన వ్యక్తం చేశారు. “నేను ఎప్పటికప్పుడు బాధితుల ఆరోగ్య పరిస్థితి గురించి తెలుసుకుంటూనే ఉన్నాను. నాపై ఎవరైనా తప్పుగా ఆరోపణలు చేస్తే బాధ కలుగుతుంది. కానీ నిజం మాట్లాడటానికి ప్రెస్ మీట్ పెట్టాను” అని అన్నారు.
అల్లు అర్జున్ మాట్లాడిన ముఖ్యాంశాలు
ఘటనపై బాధ:
“సంధ్య థియేటర్ దగ్గర జరిగినది అనుకోకుండా జరిగిన ప్రమాదం. ఇందులో ఎవరి తప్పు లేదు. అది ఓ హ్యూమన్ యాక్సిడెంట్. రేవతి కుటుంబానికి నా ప్రగాఢ సానుభూతి. గాయపడిన బాలుడు త్వరగా కోలుకోవాలని కోరుకుంటున్నాను. థియేటర్ అనేది నాకు దేవాలయం లాంటిది.”
తొక్కిసలాటపై వివరణ:
“జనం అధికంగా వచ్చినప్పుడు కారు ఆగిపోవడం, అభిమానులకు చెయ్యి ఊపడం తప్ప, రోడ్‌ షో చేయలేదని స్పష్టంగా చెబుతున్నా. జనం కదలాలంటే కారు బయటకు రావాలని పోలీసులు, బౌన్సర్లు సూచించారు.”
పోలీసు అనుమతి:
“సంధ్య థియేటర్‌కు వెళ్లడానికి ముందుగా పోలీసుల అనుమతి ఉందని థియేటర్ యాజమాన్యం చెప్పారు. అందుకే వెళ్లాను. నేను అక్కడే ఉన్నప్పుడు ఏ పోలీసు నా దగ్గరకు రాలేదు. బయట పరిస్థితేంటో నాకు తెలియదు.”
ఘటనపై సమాచారం:
“రేవతి మృతి గురించి నాకు తెలిశాక నన్ను కలచివేసింది. నా పిల్లలు కూడా థియేటర్‌లో ఉన్నారు. ఆ విషయం ముందే తెలిస్తే, వారు అక్కడ ఉండకుండా చూసేవాడిని.”
అభిమానులపై ప్రేమ:
“నాకు నా అభిమానులు ఎంతో ప్రియమైనవారు. వారి భద్రత నాకు ముఖ్యం. ఇలాంటి దురదృష్టకర ఘటన జరగడంతో 15 రోజులుగా తీవ్ర ఒత్తిడిలో ఉన్నాను.”
రేవంత్ రెడ్డి వ్యాఖ్యలపై స్పందన:
“నా గురించి తప్పుడు ప్రచారం జరుగుతోంది. నేను బాధ్యతారాహిత్యంగా ప్రవర్తించలేదని స్పష్టంగా చెబుతున్నా. థియేటర్‌లకు వెళ్లే ప్రతి అడుగూ బాధ్యతగా ఉంటుంది.”
లీగల్ కారణాల వల్ల పరామర్శించలేకపోవడం:
“రేవతి కుటుంబాన్ని వ్యక్తిగతంగా కలవాలని అనుకున్నా. కానీ నా లీగల్ టీమ్‌ సలహా మేరకు వెళ్లలేదు. ఈ విషయంలో నా బాధని మాటల్లో వ్యక్తం చేయలేను.”
సినిమా విజయంపై
‘పుష్ప 2’ సినిమా చాలా కష్టంతో తయారైన సినిమా అని, దానిని థియేటర్‌లో చూడాలని ఎంతో ఆశపడ్డానని అల్లు అర్జున్ తెలిపారు. అయితే, ఈ ఘటన జరిగిన తరువాత సెలబ్రేషన్లు అన్నీ ఆపేశానని చెప్పారు.
అల్లు అర్జున్ ప్రెస్ మీట్ ద్వారా తన బాధ, బాధ్యత, అభిమానుల పట్ల ప్రేమను స్పష్టంగా తెలిపారు. సంధ్య థియేటర్ ఘటన ఒక ప్రమాదం అని, దాని పట్ల అన్ని విధాలుగా సహకరించనున్నట్లు తెలిపారు. రేవతి కుటుంబానికి తన మద్దతు ఉంటుందని, అభిమానుల భద్రత తన ప్రాథమిక కర్తవ్యమని మరోసారి స్పష్టం చేశారు.
