గ్లోబల్ స్టార్ రామ్ చరణ్ హీరోగా, ప్రముఖ దర్శకుడు ఎస్. శంకర్ తెరకెక్కించిన చిత్రం ‘గేమ్ చేంజర్’ జనవరి 10న ప్రపంచవ్యాప్తంగా తెలుగు, తమిళం, హిందీ భాషల్లో గ్రాండ్‌గా విడుదల కానుంది. ఈ సినిమాపై భారీ అంచనాలు నెలకొన్నాయి. ఇందులో రామ్ చరణ్ సరసన బాలీవుడ్ బ్యూటీ కియారా అద్వాణీ హీరోయిన్‌గా నటించారు. శ్రీవెంకటేశ్వర క్రియేషన్స్, జీ స్టూడియోస్, దిల్ రాజు ప్రొడక్షన్ బ్యానర్స్‌పై దిల్ రాజు, శిరీష్ అన్‌కాంప్ర‌మైజ్డ్‌గా నిర్మించారు.
ఈ చిత్రంలో రామ్ చరణ్ అవినీతి రాజకీయ వ్యవస్థను ప్రక్షాళన చేసే ఐఏఎస్ అధికారిగా కనిపించనున్నారు. ఇప్పటికే విడుదలైన టీజర్‌లో రామ్ చరణ్ రకరకాల గెటప్స్‌లో, డిఫరెంట్ లుక్స్‌లో ఆకట్టుకున్నారు. హై-ఆక్టేన్ యాక్షన్ సన్నివేశాలు, రాజకీయ అంశాలతో కూడిన ఈ చిత్రం ప్రేక్షకులకు మరపురాని అనుభూతిని అందించనుందనే నమ్మకం ఉంది.
ఈ సినిమాకు రామ్ చరణ్‌ను ఎంపిక చేసిన విషయాన్ని దర్శకుడు శంకర్ వివరించారు. ‘‘RRR విడుదలకు ముందే రామ్ చరణ్ ఈ సినిమా చేయాలని నిర్ణయం తీసుకున్నారు. ఇందులో చరణ్ నటిస్తే బాగుంటుందని నిర్మాత దిల్ రాజు భావించగా, నాకు కూడా అదే పర్‌ఫెక్ట్ ఛాయిస్ అనిపించింది. రామ్ చరణ్‌ని చూస్తే లోపల దాగి ఉన్న ఒక ప్రత్యేక శక్తి కనిపిస్తుంది. ఆ శక్తి సరైన సమయంలో బయటపడితే అది విస్పోటనం అవుతుందని భావిస్తాను. చరణ్ గొప్ప ఆర్టిస్ట్, ఏ సీన్‌నైనా అద్భుతంగా హ్యాండిల్ చేయగల సత్తా ఉంది,’’ అని శంకర్ అన్నారు.
ఈ చిత్రానికి థమన్ సంగీతం అందించారు. ఇప్పటికే విడుదలైన ‘జరగండి,’ ‘రా మచ్చా,’ ‘జానా హైరాన్ సా’ పాటలు చార్ట్ బస్టర్‌లుగా నిలిచాయి. డిసెంబర్ 22న నాలుగో పాట ‘డోప్’ విడుదల కానుంది. ఇప్పటికే విడుదలైన డోప్ ప్రోమో అద్భుతమైన స్పందనను అందుకుంది. తిరునావుక్కరసు సినిమాటోగ్రఫీ, శంకర్ మేకింగ్‌తో ఈ చిత్రం బాక్సాఫీస్ వద్ద బ్లాక్ బస్టర్ హిట్‌గా నిలుస్తుందని అంచనా.
రామ్ చరణ్‌తో పాటు ఈ చిత్రంలో కియారా అద్వాణీ, ఎస్ జె సూర్య, సముద్రఖని, అంజలి, నవీన్ చంద్ర, సునీల్, శ్రీకాంత్ వంటి ప్రముఖులు ముఖ్య పాత్రల్లో నటించారు. చిత్రంలోని ప్రతీ భాగం విశేష నైపుణ్యంతో రూపొందించబడింది.
