భారత ప్రభుత్వం 2025 బడ్జెట్‌లో క్యాపిటల్ ఎక్స్పెండిచర్ (మూలధన వ్యయం)ను రికార్డు స్థాయికి పెంచింది. అభివృద్ధి కోసం ప్రభుత్వ పెట్టుబడులు కీలకమైనవని భావిస్తూ, గత మూడు సంవత్సరాలుగా నిరంతరంగా పెట్టుబడుల వ్యయాన్ని పెంచుతూ వస్తోంది. ప్రస్తుత ఆర్థిక సంవత్సరంలో రూ.10.1 లక్షల కోట్లు వెచ్చించగా, ఎన్నికల కారణంగా మొదటి మూడు నెలల్లో ఖర్చు కొంత తగ్గినా, తరువాత మళ్లీ రికార్డు స్థాయిలో వ్యయం పెంచింది.
2025-26 సంవత్సరానికి క్యాపిటల్ ఎక్స్పెండిచర్‌ను రూ.11.21 లక్షల కోట్లకు పెంచారు, ఇది దేశ అభివృద్ధికి దోహదపడే మరో భారీ పెట్టుబడి. అదనంగా, రాష్ట్రాల అభివృద్ధి కోసం రూ.1.54 లక్షల కోట్ల రుణాన్ని 50 సంవత్సరాలపాటు వడ్డీ లేకుండా అందిస్తున్నారు. మొత్తం కలిపి కేంద్ర ప్రభుత్వం రూ.12.75 లక్షల కోట్ల పెట్టుబడులు పెట్టనుంది. ఇది ప్రభుత్వ పెట్టుబడుల పరంగా ఓ మైలురాయి. ఈ నిధులతో రహదారులు, రైల్వేలు, మౌలిక వసతులు, వృద్ధి ప్రాజెక్టులు మరింత వేగంగా ముందుకు సాగనున్నాయి.
ప్రజల కొనుగోలు శక్తిని పెంచడానికి ప్రభుత్వం ఆదాయ పన్ను మినహాయింపును గణనీయంగా పెంచింది. పదేళ్ల క్రితం రూ.2.5 లక్షల వరకు ఆదాయ పన్ను మినహాయింపు ఉండగా, ఇప్పుడు దాన్ని రూ.12 లక్షల వరకు పెంచారు. దాదాపు 5 రెట్లు పెరిగిన ఈ మినహాయింపుతో, మధ్యతరగతి వర్గానికి పెద్ద ఊరట లభించనుంది. ఇది ప్రజలకు పొదుపు అవకాశాలను కల్పించి, వినియోగాన్ని పెంచేలా చేస్తుంది.
ఈ నిర్ణయాలు దేశ ఆర్థిక వ్యవస్థను వేగంగా ముందుకు తీసుకెళతాయి. పెట్టుబడులు పెంచడం, అప్పుల భారం తగ్గించడం, ప్రజల చేతిలో డబ్బును పెంచడం..ఈ మూడు ప్రధాన చర్యలు భారత ఆర్థిక వ్యవస్థను మరింత స్థిరంగా, బలంగా మారుస్తాయి. భవిష్యత్ అభివృద్ధికి ఇది బలమైన అడుగుగా నిలుస్తుందని ప్రభుత్వ విధానాల నుంచి స్పష్టంగా తెలుస్తోంది. మౌలిక వసతుల అభివృద్ధికి, ఉపాధి అవకాశాల పెరుగుదలకు, దేశ ప్రగతికి ఇది గొప్ప సంకేతం.
