తీవ్ర భూకంపం ధాటికి మయన్మార్, థాయ్లాండ్ అల్లకల్లోలంగా మారాయి. రిక్టర్‌ స్కేల్‌పై 7.7 తీవ్రతతో సంభవించిన ఈ ప్రకృతి విపత్తు వల్ల ఇరు దేశాల్లో భవనాలు నేలమట్టమయ్యాయి. ఎక్కడ చూసినా శిథిలాల కింద చిక్కుకుపోయినవారు, సహాయ చర్యల కోసం ఎదురుచూస్తున్న బాధితుల ఆర్తనాదాలు హృదయాన్ని కలచివేస్తున్నాయి. వరుస భూకంపాల ప్రభావంతో మృతుల సంఖ్య పెరిగిపోతోంది. ఈ క్లిష్ట సమయంలో మయన్మార్ సహాయానికి భారత్‌ ముందుకొచ్చింది.
భారత ప్రభుత్వ సహాయ చర్యలు
భూకంప బాధితులకు సహాయం అందించేందుకు భారత్‌ భారీ స్థాయిలో సహాయక సామగ్రిని మయన్మార్‌కు పంపించింది. ఢిల్లీ నుంచి 15 టన్నుల సహాయ సామగ్రితో కూడిన ఇండియన్ ఎయిర్‌ఫోర్స్ C-130J విమానం AFS హిండన్‌ నుంచి బయలుదేరింది. ఇందులో టెంట్లు, స్లీపింగ్ బ్యాగులు, దుప్పట్లు, తినేందుకు సిద్ధంగా ఉన్న ఆహారం, వాటర్ ప్యూరిఫైయర్స్‌, హైజీన్ కిట్లు, సోలార్ ల్యాంపులు, జనరేటర్లు తదితర అత్యవసర సరుకులు ఉన్నాయి. భారత విదేశాంగ మంత్రిత్వ శాఖ ఈ విషయాన్ని అధికారికంగా వెల్లడించింది.
భూకంపం ప్రభావం
మయన్మార్‌లో సంభవించిన ఈ భూకంపం కారణంగా ఇప్పటివరకు 694 మంది మృతి చెందినట్లు అక్కడి ప్రభుత్వం ప్రకటించింది. అయితే ఈ సంఖ్య 10,000 దాటవచ్చని అమెరికా ఏజెన్సీలు అంచనా వేస్తున్నాయి. భూకంప ప్రభావంతో నేపిడాలోని వెయ్యి పడకల ఆస్పత్రి, మాండలే నగరంలోని ఐకానిక్ వంతెన, గోపురాలు, ఆలయాలు పూర్తిగా నేలకూలాయి. శిథిలాల కింద చిక్కుకున్నవారిని రక్షించేందుకు సహాయ చర్యలు యుద్ధప్రాతిపదికన కొనసాగుతున్నాయి.
మయన్మార్, థాయ్లాండ్ ప్రజలు ఈ విపత్తు నుండి కోలుకోవాలని ప్రపంచ దేశాలు ఆకాంక్షిస్తున్నాయి. సహాయ చర్యల్లో భాగంగా భారతదేశం చూపిన స్పందనకు అంతర్జాతీయంగా ప్రశంసలు దక్కుతున్నాయి.
#WATCH | Plane carrying approximately 15 tonnes of relief material was sent to Myanmar on an IAF C 130 J aircraft from AFS Hindon, including tents, sleeping bags, blankets, ready-to-eat meals, water purifiers, hygiene kits, solar lamps, generator sets, essential Medicines… pic.twitter.com/C4EGes0m6t
— ANI (@ANI) March 29, 2025
