చాలా కాలంగా భారతదేశం ఆశిస్తున్న అరుదైన గౌరవం దక్కింది. భారతీయ సంస్కృతి, నాగరికతకు ప్రతిబింబంగా నిలిచే దీపావళి (Deepavali) పండుగను యునెస్కో (UNESCO) తన మానవజాతి అసంస్కృత సాంస్కృతిక వారసత్వ ప్రతినిధి జాబితాలో (Representative List of the Intangible Cultural Heritage of Humanity) చేర్చింది.
ఈ నిర్ణయాన్ని న్యూఢిల్లీలోని ఎర్రకోటలో జరుగుతున్న యునెస్కో అంతర్-ప్రభుత్వ కమిటీ సమావేశంలో (డిసెంబర్ 10, 2025న) ప్రకటించారు. కాగా, యునెస్కో జాబితాలో చేర్చబడిన భారతదేశం నుండి ఇది 16వ సాంస్కృతిక అంశం కావడం విశేషం.
ఇప్పటికే కుంభమేళా, కోల్కతా దుర్గా పూజ, గుజరాత్ గార్బా నృత్యం, యోగా, వేద పఠన సంప్రదాయం, రామలీల వంటివి ఈ ప్రతిష్టాత్మక జాబితాలో ఉన్నాయి. కాంతి, సత్ప్రవర్తనకు ప్రతీకగా నిలిచే ఈ దీపాల పండుగను హిందువులు, సిక్కులు, జైనులు ప్రపంచవ్యాప్తంగా ఘనంగా జరుపుకుంటారు.
ఇక యునెస్కో గుర్తింపుపై ప్రధాన మంత్రి నరేంద్ర మోదీ హర్షం వ్యక్తం చేశారు. దీపావళి తమ సంస్కృతి, నైతికతతో అత్యంత సన్నిహితంగా ముడిపడి ఉందని, ఇది భారత నాగరికత ఆత్మ అని ఆయన అన్నారు. యునెస్కో గుర్తింపు పండుగకు ప్రపంచవ్యాప్తంగా మరింత దృష్టిని పెంచుతుందని ఆయన ట్విట్టర్ వేదికగా ఇలా తెలిపారు.
“భారతదేశంలోనే కాక ప్రపంచవ్యాప్తంగా ప్రజలు ఆనందోత్సాహాలతో మునిగిపోయారు. మనకు దీపావళి అంటే సంస్కృతి, సంప్రదాయం, ఆధ్యాత్మికత—ఇవి అన్నింటినీ ప్రతిబింబించే పర్వదినం. ఇది భారత నాగరికత యొక్క ఆత్మ. వెలుగును, ధర్మాన్ని, అజేయమైన నీతిని ప్రతీకగా నిలబెట్టే పండుగ.”
“ఇప్పుడు దీపావళిని యునెస్కో అమూర్త వారసత్వ జాబితాలో చేర్చడం పండుగ ప్రాచుర్యానికి ప్రపంచస్థాయిలో మరింత ప్రతిష్టను తెచ్చిపెడుతోంది. భారతీయ సంస్కృతి మహోన్నతతను ప్రపంచానికి మరోసారి పరిచయం చేస్తోంది. ప్రభు శ్రీరాముడి నిత్యధర్మం, ఆయన చూపిన ఆదర్శాలు—మనకు శాశ్వత శక్తి, మార్గదర్శకం, వెలుగు చూపే నైతిక దీప్తిగా నిలుస్తాయి.” అని పేర్కొన్నారు.
People in India and around the world are thrilled.
For us, Deepavali is very closely linked to our culture and ethos. It is the soul of our civilisation. It personifies illumination and righteousness. The addition of Deepavali to the UNESCO Intangible Heritage List will… https://t.co/JxKEDsv8fT
— Narendra Modi (@narendramodi) December 10, 2025
అలాగే, దీనిపై కేంద్ర సాంస్కృతిక శాఖ మంత్రి గజేంద్ర సింగ్ షెకావత్ మాట్లాడుతూ, ఈ ట్యాగ్ మనకు లభించిన బాధ్యతగా పేర్కొన్నారు. ప్రతీ భారతీయుడికి దీపావళి ఒక భావోద్వేగమని, దీని ద్వారా యునెస్కో శాంతి, మంచికి లభించిన విజయాన్ని గౌరవిస్తుందని ఆయన తెలిపారు. తమకు దక్కిన ఈ గౌరవం పట్ల ప్రజలు సంతోషం వ్యక్తం చేస్తూ “జై హింద్”, “వందేమాతరం”, “భారత్ మాతా కీ జై” నినాదాలు చేశారు.
ఇక ప్రతి సంవత్సరం జరుపుకునే ఈ దీపాల పండుగను యునెస్కో గుర్తించడం భారతీయ సంప్రదాయ విలువలను, సంస్కృతి గొప్పతనాన్ని అంతర్జాతీయ వేదికపై నిలబెట్టింది. ఈ గుర్తింపు భవిష్యత్ తరాలకు ఈ జీవన వారసత్వాన్ని మరింత భద్రంగా అందించేందుకు దోహదపడుతుంది.
