దేశంలో సన్నబియ్యం పంపిణీ చేస్తున్న ఏకైక రాష్ట్రం తెలంగాణే – సీఎం రేవంత్ రెడ్డి

దేశంలో సన్నబియ్యం పాప్మపిని చేస్తున్న ఏకైక రాష్ట్రం తెలంగాణణే అని పేర్కొన్నారు ముఖ్యమంత్రి రేవంత్ రెడ్డి. శుక్రవారం ఆయన నల్గొండ జిల్లా, దేవరకొండ నియోజకవర్గంలో పర్యటించారు. ‘ప్రజా పాలన విజయోత్సవాల్లో’ భాగంగా ముఖ్యమంత్రి రూ. 23 కోట్లతో చేపట్టనున్న అభివృద్ధి పనులకు శంకుస్థాపన చేశారు. అనంతరం దేవరకొండలో ఏర్పాటు చేసిన బహిరంగ సభలో ఆయన ప్రసంగించారు.

ఈ సందర్భంగా తెలంగాణ ప్రజల పోరాట పటిమను కొనియాడిన సీఎం రేవంత్ రెడ్డి, తమ ప్రభుత్వం పేదలకు, రైతులకు అమలు చేస్తున్న సంక్షేమ పథకాలను వివరించారు. ఈ సభలో మంత్రులు కోమటిరెడ్డి వెంకట్‌రెడ్డి, ఉత్తమ్ కుమార్ రెడ్డి, మండలి ఛైర్మన్ గుత్తా సుఖేందర్‌రెడ్డితో పాటు పలువురు ఎమ్మెల్యేలు పాల్గొన్నారు.

నీటిపారుదలపై కీలక హామీ

• ఎస్‌ఎల్‌బీసీ ప్రాజెక్టు: నల్గొండ జిల్లాకు అత్యంత కీలకమైన ఎస్‌ఎల్‌బీసీ (Srisailam Left Bank Canal) ప్రాజెక్టును ఈ ప్రభుత్వ హయాంలోనే పూర్తి చేసి జిల్లాకు నీరు అందిస్తామని సీఎం హామీ ఇచ్చారు.

• ప్రాజెక్టు అంకితం: ఈ ప్రాజెక్టును కాంగ్రెస్ ప్రభుత్వమే మంజూరు చేసిందని, కానీ గత పదేళ్లలో కేసీఆర్ ప్రభుత్వం పట్టించుకోలేదని విమర్శించారు.

• ప్రమాదంపై విమర్శలు: ఎస్‌ఎల్‌బీసీ పనులు ప్రారంభించగానే సొరంగంలో జరిగిన ప్రమాదంపై భారత రాష్ట్ర సమితి నేతలు సంబరపడ్డారని ఆయన ధ్వజమెత్తారు. ఏదేమైనా టన్నెల్‌ను పూర్తి చేసి నీరు అందిస్తామని సీఎం స్పష్టం చేశారు.

గత ప్రభుత్వంపై విమర్శలు

• కేసీఆర్ పాలన: గత ప్రభుత్వం పదేళ్ల పాటు పేదలకు ఒక్క రేషన్ కార్డు కూడా ఇవ్వలేదని రేవంత్ రెడ్డి విమర్శించారు.

• రైతు రుణమాఫీ: రుణమాఫీ పేరిట పదేళ్లపాటు రైతులను కేసీఆర్ మోసం చేశారని ఆరోపించారు.

• అధికార దుర్వినియోగం: గతంలో మంత్రులు, ఎమ్మెల్యేలను కూడా కేసీఆర్ కలిసేవారు కాదని, ప్రగతి భవన్‌లోకి, ఫామ్‌హౌజ్‌లోకి ఎవ్వరినీ రానివ్వలేదని విమర్శించారు. కేసీఆర్ ఓడిపోయాకే రాష్ట్రానికి, ప్రజలకు మేలు జరుగుతోందని అన్నారు.

సంక్షేమ పథకాలు

• కొత్త రేషన్ కార్డులు: కాంగ్రెస్ ప్రభుత్వం అధికారంలోకి రాగానే కొత్త రేషన్ కార్డులు ఇచ్చి, దొడ్డు బియ్యాన్ని రద్దు చేసి సన్నబియ్యం పంపిణీ చేస్తోందని తెలిపారు. దేశంలో సన్నబియ్యం పంపిణీ చేస్తున్న ఏకైక రాష్ట్రం తెలంగాణ మాత్రమేనని పేర్కొన్నారు.

• ఇందిరమ్మ ఇళ్లు: యూపీఏ ప్రభుత్వ హయాములో రాష్ట్రంలో 25 లక్షల ఇందిరమ్మ ఇళ్ల నిర్మాణం జరిగిందని, గత పదేళ్లలో కేసీఆర్ ఎన్ని ఇళ్లు ఇచ్చారో చెప్పాలని డిమాండ్ చేశారు. కాంగ్రెస్ మళ్లీ ప్రభుత్వం రాగానే 4.50 లక్షల ఇళ్లు పేదలకు మంజూరు చేశామని తెలిపారు.

• రైతు రుణమాఫీ: కాంగ్రెస్ అధికారంలోకి వచ్చిన ఏడాదిలోపే 25 లక్షల మంది రైతులకు రుణమాఫీ చేసిందని, ఒకే విడతలో రూ. 2 లక్షల చొప్పున రూ. 21 వేల కోట్లను రైతుల ఖాతాల్లో వేశామని తెలిపారు.

• లంబాడీ రిజర్వేషన్లు: లంబాడీలకు ఎస్టీ రిజర్వేషన్లు కల్పించిందే ఇందిరమ్మ ప్రభుత్వమని గుర్తు చేశారు.

నల్గొండ జిల్లా ప్రజల పోరాట పౌరుషం తమ ప్రభుత్వానికి అండగా నిలిచిందని పేర్కొన్న సీఎం రేవంత్ రెడ్డి, జిల్లా నీటి సమస్యను శాశ్వతంగా పరిష్కరించడానికి తమ ప్రభుత్వం కృషి చేస్తుందని హామీ ఇచ్చారు. ఎస్‌ఎల్‌బీసీ సొరంగం పనులు పూర్తై నల్గొండకు నీళ్లు రావడం ద్వారా ఈ ప్రాంత రైతులకు, ప్రజలకు నిజమైన ఇందిరమ్మ రాజ్యం అందుబాటులోకి వస్తుందని ఆయన పేర్కొన్నారు.