ఒకసారి మరోసారి కాంగ్రెస్ ప్రభుత్వాన్ని టార్గెట్ చేసిన మాజీ మంత్రి కేటీఆర్, ఎన్నికల్లో ఇచ్చిన హామీలను అమలు చేయడంలో విఫలమవుతున్నారని విమర్శించారు. ముఖ్యంగా, రేషన్ బియ్యం అంశాన్ని ప్రస్తావిస్తూ, సన్న బియ్యం అందిస్తామని చెప్పి ఇప్పటివరకు ఎటువంటి చర్యలు తీసుకోలేదని ఆరోపించారు. ప్రజలకు రేషన్ బియ్యం సరఫరాలో ప్రభుత్వం నిర్లక్ష్యంగా వ్యవహరిస్తోందని, హామీల అమలులో పూర్తి వైఫల్యాన్ని ప్రదర్శిస్తోందని ధ్వజమెత్తారు.
సన్న బియ్యం పేరుతో భారీ ప్రకటనలు చేసి, చివరకు సామాన్య ప్రజలకు రేషన్ బియ్యం కూడా ఇవ్వలేని దుస్థితి నెలకొందని విమర్శించారు. రైతుల నుంచి సన్న బియ్యం కొనుగోలు జరగలేదని, బోనస్ రూ.500 ఇస్తామని చెప్పి అమలు చేయలేదని ఆరోపించారు. మార్చి నెల నుంచే సన్న బియ్యం అందిస్తామని ప్రగల్భాలు పలికినా, పదో తేదీ దాటినా రేషన్ బియ్యం కూడా సరఫరా చేయలేని అసమర్థ ప్రభుత్వమని ఎద్దేవా చేశారు.
ఇంకా, గురుకుల విద్యార్థులకు తగినంత భోజనం కూడా అందించలేని పరిస్థితి నెలకొందని, పేదలకు రేషన్ బియ్యం క్రమంగా తగ్గిస్తున్నారని ఆరోపించారు. లక్షా 54 వేల మెట్రిక్ టన్నుల బియ్యానికి గాను కేవలం 62 వేల మెట్రిక్ టన్నులే రేషన్ దుకాణాలకు సరఫరా చేయడం కాంగ్రెస్ ప్రభుత్వ వైఫల్యానికి నిదర్శనమని వ్యాఖ్యానించారు. ఉగాది సందర్భంగా సన్న బియ్యం అందిస్తామని ప్రకటనలు చేసినా, చివరకు పేదలకు రేషన్ బియ్యం కూడా మంజూరు చేయలేకపోయారని విమర్శించారు.
ఇదే తరహాలో పలు సంక్షేమ కార్యక్రమాలను నిలిపివేసినట్టు ఆరోపిస్తూ, కేటీఆర్ తన సామాజిక మాధ్యమ వేదికగా విరుచుకుపడ్డారు.
రైతులకు రుణమాఫీ నిలిపివేత
రైతు భరోసా ఆపివేత
రైతు బీమా నష్టపరిచారు
ఆడబిడ్డలకు ‘కేసీఆర్ కిట్’ రద్దు
గర్భిణీ స్త్రీలకు న్యూట్రిషన్ కిట్ కట్
విద్యార్థినులకు హెల్త్ కిట్, ఎలక్ట్రిక్ స్కూటీ రద్దు
మహిళలకు నెలకు రూ.2500 ‘మహాలక్ష్మి’ నిలిపివేత
పేదలకు రేషన్ బియ్యం తగ్గింపు
“కాంగ్రెస్ అంటే కటింగ్ – కాంగ్రెస్ అంటే కన్నింగ్” అంటూ విరుచుకుపడ్డారు. #CongressFailedTelangana అనే హ్యాష్‌ట్యాగ్‌ను జతచేస్తూ ఎక్స్ వేదికగా పంచుకున్నారు.
కొండనాలికకు మందేస్తే ఉన్న నాలిక ఊడింది అన్నట్టు-సన్నబియ్యం కోసం చూస్తే దొడ్డుబియ్యం కూడా ఇయ్యలే
రైతుల నుండి సన్నాలు కొన్నది లేదు-సన్నాలకు బోనస్ రూ.500 ధర ఇచ్చింది లేదు
మార్చి నుండి పేదలకు సన్నబియ్యం అని ప్రకటనలు.. పదో తేదీ దాటినా పేదలకు రేషన్ బియ్యం కూడా ఇవ్వని అసమర్థ… pic.twitter.com/8KiFA6IRs7
— KTR (@KTRBRS) March 19, 2025
