తెలంగాణ రాష్ట్ర కాంగ్రెస్ ప్రభుత్వం ప్రజా గాయకుడు గద్దర్ కుమార్తె డాక్టర్ గుమ్మడి వెన్నెలకు (వెన్నెల) కీలక పదవి ఇచ్చింది. వెన్నెలను రాష్ట్ర సాంస్కృతిక సారథి ఛైర్‌పర్సన్‌గా నియమించినట్లు యూత్ అండ్ టూరిజం శాఖ ప్రిన్సిపల్ సెక్రటరీ శ్రీధర్ శనివారం ఉత్తర్వులు జారీ చేశారు. రాష్ట్ర ప్రభుత్వం చేపట్టే అభివృద్ధి మరియు సంక్షేమ పథకాలపై ప్రజలను చైతన్యవంతం చేయడమే కాకుండా, తెలంగాణ సాంస్కృతిక విలువలను పటిష్టం చేయడం వెన్నెల ప్రధాన బాధ్యతగా ఉన్నది. ప్రభుత్వ కార్యక్రమాలను కళాకారుల ద్వారా విస్తృతంగా ప్రజలకు చేరవేసే విధంగా కార్యాచరణ ప్రణాళిక రూపొందించనున్నారు.
వెన్నెల గద్దర్, విమల దంపతుల కుమార్తె. ఉస్మానియా యూనివర్సిటీలో గ్రాడ్యుయేట్ పూర్తిచేసిన ఆమె, సికింద్రాబాద్‌లోని అల్వాల్ ప్రాంతంలో గద్దర్ స్థాపించిన మహాబోధి పాఠశాలను గత 18 సంవత్సరాలుగా నడుపుతున్నారు. ప్రత్యేకించి పేద పిల్లలకు ఉచిత విద్యను అందించడంలో ఈ పాఠశాలకు ప్రత్యేక గుర్తింపు ఉంది. 2023లో గద్దర్ మరణం తర్వాత వెన్నెల రాజకీయాల్లోకి అడుగుపెట్టారు. కాంగ్రెస్ పార్టీలో చేరిన ఆమె, అదే ఏడాది సికింద్రాబాద్ కంటోన్మెంట్ నియోజకవర్గం నుండి శాసనసభ ఎన్నికల్లో పోటీ చేసి ఓడిపోయారు. ఎన్నికల తర్వాత రాజకీయాలకు దూరంగా ఉంటూ, తన స్కూల్ బాధ్యతల మీద దృష్టి పెట్టారు.
గతంలో కేసీఆర్ ప్రభుత్వం ప్రారంభించిన సాంస్కృతిక సారథికి ఇప్పటి వరకు రసమయి బాలకిషన్ ఛైర్మన్‌గా ఉన్నారు. కానీ 2023 అసెంబ్లీ ఎన్నికల తర్వాత కాంగ్రెస్ ప్రభుత్వం ఈ పదవిలో మార్పు చేయాల్సి వచ్చింది. వెన్నెల నియామకంతో, సాంస్కృతిక రంగంలో కొత్త ఊపునకు దారితీసే అవకాశముంది. వెన్నెలను ఈ పదవిలో నియమించడంపై అన్ని వర్గాల నుంచి ప్రశంసలు వెల్లువెత్తుతున్నాయి. ఒక దశలో ప్రజా గాయకుడిగా గద్దర్ పోరాట పంథాను కొనసాగించిన వెన్నెల ఇప్పుడు తెలంగాణ సాంస్కృతిక రంగాన్ని ముందుకు నడిపించడానికి సిద్ధమయ్యారు.
వెన్నెల నియామకం తెలంగాణ రాష్ట్రంలో సాంస్కృతిక ఔనత్యాన్ని మరింత పటిష్టం చేస్తుందనడంలో సందేహం లేదు.
