హైదరాబాద్ నగరవాసులకు శంషాబాద్ రాజీవ్ గాంధీ అంతర్జాతీయ విమానాశ్రయానికి (RGIA) చేరుకోవడం కష్టతరంగా మారుతోంది. వ్యక్తిగత వాహనాలు ఉన్నవారు సులభంగా ప్రయాణం చేయగలిగినా, పేద, మధ్య తరగతి ప్రజలు అధిక ఛార్జీలతో ప్రైవేట్ క్యాబ్‌లు లేదా రవాణా సేవలను ఆశ్రయించాల్సిన పరిస్థితి ఉంది. ఈ సమస్యను తీర్చేందుకు, తెలంగాణ స్టేట్ రోడ్ ట్రాన్స్‌పోర్ట్ కార్పొరేషన్ (TGS RTC) ప్రజలకు ఊరట కలిగించే నిర్ణయం తీసుకుంది.
RTC నగరంలోని ముఖ్యమైన ప్రాంతాల నుంచి ఎయిర్‌పోర్టుకు కొత్త పుష్పక్ (Pushpak) ఏసీ బస్సు సర్వీసులను ప్రారంభించింది. బుధవారం నుంచి అందుబాటులోకి వచ్చిన ఈ బస్సులు జేబీఎస్ (JBS), సికింద్రాబాద్ రైల్వే స్టేషన్ (Secunderabad Railway Station) నుంచి శంషాబాద్ ఎయిర్‌పోర్టుకు కనెక్టివిటీ కల్పించనున్నాయి.
RTC గ్రేటర్ ఇన్‌చార్జి ఈడీ రాజశేఖర్ ప్రకారం, మొత్తం 6 పుష్పక్ ఏసీ బస్సులు ప్రయాణికుల సౌకర్యాన్ని దృష్టిలో ఉంచుకొని నడపనున్నారు. ఈ బస్సులు నగరంలోని కీలక ప్రాంతాలను కవర్ చేస్తాయి.
JBS నుంచి ఎయిర్‌పోర్టుకు.. ప్రధాన బస్సు సమయాలు..
మొదటి బస్సు: అర్థరాత్రి 12:55, చివరి బస్సు: రాత్రి 11:55
ఎయిర్‌పోర్ట్ నుంచి సికింద్రాబాద్ రైల్వే స్టేషన్:
మొదటి బస్సు: అర్థరాత్రి 12:50, చివరి బస్సు: రాత్రి 11:50
RTC అధికారులు ప్రయాణికులను ఈ బస్సు సేవలను ఉపయోగించుకుని ప్రయాణ ఖర్చును తగ్గించుకోవాలని సూచిస్తున్నారు. ప్రయాణానికి ముందు తాజా సమాచారం కోసం RTC అధికారిక వెబ్‌సైట్‌ను చూడాలని సూచిస్తున్నారు. ఈ కొత్త బస్సు సర్వీసులు హైదరాబాద్ ప్రజలకు నిజమైన ఊరట కలిగించనున్నాయి!
