తెలంగాణ సూపర్ గేమ్ ఛేంజర్‌గా చెబుతూ కేంద్ర ప్రభుత్వం హైదరాబాద్ రీజినల్ రింగు రోడ్డు ప్రాజెక్టును చేపట్టిన విషయం తెలిసిందే. ప్రస్తుతం హైదరాబాద్ ఓఆర్ఆర్ నుంచి దాదాపు 40 కిలోమీటర్ల దూరంతో ఈ ప్రాజెక్టును పట్టాలెక్కిస్తున్నారు. ఉత్తర, దక్షణ రెండు భాగాలుగా పనులు చేపట్టడానికి నిర్ణయించగా.. ఉత్తర భాగం పనులకు రెండు నెలల క్రితం టెండర్లను కూడా పిలిచారు.
అయితే తాజాగా ఉత్తర భాగం టెండర్లు తెరవడానికి మరికొంత సమయం పట్టే ఛాన్స్ ఉన్నట్లు అధికారిక వర్గాలు వెల్లడిస్తున్నాయి. 161 కిలోమీటర్ల మేర నిర్మించనున్న ఉత్తర భాగం భూసేకరణపై ఇంకా క్లారిటీ రాకపోవడం, ఫారెస్ట్ డిపార్ట్‌మెంట్ నుంచి అనుమతుల ప్రక్రియలో జాప్యం ఏర్పడటంతో.. ఈ పనులు ఆలస్యం కావొచ్చునని తెలుస్తోంది.
రీజినల్ రింగు రోడ్డు ఉత్తర భాగాన్ని గ్రీన్‌ఫీల్డ్‌ రీజనల్‌ ఎక్స్‌ప్రెస్‌వేగా నిర్మించడానికి కేంద్ర ప్రభుత్వం నిర్ణయించింది. ఈ రహదారిని నాలుగు లేన్లుగా నిర్మించడానికి ఎన్‌హెచ్‌ఏఐ డిసెంబరు 27వ తేదీన టెండర్లను ఆహ్వానించింది. సంగారెడ్డి జిల్లా గిర్మాపూర్‌ నుంచి యాదాద్రి జిల్లాలోని తంగడ్‌పల్లి వరకు మొత్తం 161.518 కి.మీ వరకూ పనులు చేపట్టడానికి సిద్ధమైంది.
ఉత్తర భాగం మొత్తం వ్యయం అంచనా 7,104.06 కోట్ల రూపాయలుగా కేంద్రం నిర్ణయించింది. ఉత్తర భాగం పనుల బిడ్‌ల దాఖలుకు ఫిబ్రవరి 14న తుది గడువుగా నిర్ణయించింది. కేంద్రం విడుదల చేసిన నోటిఫికేషన్‌ ప్రకారం.. ఈనెల 17నే టెండర్లు తెరవాల్సి ఉండగా..న్‌హెచ్‌ఏఐ ఈ ప్రక్రియను తాజాగా వాయిదా వేసింది. టెండర్లను తెరవడానికి మరో రెండు వారాల సమయం తీసుకోనున్నట్లు తెలుస్తోంది.
రీజినల్ రింగు రోడ్డు ఉత్తరభాగం పనుల కోసం మొత్తం 1,940 హెక్టార్ల భూమిని సేకరించాల్సి ఉండగా..దీనిలో సుమారు 94 శాతం భూసేకరణ పూర్తయింది. మిగిలిన 6 శాతం భూములు న్యాయ వివాదాల్లో చిక్కుకున్నట్లు అధికారులు గుర్తించారు.
ఇదే కాకుండా రోడ్డు విస్తరణ కోసం భూములు కోల్పోయిన రైతులకు పూర్తిస్థాయిలో నష్ట పరిహారం ఇవ్వాల్సి ఉంది. సిద్దిపేట, యాదాద్రి భువనగిరి,మెదక్, జిల్లాల పరిధిలో మొత్తం 72.35 హెక్టార్లలో పనులు మెుదలుపెట్టడానికి ఫారెస్ట్ డిపార్ట్‌మెంట్ నుంచి అనుమతులు రావడంతో.. ఈ భూములకు సంబంధించి అటవీశాఖకు కూడా పరిహారం చెల్లించాల్సి ఉంది. దాంతో పాటు.. ప్రత్యామ్నాయ భూమి కేటాయింపు, మొక్కల పెంపకం వంటి ప్రక్రియను కూడా చేపట్టాలి ఇవన్నీ పూర్తవడానికి రెండు వారాల సమయం అయినా పడుతుందని..ఆ తర్వాతే టెండర్లు తెరిచే అవకాశం ఉన్నట్లు తెలుస్తోంది.
