ఒంగోలులో ఏర్పాటు చేసిన తెలుగుదేశం పార్టీ నాయకులు మరియు కార్యకర్తల సమన్వయ సమావేశంలో రాష్ట్ర విద్య, ఐటీ మరియు ఎలక్ట్రానిక్స్ శాఖల మంత్రి నారా లోకేష్ పాల్గొన్నారు. ఈ సందర్భంగా పార్టీ శ్రేణులను ఉద్దేశించి ప్రసంగిస్తూ, ఉమ్మడి ప్రకాశం జిల్లా అభివృద్ధిపై మరియు స్థానిక రాజకీయ పరిణామాలపై కీలక వ్యాఖ్యలు చేశారు.
మాజీ సీఎం జగన్కు పదోసారి బహిరంగ సవాల్
వైసీపీ అధినేత వైఎస్ జగన్ మోహన్ రెడ్డికి డీఎస్సీ మరియు ఏపీపీఎస్సీ (APPSC) నిర్వహణకు ఉన్న తేడా కూడా తెలియడం లేదని మంత్రి లోకేష్ ఎద్దేవా చేశారు. జగన్ నిజం మాట్లాడితే తల వెయ్యి ముక్కలవుతుందనే శాపం ఉందేమోనంటూ వ్యంగ్యాస్త్రాలు సంధించారు. గ్రూప్-1 పరీక్షల నిర్వహణలో అక్రమాలు జరిగాయని స్వయంగా న్యాయస్థానమే స్పష్టం చేసిందని గుర్తుచేశారు.
“జగన్… టైమ్, డేట్ నువ్వే ఫిక్స్ చెయ్! పులివెందుల రమ్మంటే వస్తా, లేదా తాడేపల్లి రమ్మంటే వస్తా. డీఎస్సీ నియామకాలపై నేరుగా చర్చించడానికి నేను సిద్ధం.. నువ్వు సిద్ధమా?” అంటూ పదోసారి సవాల్ విసిరారు.
ఒంగోలు రూపురేఖలు మారాయి
ఉమ్మడి ప్రకాశం జిల్లా అంటే తనకు ప్రత్యేక అభిమానమని తెలిపిన మంత్రి నారా లోకేష్, జిల్లా ప్రజాప్రతినిధులు ఎంతో ఐక్యతతో పనిచేస్తున్నారని కొనియాడారు. గత ప్రభుత్వ హయాంలో ఒంగోలు నగరంలో అభివృద్ధి తీవ్రంగా పడకేసిందని, అధ్వానపు రోడ్లు మరియు చెత్తాచెదారంతో పట్టణం అధ్వానంగా తయారైందని విమర్శించారు.
ఎమ్మెల్యే దామచర్ల జనార్ధన్ గెలిచిన తర్వాతే ఒంగోలు నగర రూపురేఖలు మారి, అభివృద్ధి వేగవంతమైందని పేర్కొన్నారు. గత ప్రభుత్వ హయాంలో కనీసం ఒక్క తాగునీటి ప్రాజెక్టును కూడా నిర్మించలేకపోయారని మంత్రి మండిపడ్డారు.
ఈ నెల 31న వెలిగొండ ప్రాజెక్టు ప్రారంభం
కూటమి ప్రభుత్వం అధికారంలోకి వచ్చిన వెంటనే వందల కోట్ల రూపాయల నిధులు కేటాయించి వెలిగొండ ప్రాజెక్టు పనులను పూర్తి చేసిందని మంత్రి లోకేష్ వెల్లడించారు. ఈ నెల 31న వెలిగొండ ప్రాజెక్టును అధికారికంగా ప్రారంభించనున్నట్లు ప్రకటించారు. ప్రతిపక్షంలో ఉన్నప్పుడు ప్రాణాలు కోల్పోయిన కార్యకర్తల కుటుంబాలకు కూటమి ప్రభుత్వం అండగా నిలుస్తోందని చెబుతూ, దాడుల్లో హత్యకు గురైన చంద్రయ్య కుమారుడికి ఇప్పటికే ప్రభుత్వ ఉద్యోగం కల్పించామని గుర్తుచేశారు. ఇచ్చిన హామీలను పద్ధతి ప్రకారం నెరవేరుస్తున్నామని స్పష్టం చేశారు.
ఉద్యోగాల భర్తీ – వరుస డీఎస్సీల హామీ
నిరుద్యోగులకు ఇచ్చిన మాట ప్రకారం ఇప్పటికే 16,000 పోస్టులతో మెగా డీఎస్సీ నిర్వహించడంతో పాటు, 6,000 పోలీసు కానిస్టేబుల్ పోస్టులను భర్తీ చేశామని మంత్రి లోకేష్ తెలిపారు. నిరుద్యోగ యువతకు నిరంతరం అవకాశాలు కల్పించేందుకు రాబోయే మూడేళ్ల పాటు ప్రతి ఏటా డీఎస్సీ నోటిఫికేషన్లు విడుదల చేస్తామని కీలక ప్రకటన చేశారు.
ఇక ఈ సందర్భంగా ప్రకాశం జిల్లా నాయకులు మరియు కార్యకర్తలు తమ వ్యక్తిగత అహంకారాలు (ఈగోలు) పక్కనబెట్టి, రాబోయే రోజుల్లో పార్టీ బలోపేతానికి, ప్రజాసేవకు కలిసికట్టుగా పనిచేయాలని మంత్రి నారా లోకేష్ పిలుపునిచ్చారు.
