చైనాలో ప్రారంభమైన హెచ్‌ఎంపీవీ (హ్యూమన్ మెటాప్న్యూమోవైరస్) ప్రస్తుతం భారత్‌లో వేగంగా వ్యాపిస్తున్నట్లు అధికారులు తెలిపారు. సోమవారం ఒక్కరోజులో మూడు హెచ్‌ఎంపీవీ కేసులు నమోదు కావడంతో కేంద్ర ప్రభుత్వం అన్ని రాష్ట్రాలను అప్రమత్తం చేసింది. బెంగళూరులో 3 నెలల, 8 నెలల చిన్నారులకు వైరస్ నిర్ధారణ కాగా, గుజరాత్‌లో 2 నెలల చిన్నారికి ఈ వైరస్ సోకింది.
లక్షణాలు & ప్రమాదాలు
హెచ్‌ఎంపీవీ వైరస్ లక్షణాలు సాధారణ ఫ్లూ లేదా శ్వాసకోశ ఇన్ఫెక్షన్ల మాదిరిగానే ఉంటాయి.
దగ్గు, జ్వరం, ముక్కు దిబ్బడ, శ్వాస తీసుకోవడంలో ఇబ్బంది వంటి సమస్యలు ఉంటాయి.
ఈ వైరస్ వల్ల బ్రాంకైటిస్, నిమోనియా వంటి తీవ్రమైన వ్యాధులు వచ్చే అవకాశముంది.
లక్షణాలు బయటపడేందుకు 3-6 రోజులు పడుతుంది.
చిన్నారులు & వృద్ధులకు అధిక ప్రమాదంలో
అమెరికా సెంటర్స్ ఫర్ డిసీజ్ కంట్రోల్ అండ్ ప్రివెన్షన్ ప్రకారం, రోగనిరోధక శక్తి తక్కువగా ఉన్న చిన్నారులు, వృద్ధులు హెచ్‌ఎంపీవీకి అధికంగా గురికావచ్చు. దేశంలోని అన్ని ఆస్పత్రుల్లో తగిన మౌలిక వసతులు అందుబాటులో ఉంచాలని కేంద్ర ఆరోగ్య శాఖ సూచించింది. ప్రస్తుతం భారత్‌లో పరిస్థితి నియంత్రణలో ఉన్నప్పటికీ, ప్రజలు అప్రమత్తంగా ఉండాలని సూచించారు.
చైనాను దాటి ఇతర దేశాల్లోనూ హెచ్‌ఎంపీవీ వేగంగా వ్యాపిస్తోంది. ఇప్పటివరకు భారత్‌లో ఈ వైరస్ సోకిన కుటుంబాలు ఎలాంటి విదేశీ ప్రయాణాలు చేయలేదని ఆరోగ్య శాఖ తెలిపింది.
