ఆంధ్రప్రదేశ్‌లో బర్డ్ ఫ్లూ విషయంలో ఆందోళన చెందాల్సిన అవసరం లేదని రాష్ట్ర ప్రభుత్వం వెల్లడించింది. మంత్రి అచ్చెన్నాయుడు ప్రకటన చేస్తూ, ప్రజలు భయపడాల్సిన పని లేదని, బాగా ఉడికించిన గుడ్లు మరియు చికెన్ స్వేచ్ఛగా తినొచ్చని తెలిపారు. ప్రభుత్వం అప్రమత్తంగా వ్యవహరిస్తూ బర్డ్ ఫ్లూ నియంత్రణకు కఠిన చర్యలు తీసుకుంటోందని చెప్పారు.
సీఎం చంద్రబాబు తక్షణ స్పందన
రాష్ట్ర ముఖ్యమంత్రి నారా చంద్రబాబు నాయుడు వెంటనే స్పందించి, కేంద్ర ప్రభుత్వ పశుసంవర్థక శాఖతో పాటు బోపాల్‌లోని నేషనల్ ఇన్‌స్టిట్యూట్ ఆఫ్ హైసెక్యూరిటీ యానిమల్ డిసీజెస్ శాస్త్రవేత్తలతో చర్చలు జరిపారని అచ్చెన్నాయుడు తెలిపారు. ఇప్పటికే పలు కేంద్ర బృందాలు రాష్ట్రానికి వచ్చాయని, కేంద్ర పశుసంవర్థక శాఖ జాయింట్ సెక్రటరీ కూడా త్వరలో రాష్ట్ర పర్యటనకు రానున్నారని చెప్పారు.
బయటపడిన ప్రాంతాల్లో బయోసెక్యూరిటీ జోన్‌లు
పశ్చిమ గోదావరి జిల్లా బాదంపూడి, వేల్పూరు, కానూరు, కృష్ణా జిల్లా గంపలగూడెం ప్రాంతాల్లో ఐదు ఫౌల్ట్రీలలో బర్డ్ ఫ్లూ గుర్తించడంతో, అక్కడ బయోసెక్యూరిటీ జోన్‌లను ప్రకటించి, వ్యాధి వ్యాప్తిని నియంత్రించేందుకు ప్రత్యేక చర్యలు చేపట్టారు. కేంద్ర మార్గదర్శకాలకు అనుగుణంగా, బర్డ్ ఫ్లూ సోకిన ప్రాంతాలకు ఒక కిలోమీటర్ పరిధిలో కఠిన నియంత్రణలు అమలు చేయబడుతున్నాయి.
తప్పుడు వార్తలపై చర్యలు
బర్డ్ ఫ్లూ విషయంలో ప్రజలు భయపడాల్సిన అవసరం లేదని ప్రభుత్వం స్పష్టం చేసింది. గుడ్లు, మాంసాన్ని పూర్తిగా ఉడికించి తినడంలో ఎటువంటి హాని లేదని తెలిపింది. ఈ విషయంపై తప్పుడు సమాచారం ప్రచారం చేసే వారిపై కఠిన చర్యలు తీసుకోవాలని నిర్ణయించిందని అచ్చెన్నాయుడు హెచ్చరించారు.
ఇప్పటి వరకు కొత్త కేసులేం లేవు
ఇప్పటివరకు బర్డ్ ఫ్లూ బయటపడిన ప్రాంతాలకతప్ప, ఇతర ప్రాంతాల్లో వ్యాధి సోకిన నమోదు లేదని తెలిపారు. అన్ని జిల్లాల కలెక్టర్లు, పశుసంవర్థక శాఖ, ఆరోగ్యశాఖలు అప్రమత్తంగా ఉన్నాయని పేర్కొన్నారు. సైబీరియన్ వలస పక్షుల వల్ల రాష్ట్రంలోని కొన్ని ప్రాంతాల్లో బర్డ్ ఫ్లూ వ్యాపించినట్లు పశుసంవర్థక శాఖ సంచాలకుడు డా. టి. దామోదర నాయుడు తెలిపారు. వ్యాధి నియంత్రణలో భాగంగా ఇప్పటికే 14,000 కోళ్లను కాల్చివేశామని, మరో కొన్ని ఫౌల్ట్రీల్లో 1.40 లక్షల కోళ్లు ఉండగా, వాటిని కూడా తొలగించనున్నట్లు పేర్కొన్నారు.
బర్డ్ ఫ్లూ విషయంలో భయపడాల్సిన అవసరం లేదు.
పూర్తిగా ఉడికించిన గుడ్లు, చికెన్ తినొచ్చు.
రాష్ట్ర ప్రభుత్వం అప్రమత్తంగా ఉంది, కేంద్ర సహాయంతో చర్యలు తీసుకుంటోంది.
తప్పుడు వార్తలు ప్రచారం చేసేవారిపై కఠిన చర్యలు.
వ్యాధి సోకిన ప్రాంతాల్లో నియంత్రణ చర్యలు అమల్లో ఉన్నాయి.
