మెగా బ్రదర్, జనసేన పార్టీ ప్రధాన కార్యదర్శి కొణిదెల నాగబాబు త్వరలో ఆంధ్రప్రదేశ్ మంత్రివర్గంలో చోటు దక్కించుకోనున్నారు. ఆంధ్రప్రదేశ్ ముఖ్యమంత్రి చంద్రబాబు నాయుడు అధికారిక ప్రకటన ద్వారా నాగబాబును మంత్రివర్గంలోకి తీసుకోవాలని నిర్ణయించినట్లు తెలిపారు. ప్రస్తుతం ఏపీ కేబినెట్‌లో 25 మంది సభ్యులు ఉండాల్సి ఉండగా, 24 మంది మాత్రమే మంత్రులుగా ఉన్నారు. మిగిలిన ఒక ఖాళీని జనసేనకు కేటాయించి, ఆ స్థానంలో నాగబాబును ఎంపిక చేయనున్నారు.
జనసేనలో కీలక నేతగా నాగబాబు
జనసేన పార్టీ స్థాపన తర్వాత నాగబాబు ఆ పార్టీకి చెందిన ప్రధాన కార్యదర్శిగా, అలాగే ముఖ్య నాయకుడిగా సేవలు అందించారు. గత ఎన్నికల్లో అనకాపల్లి పార్లమెంటరీ నియోజకవర్గం నుంచి పోటీ చేయాలని భావించినప్పటికీ, కూటమి ఒప్పందం కారణంగా ఆయనను పక్కకు తప్పించుకున్నారు. 2019లో నరసాపురం లోక్‌సభ నియోజకవర్గం నుంచి పోటీ చేసి 2,50,289 ఓట్లు దక్కించుకున్న విజయం సాధించలేకపోయారు.
రాజ్యసభకు అనుకున్నప్పటికి..
ఇటీవల జరిగిన రాజకీయ పరిణామాల్లో నాగబాబును రాజ్యసభకు నామినేట్ చేస్తారనే ప్రచారం జరిగింది. అయితే, ఆ స్థానాలు బీజేపీకి చెందిన ఆర్. కృష్ణయ్య, టీడీపీ తరఫున బీద మస్తాన్ రావు, సానా సతీష్‌లకు కేటాయించడంతో, ఈ అవకాశం నాగబాబుకు దక్కలేదు. అయితే, ఆయన మంత్రివర్గంలోకి రావడం ఖాయమని సీఎం చంద్రబాబు తెలిపారు.
నాగబాబుకు కేటాయించే శాఖపై ఉత్కంఠ
నాగబాబును మంత్రిగా ప్రమాణ స్వీకారం చేయించేందుకు అవసరమైన ఏర్పాట్లు జరుగుతున్నాయి. ఆయనకు ఏ శాఖను కేటాయిస్తారన్న దానిపై ఇంకా స్పష్టత రాలేదు. కానీ, జనసేన తరఫున ప్రస్తుతం డిప్యూటీ సీఎం పవన్ కళ్యాణ్, నాదెండ్ల మనోహర్, కందుల దుర్గేశ్‌లు కేబినెట్‌లో ఉన్నారు. ఏదైన ఖాళీ స్థానాన్ని నాగబాబుతో భర్తీ చేయడం ద్వారా జనసేనకు మరింత బలం చేకూరుతుంది.
మెగా కుటుంబం నుంచి రాజకీయ నేతల అరుదైన ఘనత
కొణిదెల కుటుంబం నుంచి చలనచిత్ర రంగంలో మాత్రమే కాకుండా, రాజకీయాల్లో కూడా తమదైన ముద్ర వేస్తున్నారు. మెగాస్టార్ చిరంజీవి, కేంద్ర పర్యాటక శాఖ సహాయ మంత్రిగా సేవలందించగా, పవన్ కళ్యాణ్ ప్రస్తుతం ఏపీ డిప్యూటీ సీఎం హోదాలో ఉన్నారు. ఇప్పుడు నాగబాబు కూడా మంత్రిగా చేరుతూ ఆ కుటుంబ ఘనతను కొనసాగిస్తున్నారు.
కీలకంగా పవన్ కళ్యాణ్ విజ్ఞప్తి
నాగబాబును మంత్రిగా తీసుకోవడం వెనుక పవన్ కళ్యాణ్ విజ్ఞప్తి ప్రధాన కారణమని తెలుస్తోంది. జనసేన విజయానికి, కూటమి గెలుపు కోసం నాగబాబు చేసిన కృషిని గుర్తించిన చంద్రబాబు, ఈ కీలక నిర్ణయం తీసుకున్నారు. ఆయన మంత్రిగా బాధ్యతలు చేపట్టడం ద్వారా ఏపీ రాజకీయాల్లో మరో కొత్త అధ్యాయం ప్రారంభం కానుంది.
