తెలుగు సినీ అభిమానులను షాక్‌కు గురి చేసిన ఘటనలో స్టార్ హీరో అల్లు అర్జున్ అరెస్ట్ చేయడం సంచలనంగా మారింది. ‘పుష్ప-2’ సినిమా ప్రీమియర్ షో రోజున సంధ్య థియేటర్ వద్ద భారీ తొక్కిసలాట ఏర్పడటంతో ఓ మహిళ ప్రాణాలు కోల్పోగా, చిన్నారి తీవ్రంగా గాయపడింది. ఈ ఘటనపై అల్లు అర్జున్‌తో పాటు సంధ్య థియేటర్ యాజమాన్యంపై కేసులు నమోదయ్యాయి. చిక్కడపల్లి పోలీసులు అల్లు అర్జున్‌ను హైదరాబాద్‌లోని ఆయన నివాసంలో అదుపులోకి తీసుకున్నారు.
కోర్టు ముందున్న అల్లు అర్జున్
అల్లు అర్జున్‌ను నాంపల్లి కోర్టులో హాజరుపరచగా, కోర్టు 14 రోజుల రిమాండ్ విధించింది. వెంటనే హైకోర్టును ఆశ్రయించిన అల్లు అర్జున్ తరుఫున ప్రముఖ న్యాయవాది నిరంజన్ రెడ్డి లంచ్ మోషన్ పిటిషన్ దాఖలు చేశారు. గతంలో వైసీపీ అధినేత జగన్ అక్రమాస్తుల కేసును వాదించిన నిరంజన్ రెడ్డి, ఈసారి అల్లు అర్జున్ కేసులో కీలక వాదనలు వినిపించారు.
షారుక్ ఖాన్ కేసు ప్రస్తావన
కోర్టులో వాదనల సమయంలో బాలీవుడ్ స్టార్ షారుక్ ఖాన్ కేసు ఉదాహరణగా నిలిచింది. షారుక్ నటించిన “రాయన్” సినిమా రిలీజ్ సమయంలో అభిమానులు గుమిగూడి జరిగిన ప్రమాదంలో ఓ వ్యక్తి మృతిచెందినా, షారుక్ ఖాన్ ఉద్దేశపూర్వకంగా చేయలేదని కోర్టు క్లీన్ చీట్ ఇచ్చింది. ఇదే విషయాన్ని నిరంజన్ రెడ్డి కోర్టుకు వివరించారు.
మధ్యంతర బెయిల్
న్యాయమూర్తి పోలీసులను ప్రశ్నిస్తూ, అల్లు అర్జున్‌ను అరెస్ట్ చేయడం అవసరమా అని నిలదీశారు. ఒకరోజు కస్టడీ సరిపోతుందని అభిప్రాయపడ్డ న్యాయమూర్తి, 4 వారాల మధ్యంతర బెయిల్ మంజూరు చేసి, రూ. 50,000 పూచీకత్తుతో పర్సనల్ బాండ్‌పై అల్లు అర్జున్‌ను విడుదల చేశారు.
నిరంజన్ రెడ్డి ఫీజు సంచలనంగా మారిన చర్చ
ఈ కేసు వాదనకు నిరంజన్ రెడ్డి భారీ ఫీజు తీసుకున్నారని నెట్టింట వార్తలు చక్కర్లు కొడుతున్నాయి. గంటకు రూ. 5 లక్షలు చార్జ్ చేస్తారని, రెండు గంటల వాదనకు ఆయన రూ. 10 లక్షలు పైగా తీసుకున్నారని ప్రచారం జరుగుతోంది. ఈ వార్తలపై నిజం ఎంత అన్నది స్పష్టత లేకపోయినా, సోషల్ మీడియాలో ఇదే హాట్ టాపిక్‌గా మారింది.
