అమెరికా 47వ అధ్యక్షుడిగా డొనాల్డ్ ట్రంప్ పదవీ బాధ్యతలు స్వీకరించడం ప్రపంచవ్యాప్తంగా చర్చనీయాంశంగా మారింది. ఆయన కుటుంబ సభ్యులు వ్యాపారాలకు పునరుజ్జీవం కల్పిస్తూ, ఆరు కొత్త ట్రంప్ టవర్స్ ప్రాజెక్టులను భారత్‌లో ప్రారంభించేందుకు సిద్ధమవుతున్నారు. ఈ క్రమంలో హైదరాబాద్ కూడా ట్రంప్ కుటుంబం ప్రత్యేక దృష్టిని ఆకర్షించింది.
హైదరాబాద్‌ను ఎందుకు ఎంచుకున్నారు?
ప్రపంచ ఐటీ, ఫార్మా కేంద్రంగా మారుతున్న హైదరాబాద్ ప్రస్తుతం అంతర్జాతీయ కంపెనీలకు లగ్జరీ హబ్‌గా నిలుస్తోంది. బంజారా హిల్స్, జూబ్లీ హిల్స్ వంటి ప్రాంతాల్లో రియల్ ఎస్టేట్ బూమ్ కొనసాగుతుండటంతో ట్రంప్ కుటుంబం కూడా ఇక్కడ తమ లగ్జరీ నివాసాల వ్యాపారానికి పెద్ద ఎత్తున పెట్టుబడులు పెట్టాలని నిర్ణయించింది. గూగుల్, ఫేస్‌బుక్ వంటి ప్రపంచ దిగ్గజ సంస్థలు ఇక్కడ కార్యకలాపాలు నిర్వహిస్తుండటం, లగ్జరీ హోటళ్లకు పెరుగుతున్న గిరాకీతో ట్రంప్ టవర్స్ హైదరాబాద్లోని ప్రత్యేక ప్రాజెక్టుగా అవతరించనుంది.
భారత్‌లో ఇప్పటికే ముంబై, పూణె, కోల్‌కతా, గురుగ్రామ్‌లలో నాలుగు ట్రంప్ టవర్స్ ఉన్నాయి. ఇవి మొత్తం 800 లగ్జరీ నివాసాలను కలిగి ఉండగా, వాటి విలువ దాదాపు ₹7,500 కోట్లకు చేరుకుంది.
గురుగ్రామ్: ఒక్కో నివాసం ₹12 కోట్ల నుంచి ₹24 కోట్ల వరకు.
కోల్‌కతా: ఒక్కో నివాసం ₹4 కోట్ల నుంచి ₹7 కోట్ల వరకు.
ముంబై, పూణె: ₹10 కోట్ల నుంచి ₹25 కోట్ల వరకు.
2030కు 10 ప్రాజెక్టుల లక్ష్యం
డొనాల్డ్ ట్రంప్ కుమారులు రాబోయే ఆరేళ్లలో మొత్తం 10 ట్రంప్ టవర్స్‌ను భారత్‌లో నిర్మించేందుకు ప్రణాళికలు సిద్ధం చేశారు. ఇందులో భాగంగా ముంబై, గురుగ్రామ్, నోయిడా, బెంగళూరు, హైదరాబాద్‌లలో కొత్త ప్రాజెక్టులు ప్రారంభించనున్నారు.
2030 నాటికి భారత్‌లో ట్రంప్ టవర్స్ మొత్తం విలువ ₹15,000 కోట్లకు చేరుతుందని అంచనా. నూతన ఆరు ప్రాజెక్టులు పూర్తయిన తర్వాత భారత్, అమెరికాకు తర్వాత అత్యధిక ట్రంప్ టవర్స్ కలిగిన దేశంగా మారనుంది.
ట్రంప్ కుమారుల పర్యటన
డొనాల్డ్ ట్రంప్ కుమారులు త్వరలో భారత్ పర్యటనకు రానున్నారు. ఈ పర్యటనలో ముంబై, గురుగ్రామ్, బెంగళూరు, నోయిడా, హైదరాబాద్ వంటి నగరాల్లో కొత్త ప్రాజెక్టులను ప్రారంభించనున్నారు. భారత్‌లో వ్యాపార వృద్ధితో ట్రంప్ కుటుంబం ఎంతో ఉత్సాహంగా ఉంది. హైదరాబాద్లో త్వరలో ప్రారంభమయ్యే ట్రంప్ టవర్స్ లగ్జరీ నివాసాల మార్కెట్‌ను కొత్త స్థాయికి తీసుకువెళ్లనుంది. ఈ ప్రాజెక్ట్‌లు నగరానికి అంతర్జాతీయ గుర్తింపు తెచ్చే అవకాశం ఉందని విశ్లేషకులు భావిస్తున్నారు.
