టీమిండియా స్టార్ పేసర్ జస్‌ప్రీత్ బుమ్రా ఆస్ట్రేలియాలో చరిత్ర సృష్టించాడు. గబ్బా వేదికగా జరుగుతున్న బోర్డర్-గవాస్కర్ ట్రోఫీ మూడో టెస్ట్‌లో బుమ్రా తన అద్భుత ప్రదర్శనతో భారత బౌలింగ్ విజయగాథలో సరికొత్త అధ్యాయం లిఖించాడు. ఆసీస్ గడ్డపై అత్యధిక వికెట్లు తీసిన భారత బౌలర్‌గా బుమ్రా నిలిచాడు. ఈ సందర్భంగా దిగ్గజ కెప్టెన్ కపిల్ దేవ్ రికార్డ్‌ను అధిగమిస్తూ 10 టెస్ట్‌ల్లో 52 వికెట్లు తీసి సంచలన ప్రదర్శన కనబరిచాడు.
ఆస్ట్రేలియా బ్యాటింగ్‌ను చీల్చిచెండాడిన బుమ్రా, ఉస్మాన్ ఖవాజా (8), మార్నస్ లబుషేన్ (1) వికెట్లను కూల్చి టాప్ ఆర్డర్‌ను కుదిపేశాడు. దానికి తోడు ఆకాష్ దీప్, మహ్మద్ సిరాజ్‌లు తమ అదిరిపోయే బౌలింగ్‌తో ఆసీస్‌ను తక్కువ స్కోర్‌కే పరిమితం చేశారు. ఆసీస్ రెండో ఇన్నింగ్స్‌ను 89 పరుగుల వద్ద డిక్లేర్ చేయడంతో భారత్ ముందున్న లక్ష్యం 275 పరుగులు.
మ్యాచ్ ఉత్కంఠ భరిత దశకు చేరింది. భారత బౌలర్లు పిచ్‌లో తేమను సద్వినియోగం చేసుకుని ఆసీస్ బ్యాటర్లకు చుక్కలు చూపించారు. బుమ్రా 3 వికెట్లు తీయగా, సిరాజ్, ఆకాష్ దీప్ చెరో 2 వికెట్లు దక్కించుకున్నారు. ఆసీస్ ఓపెనర్లతో పాటు మిడిలార్డర్ కూడా పూర్తిగా చేతులెత్తేయడంతో 33 పరుగులకే 5 వికెట్లు కోల్పోయిన పరిస్థితి తలెత్తింది. చివరికి ట్రావిస్ హెడ్ (17), అలెక్స్ కేరీ (19 నాటౌట్), పాట్ కమ్మిన్స్ (22) పోరాడటంతో 89 పరుగుల వద్ద ఇన్నింగ్స్‌ను ముగించారు.
ఇక భారత్, గెలుపు కోసం చివరి ఇన్నింగ్స్‌లో 275 పరుగులు చేధించాలి. ప్రస్తుతం టీమిండియా ఓపెనర్లు యశస్వి జైస్వాల్ (4), కేఎల్ రాహుల్ (0) పరుగులతో క్రీజ్‌లో ఉన్నారు. ఒక్కసారిగా వర్షం రావడంతో మ్యాచ్ డ్రాగా ముగిసింది.
