మేడ్చల్ మల్కాజిగిరి జిల్లా ఘట్‌కేసర్‌లోని ఆదర్శ్ బార్ అండ్ రెస్టారెంట్‌లో రెస్టారెంట్ నిర్వాహకుల నిర్లక్ష్యం మరొకసారి బయటపడింది. బిర్యానీ తినేందుకు రెస్టారెంట్‌కి వెళ్లిన కస్టమర్లు అక్కడ అనూహ్య అనుభవాన్ని ఎదుర్కొన్నారు. బిర్యానీ ఆర్డర్ ఇచ్చి, వేడివేడి బిర్యానీ అందుకోవడంతో ఉత్సాహంగా తినేందుకు సిద్ధమైన కస్టమర్లకు ఆహారంలో చికెన్ పీసులు కాకుండా బ్లేడ్ ముక్క కనిపించడం కలకలం రేపింది.
బిర్యానీలో బ్లేడ్ కనిపించడంతో కస్టమర్లు అవాక్కయ్యారు. కస్టమర్ దీనిపై రెస్టారెంట్ సిబ్బందిని ప్రశ్నించగా, వారు నిర్లక్ష్యంగా స్పందిస్తూ “బ్లేడ్ తీసేసి తినండి” అని చెప్పడం వినడం వారి కోపాన్ని మరింత పెంచింది. తీవ్ర ఆగ్రహంతో కస్టమర్ ఘట్‌కేసర్ పోలీస్ స్టేషన్‌లో ఫిర్యాదు చేశారు.
ఈ ఘటనలో బాధితుడు యాదాద్రి భువనగిరి జిల్లా బీబీనగర్ మండలం మక్త అనంతారం గ్రామానికి చెందిన బింగి ఐలయ్య. అతడి స్నేహితులతో కలిసి ఆదర్శ్ రెస్టారెంట్‌లో బిర్యానీ ఆర్డర్ చేసినప్పుడు, ఈ ఘటన జరిగింది. తన ప్లేట్‌లో బ్లేడ్ కనిపించడంతో షాక్‌కు గురైన ఐలయ్య వెంటనే రెస్టారెంట్ సిబ్బందిపై ప్రశ్నలు సంధించాడు. కానీ యాజమాన్యం నిర్లక్ష్యంగా స్పందించడంతో బాధితుడు పోలీసులకు ఫిర్యాదు చేయాల్సి వచ్చింది.
ఇలాంటి సంఘటనలు చప్పట్లు తగలడం ఒక్కటే కాదు. ఇంతకుముందు కూడా రెస్టారెంట్లలో బిర్యానీలో జెర్రిలు, బల్లులు, బొద్దింకలు, టాబ్లెట్లు కనిపించిన ఘటనలు వెలుగుచూశాయి. ఈ తరహా దుస్థితులు ప్రజల్లో తీవ్ర ఆందోళన కలిగిస్తున్నాయి. బయట బిర్యానీ తినాలంటేనే ప్రజలు ఆలోచనలో పడుతున్నారు.
