ప్రతి ఎన్నికా తమ ప్రభుత్వ పనితీరుకు పరీక్షేనని పేర్కొన్నారు ముఖ్యమంత్రి రేవంత్ రెడ్డి. ఈ మేరకు జూబ్లీహిల్స్ ఉప ఎన్నికల నేపథ్యంలో తన కార్యాలయంలో ఆయన శుక్రవారం విలేకరుల సమావేశం నిర్వహించారు. ఈ సందర్భంగా సీఎం రేవంత్ మాట్లాడుతూ, కేంద్ర మంత్రి కిషన్ రెడ్డి, మాజీ మంత్రి కేటీఆర్‌లపై తీవ్ర విమర్శలు గుప్పించారు. వారిద్దరినీ ‘అభివృద్ధి నిరోధకులు’గా అభివర్ణించారు.
కేటీఆర్, కిషన్ రెడ్డిలపై విమర్శలు:
ప్రాజెక్టులకు అడ్డంకులు: కాంగ్రెస్ ప్రభుత్వం రూ.43 వేల కోట్లతో మెట్రో విస్తరణ, రీజినల్‌ రింగురోడ్డు, 20 టీఎంసీల గోదావరి జలాల తరలింపు వంటి కీలక ప్రాజెక్టుల ప్రతిపాదనలను కేంద్రానికి సమర్పిస్తే, కిషన్ రెడ్డి, కేటీఆర్ సమన్వయంతో వాటిని అడ్డుకుంటున్నారని సీఎం ఆరోపించారు. వారిద్దరూ కలిసి ప్రాజెక్టులను ఆపడానికే సమన్వయం చేసుకుంటున్నారని, తెలంగాణపై ఎందుకింత కక్ష అని ప్రశ్నించారు.
గత ప్రభుత్వాల పాలనపై పోలిక: 2004-14 కాంగ్రెస్ పాలన, 2014-23 నాటి బీఆర్ఎస్-బీజేపీ పాలనను పోల్చి చూడాలని సీఎం కోరారు. హైదరాబాద్‌లో అంతర్జాతీయ విమానాశ్రయం, మెట్రో రైలు, నాలెడ్జ్‌ సెంటర్స్‌, ఐటీ, ఫార్మా పరిశ్రమల వృద్ధికి కాంగ్రెస్ బీజం వేసిందని తెలిపారు.
అభివృద్ధి నిరోధం: ఏఐబీపీ ప్రాజెక్టులు, ఐటీఐఆర్‌ రాకుండా అడ్డుకున్నది, మూడేళ్లపాటు మెట్రో ప్రాజెక్టును ఆపి ఎల్‌అండ్‌టీ నష్టపోవడానికి కారణం బీఆర్ఎస్, బీజేపీ కాదా అని ప్రశ్నించారు. హైదరాబాద్ వరదల్లో మునిగితే కేంద్రం నుంచి చిల్లిగవ్వ కూడా కిషన్ రెడ్డి ఎందుకు తీసుకురాలేదని నిలదీశారు.
ప్రగతి భవన్, సచివాలయం: బీఆర్ఎస్ పాలనలో రాష్ట్రానికి వచ్చిన రూ.20 లక్షల కోట్ల ఆదాయాన్ని కేసీఆర్ ఎందుకు ఖర్చుపెట్టారో చెప్పాలని, రాష్ట్రానికి రూ.8.11 లక్షల కోట్ల అప్పు మిగిల్చారని విమర్శించారు. కేవలం కుమారుడిని సీఎం చేయాలనే కారణంతో పాత సచివాలయాన్ని కూల్చి కొత్తది కట్టారని, దేవాలయాన్ని, మసీదును కూలగొట్టినప్పుడు కిషన్ రెడ్డి ఎందుకు మాట్లాడలేదని ప్రశ్నించారు. ప్రగతి భవన్ కేసీఆర్ సేద తీరడానికే ఉపయోగపడిందే తప్ప, ప్రజలకు ఎలాంటి ప్రయోజనం లేదన్నారు.
బీఆర్ఎస్-బీజేపీ ఫెవికాల్ బంధం:
సమన్వయం: భారత రాష్ట్ర సమితి (బీఆర్ఎస్), భారతీయ జనతా పార్టీ (బీజేపీ) మధ్య ‘ఫెవికాల్ బంధం’ ఉందని రేవంత్ రెడ్డి ఆరోపించారు. లోక్‌సభ ఎన్నికల్లో 8 సీట్లలో బీఆర్ఎస్ డిపాజిట్‌ కోల్పోయి బీజేపీని గెలిపించిందని, ఇప్పుడు దానికి ‘థ్యాంక్స్‌ గివింగ్‌’ విధానంలో కిషన్ రెడ్డి బీఆర్‌ఎస్‌కు మద్దతిస్తున్నారని విమర్శించారు.
కాళేశ్వరంపై విచారణ: కాళేశ్వరం అవినీతి కేసును సెప్టెంబరు 1న సీబీఐకి అప్పగించినా, ఈ కేసు ముందుకు కదలడం లేదంటే దానికి కిషన్ రెడ్డి కప్పిపుచ్చుతున్నారనేగా అర్థమని సీఎం సూటిగా ప్రశ్నించారు.
ఆర్థిక పరిస్థితి, సంక్షేమం:
ఆర్థిక సమస్యలు: రాష్ట్ర ప్రభుత్వానికి నెలకు రూ.18,500 కోట్ల ఆదాయం వస్తుంటే, అందులో రూ.13,000 కోట్లు జీతాలు, పెన్షన్లు, వడ్డీలకే పోతుందని, మిగిలిన రూ.5 వేల కోట్లతో ఎవరికి, ఏమి ఇవ్వాలాని నిత్యం తలబద్దలు కొట్టుకుంటున్నామని ఆయన ఆవేదన వ్యక్తం చేశారు.
మెట్రో ఘనత: జీరో పెట్టుబడితో రూ.35 వేల కోట్ల ఆస్తులను (మెట్రో) రాష్ట్ర ప్రభుత్వానికి సాధించి పెట్టినట్లు సీఎం తెలిపారు.
ఫీజు రీయింబర్స్మెంట్, డ్రగ్స్
బ్లాక్మెయిల్ సరికాదు: రూ.3,600 కోట్ల ఫీజు రీయింబర్స్మెంట్ బకాయిలను విడతల వారీగా విడుదల చేస్తామని, బకాయిలు విడుదల చేయలేదని కాలేజీలను బంద్‌ పెట్టి ప్రభుత్వాన్ని బ్లాక్మెయిల్ చేయొద్దని యాజమాన్యాలను హెచ్చరించారు. విద్య అనేది వ్యాపారం కాదని, విద్యార్థుల జీవితాలతో చెలగాటం ఆడవద్దని కోరారు.
డ్రగ్స్ చట్టం: డ్రగ్స్ చట్టంలో సవరణలు చేయాల్సిన అవసరం ఉందని, గంజాయి, కొకైన్‌ వాడిన వారికి బాధితుల కింద బెయిల్‌ ఇవ్వడంపై వచ్చే అసెంబ్లీ సమావేశాల్లో చర్చిస్తామని తెలిపారు.
