జూబ్లీహిల్స్ నియోజకవర్గ ఉపఎన్నిక నామినేషన్ల స్క్రూటినీ ప్రక్రియ బుధవారం పూర్తయింది. దాదాపు 17 గంటల పాటు సాగిన ఈ ప్రక్రియలో మొత్తం 211 మంది అభ్యర్థులు దాఖలు చేసిన 321 నామినేషన్లను అధికారులు పరిశీలించారు. చివరికి 81 మంది అభ్యర్థులు దాఖలు చేసిన 135 నామినేషన్లకు రిటర్నింగ్ అధికారి ఆమోదం తెలిపారు.
వివిధ సాంకేతిక, చట్టపరమైన కారణాలతో 130 మంది అభ్యర్థులు దాఖలు చేసిన 186 నామినేషన్లు తిరస్కరించబడ్డాయి. రేపు (శుక్రవారం) నామినేషన్ల ఉపసంహరణకు చివరి తేదీగా అధికారులు ప్రకటించారు. దీంతో, కొంతమంది అభ్యర్థులు పోటీ నుంచి తప్పుకునే అవకాశం ఉన్నట్లు రాజకీయ వర్గాలు చెబుతున్నాయి. రేపటితో ఉపఎన్నికల తుది పోటీదారుల జాబితాపై ఒక స్పష్టత రానుంది.
ఆగస్టు 13 నుంచి ప్రారంభమైన నామినేషన్ల ప్రక్రియ ఈనెల 21న ముగిసింది. ఈ క్రమంలో జూబ్లీహిల్స్ ఉపఎన్నిక రికార్డు సృష్టించింది, ఎందుకంటే చివరి రోజు మాత్రమే 170కి పైగా నామినేషన్లు దాఖలయ్యాయి. ముఖ్యంగా ఆర్‌ఆర్‌ఆర్ బాధితులు, నిరుద్యోగ జేఏసీ నేతలు పెద్ద ఎత్తున బరిలోకి దిగడం విశేషం.
మరోవైపు ప్రధాన రాజకీయ పార్టీల అభ్యర్థులైన బీఆర్‌ఎస్ అభ్యర్థి మాగంటి సునీత, కాంగ్రెస్ అభ్యర్థి నవీన్ యాదవ్, బీజేపీ అభ్యర్థి లంకల దీపక్ రెడ్డి నామినేషన్లు స్క్రూటినీ ప్రక్రియలో ఆమోదం పొందడంతో చివరకు వివాదాలకు ముగింపు లభించింది. నవంబర్ 11న పోలింగ్ జరుగగా, నవంబర్ 14న ఓట్ల లెక్కింపు మరియు ఫలితాల ప్రకటన జరగనుంది.
