హైదరాబాద్ నగరాన్ని భారీ ఆర్థిక మోసం కుదిపేసింది. ఫాల్కన్ ఇన్వాయిస్ డిస్కౌంటింగ్ పేరుతో నకిలీ పెట్టుబడి స్కీమ్‌ను నడిపించి, ప్రజలను ఆకర్షించి, కోట్లాది రూపాయలను వసూలు చేసి చివరికి మోసం చేసిన ఘటన వెలుగులోకి వచ్చింది. ఈ స్కామ్‌లో 6,979 మంది పెట్టుబడిదారులు తమ జీవితకాల సంపాదనను పెట్టి మోసపోయారు. మొత్తం రూ.1,700 కోట్ల వరకు డిపాజిట్లు సేకరించిన ఈ సంస్థ, చివరకు కేవలం రూ.850 కోట్లు మాత్రమే మళ్లించి మిగతా మొత్తంతో ఊడాయించినట్లు అధికారులు గుర్తించారు.
ఫాల్కన్ ఇన్వాయిస్ డిస్కౌంటింగ్ స్కీమ్‌ను 2021లో క్యాపిటల్ ప్రొటెక్షన్ ఫోర్స్ ప్రైవేట్ లిమిటెడ్ అనే కంపెనీ ద్వారా అమలులోకి తెచ్చారు. ఈ కంపెనీ పెట్టుబడులపై ఆకర్షణీయమైన వడ్డీ రేట్లను హామీ ఇస్తూ, ప్రజలను మోసగించేందుకు ప్రత్యేకంగా మొబైల్ యాప్, వెబ్‌సైట్‌ను రూపొందించింది. ₹25,000 నుంచి ₹9 లక్షల వరకు డిపాజిట్ చేస్తే, 45 నుంచి 180 రోజుల వ్యవధిలో 11% నుంచి 22% వడ్డీ లభిస్తుందని నమ్మబలికారు. ఈ స్కీమ్ ప్రారంభ దశలో కొన్ని చెల్లింపులు జరిపి, పెట్టుబడిదారుల నమ్మకాన్ని పొందారు. అనంతరం కొత్త డిపాజిట్లను తీసుకుంటూ, పాత డిపాజిటర్లకు చెల్లింపులు కొనసాగించారు. ఇది నిజానికి పోంజీ స్కీమ్ మాదిరిగా పనిచేసింది. చివరికి డిపాజిట్లు నిలిపివేసి జనవరి 15, 2025 నాటికి ఆఫీస్ మూసివేసి, నిర్వాహకులు పరారయ్యారు.
దర్యాప్తులో, నిందితులు వసూలు చేసిన డబ్బును 14 షెల్ కంపెనీలకు మళ్లించినట్లు గుర్తించారు. బ్రిటానియా, అమెజాన్, గోద్రేజ్ వంటి ప్రముఖ కంపెనీలతో సంబంధాలు ఉన్నట్లు నమ్మబలికి పెట్టుబడిదారులను ఆకర్షించారు. కానీ, వీటిలో ఎలాంటి నిజమైన లావాదేవీలు జరగలేదని పోలీసుల విచారణలో వెల్లడైంది. సైబరాబాద్ ఆర్థిక నేర విభాగం ఈ భారీ మోసాన్ని వెలికితీసి, కేసు నమోదు చేసింది. ప్రస్తుతానికి ఫాల్కన్ క్యాపిటల్ ప్రొటెక్షన్ ఫోర్స్ డైరెక్టర్ కావ్య నల్లూరి, వైస్ ప్రెసిడెంట్ పవన్ కుమార్ ఓదెలను పోలీసులు అరెస్టు చేశారు. ఈ కేసులో మొత్తం 20 మందిని నిందితులుగా చేర్చారు. ప్రధాన నిందితుడు అమర్‌దీప్ కుమార్ ఇంకా పరారీలో ఉన్నాడు.
దర్యాప్తులో, నిందితులు గతంలోనూ బ్లూ లైఫ్ ఇంటర్నేషనల్ అనే మరో కంపెనీ పేరిట చైన్ మాల్ స్కీమ్ మోసం చేసినట్లు తేలింది. వారు ఇదే తరహా పోంజీ స్కీమ్‌తో ప్రజలను మోసం చేసి కోట్లాది రూపాయలు దండుకున్నట్లు గుర్తించారు.
తమ జీవితకాల సంపాదన పోయిందని బాధితులు తీవ్ర ఆవేదన వ్యక్తం చేస్తున్నారు. ఈ స్కామ్ వల్ల దాదాపు 7,000 మంది పెట్టుబడిదారులు తీవ్రంగా నష్టపోయారు. పోలీసులు నిందితుల ఆస్తులను సీజ్ చేసి, సొమ్మును తిరిగి రికవరీ చేసే చర్యలు చేపట్టారు. ఈ ఘటనతో ఇన్వాయిస్ డిస్కౌంటింగ్, హై రిటర్న్ ఇన్వెస్ట్‌మెంట్ స్కీమ్స్‌పై ప్రజలు మరింత అప్రమత్తంగా ఉండాలని నిపుణులు హెచ్చరిస్తున్నారు. ప్రభుత్వ మౌలిక సంస్థలు ఇలాంటి మోసాలపై ముందుగానే అవగాహన కల్పించి, ప్రజలను అప్రమత్తం చేయాల్సిన అవసరం ఉందని ఆర్థిక నిపుణులు సూచిస్తున్నారు.
