పూల సుబ్బయ్య వెలిగొండ ప్రాజెక్ట్ తొలి దశ ప్రారంభోత్సవం సందర్భంగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు కీలక ప్రకటన చేశారు. 2028 నాటికి వెలిగొండ ప్రాజెక్ట్ ఫేజ్-2 పనులను పూర్తి చేస్తామని ఆయన స్పష్టం చేశారు. ఉమ్మడి ప్రకాశం జిల్లాలో జరిగిన బహిరంగ సభలో ప్రజలనుద్దేశించి మాట్లాడిన సీఎం, దశాబ్దాలుగా కరవు, ఫ్లోరైడ్ సమస్యలతో ఇబ్బందులు పడుతున్న మార్కాపురం ప్రాంత ప్రజల జీవితాల్లో వెలిగొండ ప్రాజెక్టు కొత్త వెలుగులు నింపుతుందని అన్నారు.
కృష్ణా జలాలతో కరవుకు ముగింపు
వెలిగొండ ప్రాజెక్టు ద్వారా మార్కాపురం ప్రాంతానికి కృష్ణా జలాలను తీసుకురావడం చారిత్రాత్మక ఘట్టమని సీఎం చంద్రబాబు పేర్కొన్నారు. “కృష్ణమ్మను తీసుకొచ్చాం.. కరవును తరిమికొట్టాం.. వెలిగొండకు జలసిరులు, అభివృద్ధికి రెక్కలు” అని వ్యాఖ్యానించారు. వెలిగొండ నిజంగానే బంగారు కొండ అని అభివర్ణించిన ఆయన, ప్రాజెక్టులో 53 టీఎంసీల వరకు నీటిని నిల్వ చేసుకునే అవకాశం ఉందని తెలిపారు.
శంకుస్థాపన నుంచి ప్రారంభోత్సవం వరకు
1996లో తానే వెలిగొండ ప్రాజెక్టుకు శంకుస్థాపన చేశానని చంద్రబాబు గుర్తు చేసుకున్నారు. ఇప్పుడు మళ్లీ తన చేతుల మీదుగానే తొలి దశను ప్రారంభించి జాతికి అంకితం చేయడం ఎంతో సంతోషంగా ఉందన్నారు. ప్రధాని నరేంద్ర మోదీ సహకారం, ఉప ముఖ్యమంత్రి పవన్ కల్యాణ్ సహకారంతో ఈ ప్రతిష్ఠాత్మక ప్రాజెక్టును ముందుకు తీసుకెళ్లగలిగామని తెలిపారు.
రైతులు తమ భూములను త్యాగం చేయడం వల్లే లక్షలాది మంది జీవితాల్లో మార్పు తీసుకురావడం సాధ్యమైందని పేర్కొన్నారు. ప్రాజెక్టు కోసం భూములు ఇచ్చిన ప్రతి రైతుకు పాదాభివందనం చేస్తున్నట్లు సీఎం ప్రకటించారు.
రూ.7,983 కోట్లతో తొలి దశ పూర్తి
వెలిగొండ ప్రాజెక్టు తొలి దశను సుమారు రూ.7,983 కోట్ల వ్యయంతో పూర్తి చేశామని సీఎం చంద్రబాబు తెలిపారు. నిర్వాసితుల పునరావాసం, పరిహారం విషయంలో కూడా ప్రభుత్వం ప్రత్యేక శ్రద్ధ తీసుకుంటోందని చెప్పారు. లబ్ధిదారులతో పాటు ప్రాజెక్టు నిర్వాసితులు కూడా సంతోషంగా ఉండాలన్నదే ప్రభుత్వ లక్ష్యమని స్పష్టం చేశారు.
నిర్వాసితులకు పరిహారం, పునరావాస సదుపాయాలు అందించడంతో పాటు అర్హులైన వారికి రూ.2 లక్షల ఆర్థిక సాయం కూడా అందిస్తున్నామని పేర్కొన్నారు. నిర్వాసితులకు ఎలాంటి అన్యాయం జరగకుండా అన్ని సమస్యలను పరిష్కరిస్తామని హామీ ఇచ్చారు.
2028 నాటికి ఫేజ్-2 పూర్తి లక్ష్యం
వెలిగొండ ప్రాజెక్టు పూర్తి ప్రయోజనాలు అందాలంటే రెండో దశ పనులు కూడా త్వరగా పూర్తి కావాల్సి ఉందని సీఎం తెలిపారు. ఈ నేపథ్యంలో 2028 నాటికి వెలిగొండ ప్రాజెక్ట్ ఫేజ్-2ను పూర్తి చేసి ప్రజలకు అందుబాటులోకి తీసుకువస్తామని చంద్రబాబు ప్రకటించారు. ప్రాజెక్టు ద్వారా రాయలసీమ, ప్రకాశం ప్రాంతాల్లో సాగు, తాగునీటి అవసరాలను తీర్చడమే కాకుండా వ్యవసాయ రంగానికి కొత్త ఊపు వస్తుందని ఆయన అన్నారు.
పోలవరం పూర్తి.. నదుల అనుసంధానమే లక్ష్యం
పుష్కరాలకు ముందే పోలవరం ప్రాజెక్టును కూడా జాతికి అంకితం చేయాలన్న లక్ష్యంతో ప్రభుత్వం పనిచేస్తోందని సీఎం చంద్రబాబు తెలిపారు. అనంతరం మార్కాపురంలో కృష్ణా పుష్కరాలు నిర్వహించాలని ఆకాంక్షించారు. దేశంలో నదుల అనుసంధానం అత్యంత అవసరమని పేర్కొన్న ఆయన, గోదావరి, కృష్ణా, తుంగభద్ర, పెన్నా, కావేరి నదులను అనుసంధానం చేస్తే నాలుగు రాష్ట్రాల్లో వ్యవసాయం మరింత సుసంపన్నం అవుతుందని చెప్పారు.
వెలిగొండ తొలి దశ ప్రారంభంతో ఒక చారిత్రాత్మక అధ్యాయం ప్రారంభమైందని, 2028 నాటికి రెండో దశను పూర్తి చేసి ఈ ప్రాంత అభివృద్ధికి మరింత వేగం తీసుకువస్తామని సీఎం చంద్రబాబు నాయుడు స్పష్టం చేశారు.
