టీసీఎస్, కాగ్నిజెంట్ వంటి ప్రముఖ సంస్థలకు ఎకరా 99 పైసలకు భూములివ్వడం తప్పా..? అని ప్రశించారు మంత్రి నారా లోకేష్. ఆంధ్రప్రదేశ్ అసెంబ్లీ బడ్జెట్ సమావేశాల సందర్భంగా ఆయన ప్రతిపక్ష వైఎస్సార్ కాంగ్రెస్ పార్టీ (YSRCP) పై తీవ్ర స్థాయిలో విమర్శలు గుప్పించారు. శాసనమండలి వేదికగా జరిగిన చర్చలో ఆయన మాట్లాడుతూ.. వైసీపీ నేతలు సభను బహిష్కరించి ప్రజాస్వామ్యాన్ని అపహాస్యం చేస్తున్నారని ఆరోపించారు. బుధవారం (ఫిబ్రవరి 12, 2026) జరిగిన ఈ పరిణామాలు రాష్ట్ర రాజకీయాల్లో కలకలం రేపాయి.
ముఖ్యాంశాలు:
వైసీపీ వాకౌట్పై లోకేష్ ఫైర్: వైసీపీ సభ్యులు సభలో చర్చించడానికి భయపడుతున్నారని నారా లోకేష్ వ్యాఖ్యానించారు. “అసెంబ్లీకి వచ్చి వాకౌట్ చేసి పారిపోవడం వారి నైజంగా మారింది. ప్రజల సమస్యల గురించి మాట్లాడే దమ్ము లేకనే, నిరసనల పేరుతో డ్రామాలు ఆడుతున్నారు” అని ఆయన విమర్శించారు. వైసీపీ పాలనలో రాష్ట్రం అప్పుల ఊబిలో కూరుకుపోయిందని, ఇప్పుడు కూటమి ప్రభుత్వం దానిని సరిదిద్దేందుకు ప్రయత్నిస్తుంటే అడ్డుకోవాలని చూస్తున్నారని ఆరోపించారు.
ప్రజాస్వామ్యాన్ని కాపాడాలని పిలుపు: సభలో చర్చకు హాజరు కాకుండా, వెలుపల మీడియాతో మాట్లాడటం బాధ్యతారాహిత్యం అని లోకేష్ పేర్కొన్నారు. తమ ప్రభుత్వ హయాంలో ప్రతిపక్షానికి మాట్లాడే అవకాశం ఇస్తున్నామని, కానీ వైసీపీ సభ్యులు దానిని సద్వినియోగం చేసుకోకుండా ప్రజలను తప్పుదోవ పట్టిస్తున్నారని అన్నారు. ప్రజాస్వామ్య విలువలను కాపాడాల్సిన బాధ్యత ప్రతి ఒక్కరిపై ఉందని, చర్చల ద్వారానే పరిష్కారాలు లభిస్తాయని ఆయన స్పష్టం చేశారు.
అభివృద్ధిపై కూటమి ప్రభుత్వ దృష్టి: కూటమి ప్రభుత్వం రాష్ట్ర అభివృద్ధిపైనే దృష్టి పెట్టిందని లోకేష్ హామీ ఇచ్చారు. ముఖ్యంగా అమరావతి నిర్మాణ పనులు, నిరుద్యోగ యువతకు ఉపాధి కల్పన వంటి అంశాలను ప్రస్తావించారు. రాబోయే రోజుల్లో రాష్ట్ర ఆర్థిక పరిస్థితి మెరుగుపడుతుందని, ప్రజలకు మెరుగైన పాలన అందిస్తామని ఆయన పేర్కొన్నారు.
అన్ని సంస్థలకు ఎకరా 99 పైసలకే భూములు కెయటించలేదని, ముందుగా రాష్ట్రానికి వచ్చిన క్రెడిబులిటీ ఉన్న ఐదు సంస్థలకే ఆ ఆఫర్ ఇచ్చామని, తద్వారా వేలాదిమందికి ఉద్యోగ అవకాశాలు కల్పించామని మంత్రి లోకేష్ స్పష్టం చేశారు. వైసీపీ నేతలు చేస్తున్న నిరాధారమైన ఆరోపణలను ప్రజలు నమ్మరని ఆయన ధీమా వ్యక్తం చేశారు.
తొలిరోజే మాటల యుద్ధం..
నారా లోకేష్ విమర్శలు అధికార మరియు ప్రతిపక్షాల మధ్య దూరాన్ని మరింత పెంచాయి. బడ్జెట్ సమావేశాల తొలిరోజు నుండే ఈ మాటల యుద్ధం కొనసాగుతోంది. వైసీపీ సభ్యులు సభలో ఉండాలా లేక బహిష్కరించాలా అనే సందిగ్ధంలో ఉన్నట్లు కనిపిస్తోంది. ఈ పరిణామం అసెంబ్లీ సమావేశాల సరళిపై ప్రభావం చూపే అవకాశం ఉంది.
