ముఖ్యమంత్రి రేవంత్ రెడ్డి నాయకత్వంలో హైదరాబాద్ మెట్రో రైలు ప్రాజెక్టును ప్రభుత్వం స్వాధీనం చేసుకునే ప్రక్రియలో అత్యంత కీలక ఘట్టం ఆవిష్కృతమైంది. శనివారం తెలంగాణ శాసనసభలో మెట్రో రైలు స్వాధీనానికి సంబంధించిన తీర్మానాన్ని సీఎం స్వయంగా ప్రవేశపెట్టగా, సభ దీనికి ఆమోదం తెలిపింది. ఈ నెల 31 నుంచి మెట్రో రైలు నిర్వహణ బాధ్యతలను ప్రభుత్వం పూర్తిస్థాయిలో చేపట్టనుంది.
మెట్రో విస్తరణను వేగవంతం చేసేందుకే ఈ స్వాధీన నిర్ణయం తీసుకున్నామని, ఇందుకు కేంద్ర ప్రభుత్వం కూడా సహకరించాలని ముఖ్యమంత్రి ఈ సందర్భంగా కోరారు. గత కొంతకాలంగా నష్టాలతో సతమతమవుతున్న ఎల్అండ్టీ సంస్థ నిర్వహణ నుంచి తప్పుకుంటామని చేసిన విజ్ఞప్తి మేరకు ప్రభుత్వం ఈ సాహసోపేత నిర్ణయం తీసుకుంది.
అయితే మెట్రో స్వాధీన తీర్మానం ఆమోదించిన తీరుపై ప్రతిపక్షం తీవ్ర అసహనం వ్యక్తం చేసింది. అసెంబ్లీలో తీర్మానాలను ఏకపక్షంగా ఆమోదించడం సరికాదని మాజీ మంత్రి, ఎమ్మెల్యే హరీష్ రావు మండిపడ్డారు. మెట్రో తీర్మానంపై సభలో తగిన చర్చ జరగలేదని, ఇది ఏకగ్రీవం కాదు.. కేవలం ఏకపక్ష ఆమోదం మాత్రమేనని ఆయన విమర్శించారు. ఇదే సమయంలో మైనింగ్ శాఖలో జరుగుతున్న అక్రమాలపై కూడా ఆయన ధ్వజమెత్తారు.
ఖనిజాల ద్వారా వచ్చే ఆదాయం పెరుగుతున్నా, శాఖలో అక్రమాలు చోటుచేసుకుంటున్నాయని ఆధారాలతో సహా ఆరోపించారు. రాష్ట్రానికి వచ్చే ప్రతి రూపాయిని కాపాడుకోవాల్సిన బాధ్యత ప్రభుత్వంపై ఉందని ఆయన గుర్తుచేశారు. ఎల్అండ్టీ సంస్థకు సంబంధించిన ఆర్థిక లావాదేవీల విషయంలో ప్రభుత్వం స్పష్టమైన హామీ ఇచ్చింది. సంస్థ వివిధ బ్యాంకుల నుండి తీసుకున్న సుమారు రూ. 13 వేల కోట్ల రుణంతో పాటు, రూ. 2 వేల కోట్ల ఈక్విటీ వాటాను చెల్లించేందుకు ప్రభుత్వం అంగీకరించింది.
ఈ ఒప్పందం తర్వాతే మెట్రో నిర్వహణ మార్పు లేకుండా ప్రభుత్వ పర్యవేక్షణలోకి రానుంది. సుదీర్ఘ చర్చల అనంతరం కుదిరిన ఈ ఒప్పందం ప్రకారం, ప్రయాణికులకు ఎలాంటి ఇబ్బందులు కలగకుండా మెట్రో సేవలు యథావిధిగా కొనసాగనున్నాయి. ప్రభుత్వ నిర్వహణలోకి వచ్చిన తర్వాత మెట్రో విస్తరణ ప్రాజెక్టులు మరింత వేగంగా ముందుకు సాగుతాయని ప్రభుత్వం భావిస్తోంది.
హైదరాబాద్ రవాణా వ్యవస్థలో కీలకమైన మెట్రో రైలు ప్రభుత్వ పరమవ్వడం ఒక చారిత్రక పరిణామం కాగా, దీని నిర్వహణ మరియు విస్తరణ భవిష్యత్తులో ఏ తీరుగా ఉండబోతుందనేది ఆసక్తికరంగా మారింది.
