ఆంధ్రప్రదేశ్లో వచ్చే ఏడాది జరగనున్న గోదావరి పుష్కరాలను ఘనంగా నిర్వహించేందుకు ప్రభుత్వం భారీ స్థాయిలో ఏర్పాట్లు చేస్తోంది. ఈ మేరకు ముఖ్యమంత్రి నారా చంద్రబాబు నాయుడు అమరావతి సచివాలయంలో దేవాదాయ, పట్టణాభివృద్ధి, జలవనరుల శాఖల మంత్రులు, ఉన్నతాధికారులతో సమీక్ష నిర్వహించారు. జూన్ 26 నుంచి జూలై 7 వరకు 12 రోజుల పాటు జరిగే పుష్కరాల్లో భక్తులకు ఎలాంటి ఇబ్బందులు లేకుండా విస్తృత సౌకర్యాలు కల్పించాలని అధికారులను ఆదేశించారు.
రూ.4,026 కోట్లతో భారీ మౌలిక వసతులు
గోదావరి జన్మస్థానం నుంచి సముద్రంలో కలిసే వరకు నది ప్రాశస్త్యాన్ని ప్రతిబింబించేలా పుష్కరాలను ‘అఖండ గోదావరి’ పేరుతో నిర్వహించే అంశాన్ని పరిశీలించాలని సీఎం సూచించారు.
పుష్కరాల కోసం మొత్తం రూ.4,026 కోట్ల అంచనా వ్యయంతో 4,932 పనులు చేపట్టనున్నట్లు సమీక్షలో వెల్లడైంది. భక్తుల రద్దీని దృష్టిలో ఉంచుకుని 181 కొత్త ఘాట్లను నిర్మించడంతో పాటు 259 పాత ఘాట్లను ఆధునీకరించనున్నారు. దీంతో మొత్తం 440 ఘాట్లను భక్తులకు అందుబాటులోకి తీసుకురావాలని ప్రభుత్వం లక్ష్యంగా పెట్టుకుంది.
దేశ, విదేశాల నుంచి సుమారు 8 నుంచి 10 కోట్ల మంది భక్తులు వచ్చే అవకాశం ఉన్నందున వారికి ప్రపంచస్థాయి సౌకర్యాలు అందేలా ఏర్పాట్లు చేయాలని చంద్రబాబు అధికారులను ఆదేశించారు.
పుణ్యక్షేత్రాలను కలుపుతూ ప్రత్యేక టూరిజం సర్క్యూట్
గోదావరి పుష్కరాలను ఆధ్యాత్మికతతో పాటు పర్యాటక రంగానికి కూడా ఉపయోగపడేలా ప్రణాళికలు రూపొందించాలని సీఎం సూచించారు. పిఠాపురం శక్తిపీఠం, పంచారామాలు, అన్నవరం, అంతర్వేది తదితర ప్రముఖ పుణ్యక్షేత్రాలను అనుసంధానిస్తూ ప్రత్యేక పర్యాటక సర్క్యూట్ను అభివృద్ధి చేయాలని ఆదేశించారు.
రాజమహేంద్రవరంలో కన్వెన్షన్ సెంటర్ నిర్మాణంతో పాటు హేవ్లాక్ బ్రిడ్జి పరిసరాల అభివృద్ధి పనులను వేగవంతం చేయాలని సూచించారు.
ఆరు జిల్లాల్లో రోడ్ల అభివృద్ధి
పుష్కరాలకు వచ్చే భక్తులకు రవాణా పరంగా ఇబ్బందులు లేకుండా గోదావరి పరివాహక ప్రాంతంలోని ఆరు జిల్లాల్లోని పుష్కర రహదారులను పూర్తిస్థాయిలో పునరుద్ధరించాలని సీఎం ఆదేశించారు. రోడ్లపై గుంతలు లేకుండా చర్యలు తీసుకోవడంతో పాటు ప్రధాన మార్గాల్లో మౌలిక వసతులను మెరుగుపరచాలని సూచించారు.
అదే సమయంలో గోదావరి నదిలోకి మురుగునీరు చేరకుండా కఠిన చర్యలు తీసుకోవాలని అధికారులను ఆదేశించారు. పుష్కరాల పవిత్రతను కాపాడటంతో పాటు పర్యావరణ పరిరక్షణకు ప్రాధాన్యం ఇవ్వాలని స్పష్టం చేశారు.
అన్ని శాఖలు సమన్వయంతో పనిచేయాలి
ఆధ్యాత్మికతకు ఆధునిక సాంకేతికతను జోడించి పుష్కరాలను విజయవంతంగా నిర్వహించాలని చంద్రబాబు సూచించారు. స్థానిక ప్రజల భాగస్వామ్యంతో పాటు అన్ని ప్రభుత్వ శాఖలు సమన్వయంతో పనిచేయాలని, నిర్దేశించిన గడువులోగా అభివృద్ధి పనులను పూర్తి చేయాలని ఆదేశించారు.
