అంతర్జాతీయ యోగా దినోత్సవం సందర్భంగా ఆంధ్రప్రదేశ్ ప్రభుత్వం ప్రతిష్టాత్మకంగా తలపెట్టిన ‘యోగాంధ్ర’ వేడుకలు రాష్ట్రవ్యాప్తంగా అత్యంత వైభవంగా జరిగాయి. విజయవాడలోని ఇందిరాగాంధీ మున్సిపల్ స్టేడియం వేదికగా శనివారం ఉదయం జరిగిన సామూహిక యోగా ప్రదర్శనలో ముఖ్యమంత్రి చంద్రబాబు నాయుడు మరియు నారా లోకేశ్ సహా పలువురు మంత్రులు పాల్గొన్నారు.
ప్రపంచ ప్రసిద్ధ యోగా గురు బాబా రామ్దేవ్ పర్యవేక్షణలో ఉదయం 5 గంటల నుంచే ఈ వేడుకలు ప్రారంభమయ్యాయి. స్టేడియానికి వేలాదిగా తరలివచ్చిన విద్యార్థులు, యువత, ప్రభుత్వ ఉద్యోగులు మరియు సాధారణ ప్రజలతో కలిసి ముఖ్యమంత్రి వివిధ ఆసనాలను సునాయాసంగా వేశారు. ఈ సామూహిక యోగా సాధన కార్యక్రమం ఆరోగ్యకరమైన ఆంధ్రప్రదేశ్ నిర్మాణానికి ఒక పటిష్టమైన సంకల్పాన్ని చాటింది.
టెక్నాలజీకి ఆధ్యాత్మికత తోడైతే అన్స్టాపబుల్: సీఎం చంద్రబాబు
ఈ సందర్భంగా ముఖ్యమంత్రి చంద్రబాబు నాయుడు ప్రసంగిస్తూ.. రోజుకో గంట పాటు యోగా, ధ్యానం, ప్రాణాయామం క్రమం తప్పకుండా చేస్తే ఎవరూ ఆసుపత్రికి వెళ్లాల్సిన అవసరమే రాదని స్పష్టం చేశారు. తాను గత 30 సంవత్సరాలుగా నిరంతరం యోగాభ్యాసం చేస్తున్నానని, ఎంతటి పని ఒత్తిడి ఉన్నప్పటికీ యోగా తనకు మానసిక ప్రశాంతతను, సరికొత్త శక్తిని ఇస్తుందని పంచుకున్నారు.
నేటి ఆధునిక తరం సాంకేతిక పరిజ్ఞానాన్ని (Technology) ఎంతగా అక్కున చేర్చుకుంటోందో.. అదే స్థాయిలో యోగాను, ఆధ్యాత్మికతను కూడా తమ జీవనశైలిలో అలవరుచుకోవాలని పిలుపునిచ్చారు. టెక్నాలజీకి ఆధ్యాత్మికత తోడైతే సమాజంలో తిరుగులేని ప్రగతి సాధించవచ్చని అభిప్రాయపడ్డారు.
రెండు వరల్డ్ బుక్ ఆఫ్ రికార్డ్స్ సాధించిన ఏపీ
రాష్ట్రవ్యాప్తంగా నిర్వహించిన ఈ మెగా యోగా డ్రైవ్లో మొత్తం 1.33 లక్షల కేంద్రాల పరిధిలో దాదాపు 1.07 కోట్ల మంది పౌరులు, 2.5 లక్షల మంది యోగా శిక్షకులు ఒకేసారి భాగస్వాములు కావడం ద్వారా సరికొత్త చరిత్ర సృష్టించారు. ఈ అసాధారణ భాగస్వామ్యానికి గుర్తింపుగా ఆంధ్రప్రదేశ్కు రెండు ప్రతిష్టాత్మక ‘వరల్డ్ బుక్ ఆఫ్ రికార్డ్స్’ లభించాయి.
ఈ అంతర్జాతీయ రికార్డుల ధ్రువీకరణ పత్రాలను ప్రతినిధులు వేదికపైనే ముఖ్యమంత్రి చంద్రబాబు నాయుడుకు అందజేశారు. గతేడాది విశాఖపట్నంలో నిర్వహించిన ‘యోగాంధ్ర-2025’ లో ప్రధాని నరేంద్ర మోదీ సమక్షంలో గిన్నిస్ రికార్డు సాధించామని గుర్తుచేసిన సీఎం, రాబోయే ఏడాది ఈ ఉత్సవాలను తిరుపతి వేదికగా అంతకంటే అద్భుతంగా నిర్వహిస్తామని ప్రకటించారు.
ఆగస్టు 15 నుంచి రాష్ట్రవ్యాప్తంగా ‘సంజీవని’ ప్రాజెక్ట్
ప్రజారోగ్య పరిరక్షణే ధ్యేయంగా ప్రభుత్వం తీసుకోబోయే నూతన విప్లవాత్మక నిర్ణయాలను ముఖ్యమంత్రి ఈ వేదికపై ఆవిష్కరించారు. రాష్ట్రంలోని స్వర్ణగ్రామ, స్వర్ణవార్డు సచివాలయాల పరిధిలో శాశ్వత యోగా మందిరాలను నిర్మిస్తామని, దీనికోసం ప్రత్యేక పోర్టల్ను కూడా తీసుకువస్తామని వెల్లడించారు.
ప్రజలకు వైద్య నిపుణులను మరింత చేరువ చేస్తూ, అందులో యోగాను ఒక భాగంగా చేర్చే ప్రతిష్టాత్మక ‘సంజీవని’ ప్రాజెక్టును రాబోయే ఆగస్టు 15 నుండి రాష్ట్రవ్యాప్తంగా అధికారికంగా అమలు చేయనున్నట్లు ప్రకటించారు. జంక్ ఫుడ్, ఫాస్ట్ ఫుడ్ను దూరంగా పెట్టి, ప్రకృతి వ్యవసాయం ద్వారా పండించిన రసాయన రహిత ఆహారాన్ని తీసుకోవడం ద్వారానే సంపూర్ణ ఆరోగ్యం సాధ్యమవుతుందని చంద్రబాబు నాయుడు పేర్కొన్నారు.
