ఆదిలాబాద్ జిల్లా చారిత్రక భూమి ఇంద్రవెల్లిలోని అమరవీరుల స్థూపం సమీపంలో తెలంగాణ రక్షణ సేన (టీఆర్‌ఎస్) అధినేత్రి కల్వకుంట్ల కవిత అధ్యక్షతన ‘పాంచజన్య సంకల్ప సభ’ వైభవంగా జరిగింది. ఈ భారీ బహిరంగ సభకు హాజరైన కవిత.. రాష్ట్రంలో అధికారంలో ఉన్న కాంగ్రెస్ ప్రభుత్వంతో పాటు ప్రతిపక్షంలో ఉన్న బీఆర్‌ఎస్, బీజేపీలపై నిప్పులు చెరిగారు.
చరిత్రలో తొలిసారిగా పంటలు వేయొద్దని చెప్పిన అసమర్థ ప్రధానిగా, ముఖ్యమంత్రిగా కాంగ్రెస్ ప్రభుత్వం నిలిచిందని తీవ్రస్థాయిలో ధ్వజమెత్తారు. తన ప్రసంగంలో ప్రధానంగా గిరిజనులు, రైతులు, కార్మికుల సమస్యలను లేవనెత్తిన కవిత, బీఆర్‌ఎస్ వర్కింగ్ ప్రెసిడెంట్ కేటీఆర్‌పై తీవ్ర విమర్శలు గుప్పించారు. ఆదిలాబాద్ ప్రజలకు ఏ ముఖం పెట్టుకుని వస్తారంటూ కేటీఆర్‌ను ప్రశ్నించారు.
రాష్ట్రంలో కరువు పరిస్థితులను తట్టుకుని రైతులకు సాగునీరు అందించాలంటే కన్నెపల్లి పంప్‌హౌస్ వద్ద కాఫర్ డ్యామ్‌ నిర్మించి ప్రాణహిత నీళ్లను మళ్లించాలని డిమాండ్ చేశారు. అలాగే రాబోయే దేశవ్యాప్త జనగణనలో బీసీలకు న్యాయం జరిగేలా ఓబీసీ కాలమ్‌ను తప్పనిసరిగా చేర్చాలని స్పష్టం చేశారు.
అటు కేంద్ర ప్రభుత్వం నిధులు ఇస్తున్నప్పటికీ జాతీయ ఆరోగ్య మిషన్ (ఎన్‌హెచ్‌ఎం) ఉద్యోగుల జీతాల్లో కోతలు విధించడం పట్ల ప్రభుత్వ తీరును నిలదీసిన కవిత, సింగరేణి కార్మికుల సమస్యల పరిష్కారం కోసం పోరాడతానని హామీ ఇచ్చారు. నిజామాబాద్, మహబూబ్‌నగర్ సభల విజయం తర్వాత ఇంద్రవెల్లి వేదికగా జరిగిన ఈ ‘పాంచజన్య సంకల్ప సభ’తో ఉత్తర తెలంగాణలో తమ పార్టీ సిద్ధాంతాన్ని బలంగా ప్రజల్లోకి తీసుకెళ్లేందుకు కవిత శ్రీకారం చుట్టారు.
రాబోయే ఎమ్మెల్సీ మరియు స్థానిక ఎన్నికల్లో తెలంగాణ రక్షణ సేన అభ్యర్థులను గెలిపించి, ప్రజల పక్షాన పోరాడేందుకు మద్దతుగా నిలవాలని ఈ సభ ద్వారా కవిత పిలుపునిచ్చారు.
