పశ్చిమాసియాలో మరోసారి యుద్ధ మేఘాలు కమ్ముకుని తీవ్ర ఉద్రిక్త పరిస్థితులు నెలకొన్నాయి. ఇజ్రాయెల్, హమాస్ మధ్య కాల్పుల విరమణ ఒప్పందం అమల్లో ఉన్నప్పటికీ, బుధవారం (నవంబర్ 18) ఇజ్రాయెల్ రక్షణ దళాలు (IDF) మధ్య గాజా ప్రాంతంలో ఆకస్మికంగా భూతల దాడికి దిగాయి. హమాస్ నియంత్రణలో ఉన్న మధ్య గాజాలోని బురైజ్, నుసైరత్ శరణార్థి శిబిరాల సమీపంలోకి ఇజ్రాయెల్ సైనికులు భారీ ట్యాంకులు, బుల్డోజర్లతో ప్రవేశించారు.
ఈ ప్రాంతంలో తీవ్ర స్థాయిలో ఫిరంగి దాడులు, కాల్పులు జరుగుతుండటంతో స్థానిక పాలస్తీనా పౌరులు తీవ్ర భయాందోళనలకు గురై తమ ఇళ్లను, తాత్కాలిక శిబిరాలను వదిలి సురక్షిత ప్రాంతాలకు ప్రాణభయంతో తరలిపోతున్నారు. ఇజ్రాయెల్ సైన్యం మరియు ఆ దేశ అంతర్గత భద్రతా సంస్థ షిన్ బెట్ సంయుక్తంగా ఈ సైనిక చర్యను చేపట్టాయి.
సరిహద్దు వద్ద మోహరించిన తమ సైనికులకు తక్షణ ముప్పుగా మారిన ‘ఎల్లో లైన్’కు పశ్చిమాన ఉన్న హమాస్ సొరంగ మార్గాలను, ఉగ్రవాద మౌలిక సదుపాయాలను ధ్వంసం చేయడమే ఈ ఆపరేషన్ ప్రధాన లక్ష్యమని ఇజ్రాయెల్ సైనిక ప్రతినిధి ప్రకటించారు. నుసైరత్ శరణార్థి శిబిరానికి తూర్పు వైపున, గాజా ప్రధాన రహదారి అయిన సలాహ్ అల్-దిన్ రోడ్డు సమీపంలో ఇజ్రాయెల్ ట్యాంకులు మోహరించినట్లు అంతర్జాతీయ వార్తా సంస్థలు వెల్లడించాయి.
2025 అక్టోబర్లో కుదిరిన కాల్పుల విరమణ ఒప్పందం అనంతరం గాజా స్ట్రిప్ను ‘ఎల్లో లైన్’ ద్వారా ఇజ్రాయెల్, హమాస్ ఆధీన ప్రాంతాలుగా విభజించారు. ప్రస్తుతం గాజాలో 60 శాతానికి పైగా భూభాగం తమ నియంత్రణలోనే ఉందని ఇజ్రాయెల్ సైన్యం చెబుతోంది. అయితే ఏడాది తర్వాత తొలిసారిగా కాల్పుల విరమణ రేఖను దాటి హమాస్ నియంత్రణ ప్రాంతంలోకి ఇజ్రాయెల్ సైన్యం చొచ్చుకురావడంపై హమాస్ తీవ్రంగా మండిపడింది. ఇది కాల్పుల విరమణ ఒప్పందాన్ని బాహాటంగా ఉల్లంఘించడమేనని హమాస్ ఆరోపించింది.
మరోవైపు, ఇజ్రాయెల్ సైనిక ఆపరేషన్ కారణంగా మధ్య గాజాలోని దేర్ అల్-బలా, నుసైరత్ ప్రాంతాల్లో నివసిస్తున్న సుమారు 18,000 మందికి పైగా ప్రజలు తీవ్ర ప్రభావానికి గురైనట్లు ఐక్యరాజ్యసమితి మానవతా వ్యవహారాల సంస్థ వెల్లడించింది. ఇప్పటికే గత యుద్ధం కారణంగా పలుమార్లు నిరాశ్రయులై టెంట్లలో తలదాచుకుంటున్న వేలాది కుటుంబాలు మరోసారి కట్టుబట్టలతో వలస వెళ్లాల్సిన దయనీయ పరిస్థితి ఏర్పడింది. ఆపరేషన్ ఇంకా కొనసాగుతోందని ఇజ్రాయెల్ వెల్లడించడంతో పశ్చిమాసియాలో మళ్లీ పూర్తిస్థాయి యుద్ధం రాజుకుంటుందేమోనన్న ఆందోళన వ్యక్తమవుతోంది.

































