ఉమ్మడి పాలమూరు జిల్లాలో కరవు పరిస్థితులు నెలకొనడానికి కాంగ్రెస్ పార్టీనే ప్రధాన కారణమని బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ (KTR) తీవ్రస్థాయిలో మండిపడ్డారు. తెలంగాణ భవన్లో నిర్వహించిన మీడియా సమావేశంలో ఆయన మాట్లాడుతూ.. కృష్ణా జలాల పంపిణీ మరియు వినియోగం విషయంలో తెలంగాణకు తొలిసారిగా ఇంతటి తీరని అన్యాయం జరిగిందని విమర్శించారు.
గతంలో కేసీఆర్ హయాంలో తుమ్మిళ్ల ఎత్తిపోతల పథకాన్ని ఏర్పాటు చేసి ఆర్డీఎస్ను కాపాడామని, బీఆర్ఎస్ పాలనలో ఉమ్మడి పాలమూరు జిల్లాలో సుమారు 8 లక్షల ఎకరాల ఆయకట్టుకు సాగునీరు అందించడంతో పాటు ఇతర జిల్లాల నుంచి కూడా ప్రజలు అక్కడికి ఉపాధి కోసం వలస వచ్చే పరిస్థితిని కల్పించామని గుర్తుచేశారు. కానీ ప్రస్తుత సీఎం రేవంత్ రెడ్డి పాలనలో తెలంగాణ రాష్ట్రానికి ఉమ్మడి ఆంధ్రప్రదేశ్ పాలకుల హయాంలో జరిగిన దానికంటే ఎక్కువ నష్టం జరుగుతోందని కేటీఆర్ ధ్వజమెత్తారు.
ఆంధ్రప్రదేశ్లో ఎక్కడా లేని క్రాప్ హాలిడే తెలంగాణ రైతులకు ఎందుకు ప్రకటించాల్సి వస్తోందని కేటీఆర్ ప్రభుత్వాన్ని సూటిగా నిలదీశారు. ఏపీ ప్రభుత్వం కృష్ణా జలాలను యథేచ్ఛగా తరలించుకుపోతుంటే ముఖ్యమంత్రి రేవంత్ రెడ్డి, రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి ఏం చేస్తున్నారని ఆయన ప్రశ్నించారు. నాగార్జున సాగర్ ప్రాజెక్టు నుంచి పొరుగు రాష్ట్రం నీళ్లను తీసుకుపోతుంటే నల్గొండ జిల్లాకు చెందిన మంత్రులు ఎందుకు మౌనంగా ఉన్నారని మండిపడ్డారు.
పాలమూరు-రంగారెడ్డి ఎత్తిపోతల ప్రాజెక్ట్ను అడ్డుకునేందుకు కాంగ్రెస్ నేతలు గతంలో కోర్టుల్లో కేసులు వేసి ఎన్నో అడ్డంకులు సృష్టించారని కేటీఆర్ విమర్శించారు. తాము అధికారంలో ఉన్నప్పుడు దశాబ్దాలుగా పెండింగ్లో ఉన్న ప్రాజెక్టులను రన్నింగ్ ప్రాజెక్టులుగా మార్చి, రికార్డు సమయంలో పూర్తి చేసి రైతుల పొలాలకు గోదావరి, కృష్ణా జలాలను అందించామని స్పష్టం చేశారు. కానీ ప్రస్తుత ప్రభుత్వం కేవలం రాజకీయ కక్షసాధింపు చర్యలకే పరిమితమై సాగునీటి ప్రాజెక్టుల నిర్వహణను గాలికి వదిలేసిందని ఆరోపించారు.
ప్రభుత్వ వైఫల్యాలను మరియు సాగునీటి రంగంలో తెలంగాణకు జరుగుతున్న చారిత్రాత్మక అన్యాయాన్ని ప్రజాక్షేత్రంలో గట్టిగా ఎండగడతామని కేటీఆర్ ఈ సమావేశం ద్వారా స్పష్టం చేశారు. రైతులకు సాగునీరు అందక పంటలు ఎండిపోతుంటే ప్రభుత్వం చోద్యం చూస్తోందని, తక్షణమే కృష్ణా జలాల వాటాపై స్పష్టమైన చర్యలు తీసుకొని రైతాంగాన్ని ఆదుకోవాలని డిమాండ్ చేశారు. లేనిపక్షంలో బీఆర్ఎస్ ఆధ్వర్యంలో రైతులతో కలిసి పెద్ద ఎత్తున ఆందోళన కార్యక్రమాలు చేపడతామని కేటీఆర్ హెచ్చరించారు.
రాష్ట్ర ప్రయోజనాలను కాపాడటంలో కాంగ్రెస్ ప్రభుత్వం పూర్తిగా విఫలమైందని, మంత్రుల మధ్య సమన్వయ లోపం మరియు నిర్లక్ష్యం వల్లే నేడు తెలంగాణ రైతాంగం సాగునీటి కోసం అల్లాడుతోందని ఆగ్రహం వ్యక్తం చేశారు.





































