తమిళనాడు రాజకీయాల్లో తీవ్ర చర్చకు దారితీసిన కరూర్ తొక్కిసలాట ఘటనపై ముఖ్యమంత్రి జోసెఫ్ విజయ్ స్పందించారు. కరూర్లో పర్యటించిన ఆయన, ఈ దుర్ఘటనలో ప్రాణాలు కోల్పోయిన వారి కుటుంబాలను పరామర్శించి ప్రగాఢ సానుభూతి తెలిపారు. ప్రభుత్వం ప్రకటించిన సహాయ చర్యల్లో భాగంగా అర్హులైన కుటుంబ సభ్యులకు ప్రభుత్వ ఉద్యోగ నియామక పత్రాలను అందజేశారు. అనంతరం నిర్వహించిన సభలో ఘటనపై తన ఆవేదనను వ్యక్తం చేస్తూనే ప్రతిపక్ష డీఎంకేపై తీవ్ర విమర్శలు గుప్పించారు.
‘విషాదాన్ని రాజకీయాలకు వాడుకుంటున్నారు’
కరూర్ ఘటన తనను తీవ్రంగా కలచివేసిందని సీఎం జోసెఫ్ విజయ్ అన్నారు. బాధిత కుటుంబాల దుఃఖంలో తాను కూడా భాగస్వామినేనని పేర్కొన్నారు. అయితే ఈ మానవీయ విషాదాన్ని రాజకీయ ప్రయోజనాల కోసం ప్రతిపక్ష డీఎంకే ఉపయోగించుకోవడం దురదృష్టకరమని విమర్శించారు. ప్రజల ప్రాణాల కంటే రాజకీయ లాభాలకే ప్రాధాన్యం ఇస్తున్నారని ఆరోపించారు. తాను ప్రజల కోసం నిరంతరం పనిచేస్తానని, పదవికన్నా ప్రజల సంక్షేమమే తనకు ముఖ్యమని స్పష్టం చేశారు.
భద్రతా వైఫల్యంపై ప్రశ్నలు
కరూర్లో భారీ జనసమీకరణ జరుగుతుందని ముందే తెలిసినప్పటికీ తగిన భద్రతా ఏర్పాట్లు ఎందుకు చేయలేదని సీఎం ప్రశ్నించారు. అవసరమైన సంఖ్యలో పోలీసు సిబ్బందిని ఎందుకు మోహరించలేదని, కార్యక్రమ నిర్వహణలో ఎవరు బాధ్యత వహించారో సమాధానం చెప్పాలని డిమాండ్ చేశారు. భద్రతాపరమైన ప్రమాదం ఉంటే తన పర్యటనను నిలిపివేయవచ్చని, సభను రద్దు చేసే అధికారాలు కూడా పోలీసులకు ఉన్నాయని గుర్తుచేశారు. అయినప్పటికీ అలాంటి చర్యలు తీసుకోకపోవడం పలు అనుమానాలకు తావిస్తోందని అన్నారు.
‘కుట్ర కోణం కూడా పరిశీలించాలి’
ఈ ఘటనలో పరిపాలనా వైఫల్యంతో పాటు రాజకీయ కుట్ర కోణం కూడా ఉందేమో అన్న అనుమానాన్ని సీఎం వ్యక్తం చేశారు. తనను రాజకీయంగా ఇబ్బందుల్లోకి నెట్టేందుకు కొందరు అధికారులు, ప్రత్యర్థులు కలిసి వ్యవహరించి ఉండవచ్చని ఆరోపించారు. ఈ అంశంపై పూర్తిస్థాయి దర్యాప్తు జరిపి బాధ్యులపై కఠిన చర్యలు తీసుకోవాలని అధికారులను ఆదేశించారు.
అవినీతి రహిత పాలన లక్ష్యం
డీఎంకే, ఏఐఏడీఎంకే ప్రభుత్వాల హయాంలో రాష్ట్రంలో అవినీతి పెరిగిందని సీఎం జోసెఫ్ విజయ్ విమర్శించారు. తమ ప్రభుత్వం పారదర్శక పాలనకు కట్టుబడి ఉందని, ప్రభుత్వ సేవల్లో డిజిటల్ విధానాలను విస్తృతంగా అమలు చేసి లంచాలకు పూర్తిగా అడ్డుకట్ట వేస్తామని తెలిపారు. ప్రజలకు ఎలాంటి ఇబ్బందులు లేకుండా ప్రభుత్వ సేవలు అందించడమే తమ ప్రధాన లక్ష్యమని స్పష్టం చేశారు.
