ఎంతోకాలంగా ఎదురుచూస్తున్న కడప స్టీల్ ప్లాంట్ నిర్మాణ పనులకు సంబంధించి కీలక ముందడుగు పడింది. ప్లాంట్ నిర్మాణ పనులను జులై 3న ముఖ్యమంత్రి నారా చంద్రబాబు నాయుడు అధికారికంగా ప్రారంభించనున్నట్లు నంద్యాల ఎంపీ శబరి వెల్లడించారు. రాయలసీమ ప్రాంత పారిశ్రామిక అభివృద్ధిలో ఈ ప్రాజెక్టు కీలక మైలురాయిగా నిలుస్తుందని ఆమె పేర్కొన్నారు.
కడప స్టీల్ ప్లాంట్ను రాయలసీమ ప్రజల ఆత్మగౌరవంతో ముడిపడిన ప్రతిష్ఠాత్మక ప్రాజెక్టుగా అభివర్ణించిన ఎంపీ శబరి, కూటమి ప్రభుత్వం హామీలను అమలు చేసే దిశగా పనిచేస్తోందని తెలిపారు. గత ప్రభుత్వ హయాంలో ప్లాంట్ నిర్మాణం ఆశించిన స్థాయిలో ముందుకు సాగలేదని ఆమె విమర్శించారు.
2018 డిసెంబర్ 27న అప్పటి ముఖ్యమంత్రి నారా చంద్రబాబు నాయుడే కడప స్టీల్ ప్లాంట్కు శంకుస్థాపన చేసిన విషయాన్ని ఈ సందర్భంగా ఆమె గుర్తు చేశారు. రాయలసీమను వెనుకబడిన ప్రాంతంగా కాకుండా అన్ని రంగాల్లో అభివృద్ధి చెందిన ప్రాంతంగా తీర్చిదిద్దడమే ప్రస్తుత ప్రభుత్వ లక్ష్యమని స్పష్టం చేశారు.
వ్యవసాయ అనుబంధ రంగాలు, హార్టికల్చర్, ఎలక్ట్రానిక్స్ మరియు పారిశ్రామిక రంగాల్లో పెట్టుబడులను ఆకర్షించడం ద్వారా రాయలసీమ అభివృద్ధికి ప్రభుత్వం ప్రత్యేక కార్యాచరణ చేపట్టిందని తెలిపారు. కడప స్టీల్ ప్లాంట్ నిర్మాణం పూర్తయితే ఈ ప్రాంతంలో పారిశ్రామిక కార్యకలాపాలు పెరగడంతో పాటు యువతకు పెద్దఎత్తున ఉపాధి అవకాశాలు అందుబాటులోకి వచ్చే అవకాశం ఉందని పేర్కొన్నారు.
స్టీల్ ప్లాంట్ నిర్మాణ పనులు ప్రారంభించడానికి ముందు అవసరమైన విద్యుత్, నీటి సరఫరా, రహదారులు వంటి మౌలిక సదుపాయాల కల్పనపై ప్రభుత్వం దృష్టి సారించిందని ఎంపీ శబరి తెలిపారు. ప్రాజెక్టు అమలుకు అవసరమైన ఏర్పాట్లు పూర్తిచేసిన అనంతరం నిర్మాణ పనులకు శ్రీకారం చుట్టనున్నట్లు వివరించారు.
రాష్ట్రంలో కూటమి ప్రభుత్వం ఏర్పడిన తర్వాత అనేక సంస్థలు పెట్టుబడులకు ఆసక్తి చూపుతున్నాయని ఆమె పేర్కొన్నారు. రాయలసీమలో పారిశ్రామిక అభివృద్ధిని వేగవంతం చేసి, యువతకు స్థానికంగానే ఉద్యోగ అవకాశాలు కల్పించేలా ప్రభుత్వం చర్యలు తీసుకుంటోందని అన్నారు.
కడప స్టీల్ ప్లాంట్ కేవలం ఒక పారిశ్రామిక ప్రాజెక్టుకే పరిమితం కాదని, ఈ ప్రాంత ఆర్థికాభివృద్ధికి కొత్త దిశను చూపే అవకాశముందని ఎంపీ శబరి అభిప్రాయపడ్డారు. వేలాది మంది యువతకు ఉపాధి అవకాశాలు, అనుబంధ రంగాలకు ప్రోత్సాహం లభించడం ద్వారా రాయలసీమ ఆర్థిక వ్యవస్థ మరింత బలోపేతం కావచ్చని తెలిపారు.
