తెలంగాణ అసెంబ్లీ వేదికగా బీఆర్ఎస్ అధినేత, మాజీ ముఖ్యమంత్రి కేసీఆర్, ఆయన కుటుంబ సభ్యులపై ప్రస్తుత సీఎం రేవంత్ రెడ్డి తీవ్ర విమర్శలు చేశారు. తెలంగాణ ఉద్యమం, ధరణి వ్యవస్థను అడ్డుపెట్టుకుని గత పాలనలో భూముల వ్యవహారంలో అక్రమాలకు పాల్పడ్డారంటూ ఆయన ఆరోపణలు చేశారు. ఈ సందర్భంగా కల్వకుంట్ల కుటుంబానికి సంబంధించిన భూముల వివరాలను సభలో ప్రస్తావిస్తూ పలు కీలక వ్యాఖ్యలు చేశారు.
కేసీఆర్ ఫామ్హౌస్పై తక్షణమే విచారణ
కేసీఆర్ ఆధ్వర్యంలోని ఎర్రవల్లి ఫామ్హౌస్కు సంబంధించిన భూములు, ప్రొహిబిటెడ్ ల్యాండ్స్ వివాదంపై సమగ్ర విచారణకు ఉత్తర్వులు జారీ చేశారు. అసెంబ్లీ సమావేశాల వేళ స్పీకర్ గడ్డం ప్రసాద్ కుమార్ను అవమానించడం మరియు ఫామ్హౌస్ వద్ద జరిగిన పరిణామాలపై ఐపీఎస్ అధికారి విజయ్ కుమార్ నేతృత్వంలో విచారణ చేపట్టనున్నట్లు సీఎం రేవంత్ రెడ్డి ప్రకటించారు.
గజ్వేల్ నియోజకవర్గంలోని ఎర్రవల్లిలో ఉన్న కేసీఆర్ ఫాంహౌస్పై విచారణకు సీఎం ఆదేశాలు జారీ చేశారు. తక్షణం ఆయనకు నోటీసులు ఇచ్చి భూమిని స్వాధీనం చేసుకోవాలని, 30 రోజుల్లో విచారణ నివేదిక ఇవ్వాలని స్పష్టం చేశారు. విచారణ చేయకపోతే సంబంధిత అధికారులపై చర్యలు తప్పవని కూడా సీఎం రేవంత్ హెచ్చరించారు.
ఫాంహౌస్ ఆధీనంలో 700 ఎకరాలు
కేసీఆర్ ఫాంహౌస్కు ఎస్సీలను యజమానులుగా చేస్తామని ప్రకటించిన ఆయన, కేసీఆర్ ఫాంహౌస్ ఆధీనంలో 700 ఎకరాలు ఉందని, ఆ భూమి లెక్కలను తేల్చాలని కలెక్టర్ను ఆదేశించారు. 30 రోజుల్లోనే కేసీఆర్ ఫాంహౌస్ నుంచి భూమిని స్వాధీనం చేసుకుని పేదలకు పంచుతామన్న సీఎం రేవంత్ రెడ్డి.. ఏ భూమినైతే శుద్ధి చేశారో అదే భూమికి ఎస్సీలను యజమానులను చేస్తామని ప్రకటించారు.
కల్వకుంట్ల కుటుంబ సభ్యులు, బంధువుల పేర్లపై కలిపి సుమారు 440 ఎకరాల భూమి ఉన్నట్లు సీఎం రేవంత్ రెడ్డి పేర్కొన్నారు. ఇందులో కేసీఆర్, ఆయన సతీమణి పేర్లపై 67 ఎకరాలు ఉన్నాయని తెలిపారు. అలాగే మాజీ మంత్రి కేటీఆర్ కుటుంబ సభ్యుల పేర్లపై ఉన్న భూముల వివరాలను కూడా సభలో వెల్లడించారు.
కేటీఆర్ పేరుపై 49.5 ఎకరాలు, శైలిమ పేరుపై 17.5 ఎకరాలు, అలేఖ్య పేరుపై 9.38 ఎకరాలు, హిమాన్షు పేరుపై 46.3 ఎకరాల భూమి ఉన్నట్లు రేవంత్ రెడ్డి చెప్పారు. కేటీఆర్ కుటుంబానికి చెందిన నలుగురి పేర్లపై కలిపి 123 ఎకరాల భూమి ఉన్నట్లు ఆయన వివరించారు.
ఇదే సమయంలో మాజీ మంత్రి హరీశ్ రావు కుటుంబానికి సంబంధించిన భూములపైనా సీఎం ప్రస్తావన చేశారు. హరీశ్ రావు కుటుంబానికి 30 ఎకరాలు, కవిత కుటుంబానికి 37 ఎకరాలు ఉన్నట్లు పేర్కొన్నారు. అలాగే సంతోష్ రావు కుటుంబానికి 79 ఎకరాలు, నవీన్ రావు పేరుపై 52 ఎకరాలు, కొండల్ రావు పేరుపై 48 ఎకరాల భూమి ఉన్నట్లు సభలో తెలిపారు.
ధరణి వ్యవస్థ దుర్వినియోగం
తెలంగాణ ఉద్యమాన్ని రాజకీయంగా వినియోగించుకోవడంతో పాటు ధరణి వ్యవస్థను కూడా భూముల వ్యవహారాల్లో దుర్వినియోగం చేశారని రేవంత్ రెడ్డి ఆరోపించారు. గత ప్రభుత్వ హయాంలో భూ సంబంధిత అంశాల్లో చోటుచేసుకున్న పరిణామాలపై తమ ప్రభుత్వం పరిశీలన కొనసాగిస్తోందని ఆయన స్పష్టం చేశారు.
అయితే సభలో సీఎం ప్రస్తావించిన భూముల వివరాలు, ఆరోపణలపై సంబంధిత కుటుంబ సభ్యుల నుంచి వచ్చే వివరణలు లేదా అధికారిక భూ రికార్డులతో కూడిన ధృవీకరణను కూడా పరిగణనలోకి తీసుకోవాల్సి ఉంటుంది. రేవంత్ రెడ్డి చేసిన ఈ వ్యాఖ్యలు ప్రస్తుతం తెలంగాణ రాజకీయాల్లో మరోసారి కేసీఆర్ కుటుంబ ఆస్తులు, భూముల అంశాన్ని చర్చనీయాంశంగా మార్చాయి.
