సొంతింటి కోసం ఎదురుచూస్తున్న పేద కుటుంబాలకు కేంద్ర ప్రభుత్వం శుభవార్త అందించింది. ప్రధానమంత్రి ఆవాస్ యోజన (PMAY)లో భాగంగా తెలుగు రాష్ట్రాలకు అదనంగా 5 లక్షల ఇళ్లను మంజూరు చేసినట్లు కేంద్ర గ్రామీణాభివృద్ధి, జలశక్తి శాఖ సహాయ మంత్రి పెమ్మసాని చంద్రశేఖర్ తెలిపారు. ఈ నిర్ణయంతో ఆంధ్రప్రదేశ్, తెలంగాణలో సొంత ఇల్లు లేని అర్హులైన కుటుంబాలకు గృహ వసతి కల్పించే ప్రక్రియ మరింత వేగవంతం కానుంది.
తెలుగు రాష్ట్రాలకు 5 లక్షల ఇళ్ళు
మొత్తం కేటాయింపులో ఆంధ్రప్రదేశ్కు 3 లక్షలు, తెలంగాణకు 2 లక్షల ఇళ్లు దక్కనున్నాయి. దేశవ్యాప్తంగా ప్రధానమంత్రి ఆవాస్ యోజన కింద పెద్ద సంఖ్యలో ఇళ్ల నిర్మాణాన్ని చేపడుతున్న కేంద్రం.. తెలుగు రాష్ట్రాల్లోనూ అర్హులైన లబ్ధిదారులను గుర్తించి గృహ నిర్మాణానికి సహాయం అందించనుంది.
పథకం కింద ఇంటి నిర్మాణానికి కేంద్రం ఆర్థిక సహాయం అందిస్తోంది. నిర్మాణంతో పాటు మరుగుదొడ్డి వంటి ప్రాథమిక సదుపాయాలకు కూడా ప్రత్యేకంగా నిధులు కేటాయిస్తున్నారు. ఇప్పటికే మంజూరైన ఇళ్లలో పెండింగ్లో ఉన్న పనులతో పాటు తాజాగా అనుమతులు పొందిన గృహాలను కూడా రానున్న రెండు, మూడు సంవత్సరాల్లో పూర్తి చేసేలా లక్ష్యాన్ని నిర్దేశించినట్లు మంత్రి తెలిపారు.
సాంకేతికతతో లబ్ధిదారుల ఎంపిక
గృహాల కేటాయింపు, లబ్ధిదారుల గుర్తింపు ప్రక్రియలో పారదర్శకత కోసం ‘ఆవాస్ ప్లస్’ మొబైల్ అప్లికేషన్ను ఉపయోగిస్తున్నారు. అర్హత కలిగిన కుటుంబాలను గుర్తించి, ఎలాంటి రాజకీయ జోక్యానికి అవకాశం లేకుండా పథకం ప్రయోజనం అందేలా డిజిటల్ విధానాన్ని అమలు చేస్తున్నారు.
ఇళ్ల నిర్మాణాన్ని ఇతర కేంద్ర పథకాలతోనూ అనుసంధానిస్తున్నారు. స్వచ్ఛ భారత్, జల్ జీవన్ మిషన్, ఉజ్వల వంటి కార్యక్రమాల ద్వారా లబ్ధిదారులకు పారిశుద్ధ్యం, తాగునీరు, వంటగ్యాస్ వంటి అదనపు సౌకర్యాలు అందేలా చర్యలు చేపడుతున్నారు.
తెలుగు రాష్ట్రాలకు మంజూరైన అదనపు గృహాలతో గ్రామీణ ప్రాంతాల్లో నిర్మాణ కార్యకలాపాలు పెరిగి స్థానికంగా ఉపాధి అవకాశాలు కూడా మెరుగుపడే అవకాశం ఉంది. అర్హులైన పేద కుటుంబాలకు శాశ్వత నివాసం కల్పించడం ద్వారా వారి జీవన ప్రమాణాలను మెరుగుపరిచే దిశగా ఈ నిర్ణయం కీలక అడుగుగా నిలవనుంది.
