తెలంగాణలో భారతీయ జనతా పార్టీ (BJP)కి ఎలాంటి ఉనికి లేదని, చాలా స్థానాల్లో పోటీ ఇచ్చే స్థాయి కూడా ఆ పార్టీకి లేదని తెలంగాణ ముఖ్యమంత్రి ఎ. రేవంత్రెడ్డి స్పష్టం చేశారు. తమ ప్రధాన రాజకీయ ప్రత్యర్థి బీఆర్ఎస్ అధినేత కేసీఆరేనని తేల్చిచెప్పారు. హైదరాబాద్లో శుక్రవారం (నవంబర్ 20) జరిగిన ఒక కార్యక్రమంలో ఆయన తెలంగాణతో పాటు జాతీయ రాజకీయాలు, రానున్న ఎన్నికలపై పలు కీలక వ్యాఖ్యలు చేశారు.
కేంద్ర మంత్రి కిషన్రెడ్డి ప్రాతినిధ్యం వహిస్తున్న సికింద్రాబాద్ పరిధిలో ఇటీవల జరిగిన జూబ్లీహిల్స్ ఉప ఎన్నికలో భాజపా డిపాజిట్ కూడా దక్కించుకోలేకపోయిందని గుర్తుచేశారు. మహిళా రిజర్వేషన్ బిల్లుపై భాజపాకు చిత్తశుద్ధి లేదని, నిజంగా చిత్తశుద్ధి ఉంటే ప్రస్తుతమున్న 543 లోక్సభ స్థానాల్లోనే 181 స్థానాలను మహిళలకు కేటాయించవచ్చని సూచించారు.
కేంద్ర ప్రభుత్వం తలపెట్టిన నియోజకవర్గాల పునర్విభజన ప్రణాళిక యావత్ దక్షిణ భారతదేశ ప్రజల భవిష్యత్తుకు పెను సవాల్గా మారనుందని సీఎం రేవంత్రెడ్డి ఆందోళన వ్యక్తం చేశారు. ప్రజాస్వామ్యంలో సంఖ్యాబలం అత్యంత కీలకమని, ప్రస్తుతం కేరళలో 20 మంది, ఉత్తరప్రదేశ్లో 80 మంది ఎంపీలు ఉన్నారని, లోక్సభ సీట్లను 50 శాతం పెంచితే కేరళలో 30, యూపీలో 120 సీట్లు అవుతాయని వివరించారు.
దక్షిణాదిలో ప్రస్తుతం 129 లోక్సభ స్థానాలు ఉండగా, పునర్విభజన తర్వాత సుమారు 195కి చేరవచ్చని, మొత్తం 850 సీట్లలో 650 సీట్లు ఉత్తరాది రాష్ట్రాలకే దక్కితే కేంద్ర ప్రభుత్వ ఏర్పాటులో దక్షిణాది అవసరం లేకుండా పోతుందని హెచ్చరించారు. కేవలం తాత్కాలిక రాజకీయ లబ్ధి కోసమే ప్రధాని మోదీ ఈ ప్రయోగం చేస్తున్నారని, అందుకే రాష్ట్రాలు, జనాభా, జీడీపీ ఆధారంగా 50 శాతం ఫార్ములాను అమలు చేయాలని డిమాండ్ చేశారు.
మతప్రాతిపదికన రాజకీయాలు చేస్తున్న పార్టీలు భాజపా, ఎంఐఎంలేనని సీఎం రేవంత్రెడ్డి తీవ్రంగా విమర్శించారు. హిందూ ఓట్ల కోసం మోదీ, అమిత్ షా, ముస్లిం ఓట్ల కోసం అసదుద్దీన్ ఒవైసీ ప్రయత్నిస్తున్నారని, అన్ని వర్గాల ప్రజలను కలుపుకొని ముందుకు సాగేది కాంగ్రెస్ పార్టీ మాత్రమేనని అన్నారు. భాజపా, ఎంఐఎంల మధ్య పెద్దగా తేడా ఏమీ లేదని, ఒకవేళ తేడా ఉందని భావిస్తే హైదరాబాద్ లోక్సభ స్థానం నుంచి అమిత్ షా పోటీ చేసి అసదుద్దీన్ ఒవైసీని ఓడించాలని సవాల్ విసిరారు.
మరోవైపు, మళ్లీ వచ్చేది తమ ప్రభుత్వమేనని బీఆర్ఎస్ నాయకులు కలలు కంటున్నారని, నిన్ననే సిద్దిపేటకు వెళ్లి కాంగ్రెస్ జెండా ఎగరవేసి వచ్చామని సీఎం రేవంత్రెడ్డి పేర్కొన్నారు. కేటీఆర్ను తాను సీరియస్గా తీసుకోనని, ప్రజాస్వామ్యంలో ప్రతిపక్షం ఉండాలన్న ఉద్దేశంతోనే బీఆర్ఎస్ను కొనసాగిస్తున్నామని, లేదంటే ఎప్పుడో ఖాళీ అయ్యేదని వ్యాఖ్యానించారు.
ప్రస్తుతం ఉన్న కాంగ్రెస్ ముఖ్యమంత్రుల్లో డీకే శివకుమార్తో తన అనుబంధం ప్రత్యేకమైనదని, భాజపా పాలిత రాష్ట్రాల ముఖ్యమంత్రుల పేర్లు తనకు తెలియవని చెప్పారు. దేశానికి రాహుల్ గాంధీ నాయకత్వం అవసరమని భావించే తాను కాంగ్రెస్లో చేరానని స్పష్టం చేశారు. అలాగే ఫుట్బాల్ దిగ్గజం క్రిస్టియానో రొనాల్డోను త్వరలో తెలంగాణకు ఆహ్వానించేందుకు ప్రయత్నాలు చేస్తున్నట్లు, ఇప్పటికే మెస్సీని తీసుకొచ్చిన విషయాన్ని గుర్తుచేస్తూ సీఎం వెల్లడించారు.




































