గోపాల్‌పూర్ సమీపంలో తీరం దాటిన అక్వాన్.. శ్రీకాకుళం జిల్లాలో విస్తారంగా వర్షాలు

Cyclone Akvan Crosses Coast Near Gopalpur, Heavy Downpours Lash Parts of Srikakulam

బంగాళాఖాతంలో ఏర్పడిన తీవ్ర తుపాను ‘అక్వాన్’ ఉత్తరాంధ్ర – దక్షిణ ఒడిశా మధ్య ఒడిశాలోని గోపాల్‌పూర్ సమీపంలో తీరం దాటింది. శుక్రవారం (నవంబర్ 20) ఉదయం 7:30 నుంచి 8:30 గంటల మధ్య తుపాను తీరం దాటే ప్రక్రియ జరిగినట్లు ఆంధ్రప్రదేశ్ రాష్ట్ర విపత్తుల నిర్వహణ సంస్థ అధికారికంగా వెల్లడించింది.

తుపాను తీరం దాటే సమయంలో తీర ప్రాంతాల వెంబడి గంటకు 70 నుంచి 90 కిలోమీటర్ల వేగంతో బలమైన ఈదురుగాలులు వీచినట్లు ఆయన తెలిపారు. తుపాను పూర్తిస్థాయిలో తీరం దాటే ప్రక్రియ ముగియడానికి మరికొంత సమయం పట్టే అవకాశం ఉందని వాతావరణ శాఖ అధికారులు పేర్కొన్నారు.

తుపాను ప్రభావంతో ఉత్తరాంధ్ర జిల్లాల్లో, ముఖ్యంగా శ్రీకాకుళం జిల్లాలో ఇప్పటికే విస్తారంగా వర్షాలు కురుస్తున్నాయి. ఇచ్ఛాపురం, కంచిలి, కవిటి, పలాస, సోంపేట తదితర ప్రాంతాల్లో భారీ వర్షపాతం నమోదు కాగా, సముద్రం అల్లకల్లోలంగా మారి తీరం వెంబడి అలలు ఎగసిపడుతున్నాయి. తుపాను తీరం దాటినప్పటికీ దాని ప్రభావంతో ఉత్తరాంధ్రలో తేలికపాటి నుంచి మోస్తరు వర్షాలు, శ్రీకాకుళం జిల్లాలో అక్కడక్కడా భారీ వర్షాలు కురిసే అవకాశం ఉందని ఐఎండీ అంచనా వేసింది.

మరోవైపు, ఒడిశా ప్రభుత్వం కూడా గోపాల్‌పూర్ సమీపంలో తుపాను తీరం దాటడంతో గంజాం, గజపతి సహా తీర ప్రాంతాల్లో సహాయక చర్యలను ముమ్మరం చేసింది. ముందస్తు జాగ్రత్తగా లోతట్టు ప్రాంతాల ప్రజలను సురక్షిత పునరావాస కేంద్రాలకు తరలించడంతో పాటు, ఎన్‌డీఆర్‌ఎఫ్ (NDRF), ఓడీఆర్‌ఏఎఫ్ (ODRAF) మరియు అగ్నిమాపక బృందాలను రంగంలోకి దించింది.

తుపాను తీరం దాటినందున ఆంధ్రప్రదేశ్‌కు పెను ముప్పు తప్పినప్పటికీ, శ్రీకాకుళం జిల్లా ప్రజలు మరికొన్ని గంటల పాటు అత్యంత అప్రమత్తంగా ఉండాలని సూచించింది. మత్స్యకారులు ఎవరూ సముద్రంలోకి వేటకు వెళ్లరాదని, బలమైన గాలులు, వర్షాల నేపథ్యంలో ప్రజలు వాతావరణ పరిస్థితులను దృష్టిలో ఉంచుకుని తగిన జాగ్రత్తలు పాటించాలని, అత్యవసరమైతే తప్ప బయటకు రావొద్దని విపత్తుల నిర్వహణ సంస్థ స్పష్టం చేసింది.

LEAVE A REPLY

Please enter your comment!
Please enter your name here