గత వైసీపీ ప్రభుత్వంలో జరిగిన భారీ మద్యం కుంభకోణానికి సంబంధించిన కేసులో కీలక నిందితుడైన ఆ పార్టీ ప్రధాన కార్యదర్శి చెవిరెడ్డి భాస్కర్‌రెడ్డి కుటుంబ ఆస్తులను రాష్ట్ర ప్రభుత్వం జప్తు చేసింది. బుధవారం (నవంబర్ 19) రాష్ట్ర హోం శాఖ ఈ మేరకు ఉత్తర్వులు జారీ చేసింది.
జప్తు చేసిన ఆస్తుల వివరాలు..
-
జప్తు చేసిన మొత్తం విలువ: రూ. 63.72 కోట్లకు పైగా
-
కుటుంబ సభ్యులు: చెవిరెడ్డి భాస్కర్‌రెడ్డి (ఏ-38), భార్య లక్ష్మీకాంతమ్మ, కుమారులు చెవిరెడ్డి మోహిత్‌రెడ్డి (ఏ-39), చెవిరెడ్డి హర్షిత్‌రెడ్డి.
-
ఆస్తుల కొనుగోలు: ఈ మొత్తం ఆస్తుల కోసం రిజిస్ట్రార్ల వద్ద కేవలం రూ. 8.85 కోట్లు మాత్రమే చూపగా, మిగతా రూ. 54.87 కోట్లను నగదు రూపంలో చెల్లించి కొనుగోలు చేసినట్లు ప్రత్యేక దర్యాప్తు బృందం (సిట్) తేల్చింది.
-
ప్రాంతాలు: చంద్రగిరి, రేణిగుంట, తిరుపతి రూరల్, తొట్టంబేడు సబ్‌ రిజిస్ట్రార్ల పరిధిలో ఉన్న స్థిరాస్తులతో పాటు నెల్లూరు జిల్లాలోని గూడూరు, పొదలకూరు, చిత్తూరు జిల్లాలోని పుత్తూరు పరిధిలో ఈ ఆస్తులు రిజిస్టరై ఉన్నాయి.
సిట్ దర్యాప్తులో వెల్లడైన అంశాలు..
-
అక్రమ సంపాదన: మద్యం కుంభకోణంలో కమీషన్లు తీసుకుని, ఆ డబ్బులతో చెవిరెడ్డి కుటుంబం తిరుపతి, నెల్లూరు, చిత్తూరు జిల్లాల్లో భారీగా ఆస్తులు కూడబెట్టినట్లు సిట్ పేర్కొంది.
-
మోసపూరిత లావాదేవీలు: ఆలయ పూజారిని సైతం వదలకుండా మోసపూరిత భూ లావాదేవీలు చేసి, ఆస్తులు రాయించుకున్నారని తెలిపింది.
-
డొల్ల కంపెనీలు: అక్రమ సొమ్మును వైట్‌ మనీగా మార్చుకోవడానికి కుటుంబ సభ్యులు, అనుచరులు, డ్రైవర్, సహాయకుడు, ఇరుగు పొరుగున ఉండే వారి పేర్లతో సహా 8 డొల్ల కంపెనీలు సృష్టించి లావాదేవీలు జరిపినట్లు సిట్ వెల్లడించింది.
-
లెక్కల్లో చూపని సొమ్ము: కుమారులు మోహిత్‌రెడ్డి (కేవీఎస్ ఇన్‌ఫ్రా ఎండీగా) మరియు హర్షిత్‌రెడ్డి (సీఎంఆర్ ఇన్‌ఫ్రా కంపెనీ బాధ్యతలు) పేర్లతో ఉన్న ఆస్తుల్లో రూ. 54.87 కోట్లు లెక్కల్లో చూపలేదని గుర్తించింది.
-
వైట్‌ మనీ మార్పిడి: నెల్లూరు జిల్లాలో అరబిందో ఫార్మాకు విక్రయించిన 263 ఎకరాల భూమికి సంబంధించి, కేవీఎస్ ఇన్‌ఫ్రా ద్వారా రూ. 13.3 కోట్లు వైట్‌ మనీగా మార్చినట్లు గుర్తించింది.
తదుపరి చర్యలు
-
ప్రభుత్వ అనుమతి: వందల ఎకరాల భూములు, ఖరీదైన నివాస, వాణిజ్య స్థలాలను జప్తు చేసేందుకు విజయవాడ ఏసీబీ కోర్టులో పిటిషన్ వేయడానికి సీఐడీకి ప్రభుత్వం అనుమతి ఇచ్చింది.
-
పిటిషన్ దాఖలు: సిట్ కోర్టులో త్వరలో జప్తు పిటిషన్ దాఖలు చేయబోతోంది.
