ఆంధ్రప్రదేశ్‌లో మురసు తుఫాన్ ప్రభావం, ప్రస్తుత పరిస్థితులపై ముఖ్యమంత్రి నారా చంద్రబాబు నాయుడు ఉన్నతాధికారులు, జిల్లా కలెక్టర్లతో టెలికాన్ఫరెన్స్ నిర్వహించారు. తుఫాన్ అనంతర పరిస్థితులను ఎదుర్కొనేందుకు తీసుకోవాల్సిన చర్యలపై అధికారులకు కీలక ఆదేశాలు జారీ చేశారు. తాగునీరు, విద్యుత్ సరఫరా, రహదారుల కనెక్టివిటీపై ప్రత్యేక దృష్టి సారించాలని సూచించారు. ఎక్కడా ప్రాణ నష్టం జరగకుండా చూడటమే ప్రభుత్వ ప్రథమ ప్రాధాన్యమని స్పష్టం చేశారు.
మరో 4 నుంచి 5 గంటలు అప్రమత్తంగా ఉండాలి
ఈరోజు రాత్రికి తుఫాన్ తీవ్రత పూర్తిగా తగ్గే అవకాశం ఉందని సీఎం తెలిపారు. ప్రకాశం, బాపట్ల జిల్లాల్లో వర్షపాతం మరింత పెరిగిందని, వచ్చే 4 నుంచి 5 గంటలు అత్యంత కీలకమని పేర్కొన్నారు. బాపట్ల, గుంటూరు, ప్రకాశం, పల్నాడు, కృష్ణా, ఎన్టీఆర్, ఏలూరు, పశ్చిమగోదావరి జిల్లాల్లో వర్షాలు కొనసాగుతాయని వెల్లడించారు. 21 పట్టణ ప్రాంతాల్లో అధిక వర్షపాతం నమోదవుతోందని తెలిపారు. సాయంత్రం వరకు ప్రజలు బయటకు వెళ్లకుండా జాగ్రత్తలు తీసుకోవాలని సూచించారు.
పునరుద్ధరణ పనులకు ప్రాధాన్యం
జిల్లా కలెక్టర్లు, మున్సిపల్ కమిషనర్లు క్షేత్రస్థాయి యంత్రాంగాన్ని అప్రమత్తం చేయాలని సీఎం ఆదేశించారు. ప్రకాశం, బాపట్ల జిల్లాల్లో అంతరాయం కలిగిన విద్యుత్ సరఫరాను యుద్ధప్రాతిపదికన పునరుద్ధరించాలని సూచించారు. చెరువులు, రిజర్వాయర్లు, వాగుల పరిస్థితిని నిరంతరం పర్యవేక్షించాలన్నారు. తుఫాన్ సమయంలో సమర్థంగా పనిచేసిన అధికారులను చంద్రబాబు అభినందించారు.
ఒంగోలులో తీవ్ర ప్రభావం
ఒంగోలు, బాపట్ల సమీపంలో తుఫాన్ గంటకు 120 కిలోమీటర్ల వేగంతో పయనిస్తోందని అధికారులు సీఎంకు వివరించారు. ఒంగోలులో కూలిన చెట్లను తొలగించినట్లు తెలిపారు. నెల్లూరులో వ్యవసాయ భూముల్లో నీరు నిలవకుండా చర్యలు చేపడుతున్నామని వెల్లడించారు. పల్నాడు, మార్కాపురం, గుంటూరు జిల్లాల్లో నిలిచిపోయిన విద్యుత్ సరఫరాను పునరుద్ధరించినట్లు చెప్పారు. తుఫాన్ ప్రభావం పూర్తిగా తగ్గే వరకు ప్రజలు ప్రభుత్వ సూచనలు పాటించాలని సీఎం చంద్రబాబు కోరారు.
