వరంగల్ జిల్లా నర్సంపేటలో మాజీ ఎమ్మెల్యే, ఉద్యమ నేత పెద్ది సుదర్శన్రెడ్డి సంస్మరణ సభ నిర్వహించారు. ఈ కార్యక్రమానికి బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్రావు హాజరై పెద్ది సుదర్శన్రెడ్డి చిత్రపటానికి పూలమాలలు వేసి నివాళులర్పించారు. ఈ సందర్భంగా ఆయనలతో తమకున్న అనుబంధాన్ని గుర్తుచేసుకుంటూ ఇద్దరు నేతలు భావోద్వేగానికి గురయ్యారు.
పెద్ది కోరుకున్నట్లు అధికారంలోకి వస్తాం: కేటీఆర్
సంస్మరణ సభలో కేటీఆర్ మాట్లాడుతూ.. “ఎంతకాలం బతికినం అనేది కాదు.. ఎట్లా బతికినం అనేది ముఖ్యం” అని అన్నారు. పెద్ది సుదర్శన్రెడ్డి అంతిమయాత్రకు వేలాది మంది తరలివచ్చారని గుర్తుచేశారు. సుమారు లక్ష మందికి పైగా ప్రజలు 12 గంటల పాటు వర్షం కురుస్తున్నా వెనక్కి వెళ్లకుండా అంతిమయాత్రలో పాల్గొన్నారని తెలిపారు. పెద్ది సుదర్శన్రెడ్డి ఎలాంటి వ్యక్తో చెప్పడానికి ఇదే నిదర్శనమని అన్నారు.
పెద్ది సుదర్శన్రెడ్డి కోరుకున్నట్లుగా వచ్చే రెండేళ్లలో బీఆర్ఎస్ తిరిగి అధికారంలోకి వస్తుందని కేటీఆర్ ధీమా వ్యక్తం చేశారు. పార్టీ అధికారంలోకి వచ్చిన తర్వాత నర్సంపేటలోని మెడికల్ కాలేజీకి పెద్ది సుదర్శన్రెడ్డి పేరు పెడతామని ప్రకటించారు. భవిష్యత్ తరాలు గుర్తు చేసుకునేలా ఆయనకు ఘనమైన నివాళి అర్పిస్తామని చెప్పారు.
పెద్ది జ్ఞాపకాలను గుర్తుచేసుకుని కన్నీళ్లు పెట్టుకున్న హరీశ్రావు
నల్లబెల్లిలో జరిగిన సంతాప సభలో హరీశ్రావు మాట్లాడుతూ.. తెలంగాణ ఉద్యమ సమయంలో పెద్ది సుదర్శన్రెడ్డితో తనకున్న అనుబంధాన్ని గుర్తుచేసుకున్నారు. పెద్ది అనారోగ్యంతో ఆస్పత్రిలో చేరిన సమయంలో తాను, కేటీఆర్ ఆగమేఘాల మీద ఆస్పత్రికి వెళ్లామని చెప్పారు. అయితే, అక్కడికి వెళ్లినప్పుడు తనకు ఉద్యమ కాలం నాటి ఓ సంఘటన గుర్తుకు వచ్చిందని తెలిపారు.
తెలంగాణ ఉద్యమ సమయంలో ఓ ఉద్యమకారుడు ఆత్మహత్య చేసుకున్నప్పుడు ఆయన అంతిమయాత్రను డీసీఎంపై నిర్వహించామని హరీశ్రావు గుర్తుచేశారు. ఆ సమయంలో వరంగల్లోని అమరవీరుల స్తూపం వద్ద పోలీసులకు, ఉద్యమకారులకు మధ్య ఘర్షణ జరిగిందని చెప్పారు. ఆ ఘర్షణలో తాను డీసీఎం పైనుంచి కిందపడిపోయానని తెలిపారు.
ఆ రోజు నన్ను కాపాడింది పెద్ది సుదర్శన్రెడ్డే: హరీశ్రావు
“డీసీఎం పైనుంచి కిందపడుతున్న సమయంలో నన్ను పట్టుకున్నది పెద్ది సుదర్శన్రెడ్డి. నేను నేరుగా భూమిపై పడకుండా ఆయన చేతుల్లో పడ్డాను. వెంటనే నన్ను ఆస్పత్రికి తీసుకెళ్లారు. ఆ రోజు ఏ ఆస్పత్రికైతే సుదర్శన్రెడ్డి నన్ను తీసుకెళ్లారో.. అదే ఆస్పత్రిలో ఆయనను చివరి చూపు చూస్తానని కలలో కూడా ఊహించలేదు” అంటూ హరీశ్రావు భావోద్వేగానికి గురయ్యారు.
తాను గాయపడినప్పుడు ఆగమేఘాల మీద ఆస్పత్రికి తీసుకెళ్లి తనను కాపాడిన పెద్ది సుదర్శన్రెడ్డి, చివరి దశలో అదే ఆస్పత్రిలో చికిత్స పొందడం ఎంతో బాధాకరంగా ఉందంటూ హరీశ్రావు కన్నీళ్లు పెట్టుకున్నారు. పెద్ది సుదర్శన్రెడ్డితో తనకున్న అనుబంధాన్ని గుర్తుచేసుకుంటూ ఆయన తీవ్ర భావోద్వేగానికి లోనయ్యారు.
తెలంగాణ ఉద్యమం, బీఆర్ఎస్ నిర్మాణంలో పెద్ది సుదర్శన్రెడ్డి చేసిన సేవలను నేతలు ఈ సందర్భంగా గుర్తుచేసుకున్నారు. ఆయన ఆశయాలను కొనసాగించడంతో పాటు, భవిష్యత్ తరాలు గుర్తుంచుకునేలా ఆయనకు ఘన నివాళులు అర్పిస్తామని కేటీఆర్, హరీశ్రావు తెలిపారు.
