కేరళ మాజీ ముఖ్యమంత్రి పినరయి విజయన్ నివాసాలపై ఎన్ఫోర్స్మెంట్ డైరెక్టరేట్ (ఈడీ) అధికారులు బుధవారం ఉదయం దాడులకు దిగారు. వివాదాస్పద కొచ్చిన్ మినరల్స్ అండ్ రుటైల్ లిమిటెడ్ (CMRL) మనీలాండరింగ్ కేసు దర్యాప్తులో భాగంగా ఈ సోదాలు ప్రాధాన్యత సంతరించుకున్నాయి. మాజీ సీఎం విజయన్ నివాసాలతో పాటు రాష్ట్రవ్యాప్తంగా దాదాపు 10కి పైగా కీలక ప్రాంతాల్లో ఈడీ అధికారులు ఏకకాలంలో తనిఖీలు చేపట్టారు. రూ.1.72 కోట్ల విలువైన ఈ మనీలాండరింగ్ వ్యవహారంలో కేంద్ర దర్యాప్తు సంస్థ తన విచారణను మరింత వేగవంతం చేసింది.
రూ.1.72 కోట్ల అక్రమ చెల్లింపుల ఆరోపణలు
ప్రైవేట్ మైనింగ్ కెమికల్ కంపెనీ అయిన కొచ్చిన్ మినరల్స్ అండ్ రుటైల్ లిమిటెడ్ (CMRL), 2018-2019 కాలానికి గానూ మాజీ సీఎం విజయన్ కుమార్తె టి.వీణకు చెందిన ‘ఎక్సాలాజిక్ సొల్యూషన్స్’ అనే ఐటీ సంస్థకు ఎలాంటి సేవలు అందించకపోయినప్పటికీ భారీగా నిధులు బదిలీ చేసినట్లు ఆరోపణలు ఉన్నాయి. ఐటీ సర్వీసెస్ పేరుతో ఎలాంటి సేవలు తీసుకోకుండానే సీఎంఆర్ఎల్ సంస్థ రూ.1.72 కోట్లను అక్రమంగా చెల్లించిందని దర్యాప్తు అధికారులు గుర్తించారు.
ఈ ఆర్థిక అక్రమాలపై సమగ్ర విచారణ జరిపేందుకు 2024 లోనే మనీలాండరింగ్ నిరోధక చట్టం (PMLA) కింద ఈడీ కేసు నమోదు చేసింది. అయితే, ఈ కేసులో ఈడీ జరుపుతున్న విచారణను మరియు తదుపరి చర్యలను రద్దు చేయాలంటూ సీఎంఆర్ఎల్ సంస్థ కేరళ హైకోర్టును ఆశ్రయించింది.
హైకోర్టు తీర్పు మరుసటి రోజే ఈడీ యాక్షన్
ఈ పిటిషన్పై మంగళవారం విచారణ చేపట్టిన కేరళ హైకోర్టు, ఈడీ దర్యాప్తును నిలిపివేయడానికి నిరాకరిస్తూ సీఎంఆర్ఎల్ దాఖలు చేసిన పిటిషన్ను కొట్టివేసింది. కోర్టు నుంచి గ్రీన్ సిగ్నల్ వచ్చిన మరుసటి రోజే రంగంలోకి దిగిన ఈడీ అధికారులు విస్తృత సోదాలు ప్రారంభించారు. ఈ క్రమంలో తిరువనంతపురంలోని విజయన్ అద్దె నివాసం సహా కన్నూర్లోని ఆయన సొంత ఇల్లు, కోజికోడ్లోని ఆయన అల్లుడు మరియు వీణ నివాసాలతో పాటు సీఎంఆర్ఎల్ ఉన్నతాధికారుల ఇళ్లపై ఈడీ బృందాలు దాడులు నిర్వహించి సోదాలు జరుపుతున్నాయి.
