రాయలసీమలో పసిడి పంట.. జొన్నగిరిలో గోల్డ్ మైనింగ్ ప్రాజెక్ట్‌ను ప్రారంభించిన సీఎం చంద్రబాబు

ఆంధ్రప్రదేశ్ పారిశ్రామిక మరియు ఆర్థిక రంగాల్లో సరికొత్త స్వర్ణ అధ్యాయం మొదలైంది. రాష్ట్ర ముఖ్యమంత్రి చంద్రబాబు నాయుడు బుధవారం కర్నూలు జిల్లా తుగ్గలి మండలంలోని జొన్నగిరి (స్వర్ణగిరి) లో పర్యటించి, దేశంలోనే ప్రైవేట్ రంగంలో అత్యంత ప్రతిష్టాత్మకమైన ‘జొన్నగిరి గోల్డ్ మైనింగ్ ప్రాజెక్టు’ను అధికారికంగా ప్రారంభించారు. ఈ సందర్భంగా సీఎం చంద్రబాబు ఈ ప్రాజెక్ట్ వలన రాష్ట్రానికి జరిగే మేలును గూర్చి వివరించారు. నిరుద్యోగ యువతకు ఉపాధి అవకాశాలు కలుగడంతోపాటుగా రాష్ట్ర ప్రభుత్వానికి కోట్లలో ఆదాయం సమకూరుతుందని తెలిపారు.

మాట్లాడుతూ.. ఈ ప్రాజెక్టు ప్రారంభంతో ఏపీ పారిశ్రామిక రంగంలో ఒక నూతన సువర్ణ అధ్యాయం మొదలైందని, వెనుకబడిన రాయలసీమ ప్రాంతం త్వరలోనే అసలైన రతనాలసీమగా మారబోతోందని ఆయన ధీమా వ్యక్తం చేశారు. జొన్నగిరి గోల్డ్ మైన్‌ ఇక్కడి స్థానిక ప్రజల ఆర్థిక జీవితాలను పూర్తిగా మార్చివేస్తుందని, పూర్వ కాలంలో ఈ ప్రాంతాన్ని ‘స్వర్ణగిరి’గా పిలిచేవారని గుర్తుచేశారు. మన సొంత గడ్డపైనే త్వరలో అధికారికంగా బంగారం ఉత్పత్తి కాబోతోందని, భవిష్యత్తులో దేశమంతా జొన్నగిరి వైపు తిరిగి చూసేలా ఈ ప్రాజెక్టు నిలుస్తుందని ఆశాభావం వ్యక్తం చేస్తూ, పారిశ్రామిక అభివృద్ధిపై తమ పటిష్టమైన సంకల్పాన్ని చాటారు.

ఒకప్పుడు KGF.. ఇప్పుడు JGF.. ఏటా ఒక టన్ను బంగారం ఉత్పత్తి

గతంలో కర్ణాటకలోని కేజీఎఫ్ (KGF) దేశవ్యాప్తంగా ఎలా ఖ్యాతి గాంచిందో, ఇకపై ఏపీలోని జేజీఎఫ్ (JGF – జొన్నగిరి గోల్డ్ ఫీల్డ్) అంతకంటే గొప్పగా నిలుస్తుందని ముఖ్యమంత్రి అభివర్ణించారు. దేశంలో చమురు (ఆయిల్) దిగుమతుల తర్వాత అత్యధికంగా విదేశీ మారక ద్రవ్యం ఖర్చయ్యేది బంగారం దిగుమతుల కోసమేనని ఈ సందర్భంగా గుర్తుచేశారు. రాయలసీమ ప్రాంతాన్ని అన్ని విధాలా సుసంపన్నం చేసేందుకు వీలుగా సాగునీటి ప్రాజెక్టులను కూడా శరవేగంగా పూర్తి చేస్తున్నట్లు చెప్పారు.

జొన్నగిరి గని ద్వారా ఏడాదికి ఒక టన్ను బంగారం ఉత్పత్తి చేయడమే లక్ష్యమని, ప్రస్తుతం ప్రాజెక్టు తొలి దశలో 400 కిలోల సామర్థ్యంతో ఉత్పత్తి ప్రారంభమవుతోందని వివరించారు. రాబోయే రోజుల్లో దీనిని 1000 కిలోలకు పెంచుతామని, రెండో యూనిట్ కూడా పూర్తయితే మొత్తంగా 50 టన్నుల బంగారం ఉత్పత్తి అయ్యే అవకాశం ఉందన్నారు.

త్వరలో మరో 1500 మందికి పైగా స్థానిక యువతకు ఉపాధి

ఈ మెగా ప్రాజెక్ట్ ద్వారా స్థానిక రాయలసీమ యువతకు ఉపాధి కల్పనపై ముఖ్యమంత్రి ప్రత్యేకంగా హర్షం వ్యక్తం చేశారు. ఇప్పటికే ఈ మైనింగ్ క్షేత్రంలో దాదాపు 800 మంది ఉద్యోగాలు పొంది విధుల్లో చేరగా, అతి త్వరలోనే రెండో దశ విస్తరణ ద్వారా మరో 1500 మందికి పైగా స్థానికులకు నూతనంగా ఉపాధి అవకాశాలు లభించనున్నాయని వెల్లడించారు. భవిష్యత్తులో ఈ స్వర్ణగిరి గోల్డ్ మైన్స్ ద్వారా ప్రత్యక్షంగా మరియు పరోక్షంగా ఏకంగా 5 వేల మందికి పైగా ఉపాధి లభించేలా ప్రణాళికలు సిద్ధం చేశామని సీఎం చంద్రబాబు స్పష్టం చేశారు.

భారీ పెట్టుబడులు మరియు స్థానిక యువతకు ఉపాధి

సుమారు 598 హెక్టార్ల (దాదాపు 1,500 ఎకరాలు) విస్తీర్ణంలో విస్తరించి ఉన్న ఈ ప్రతిష్టాత్మక బంగారు గనుల ప్రాజెక్టు కోసం ‘జియోమైసూర్ సర్వీసెస్’ మరియు ‘డెక్కన్ గోల్డ్ మైన్స్’ సంస్థలు సంయుక్తంగా రూ. 405 కోట్ల భారీ పెట్టుబడి పెట్టాయి. ఈ ప్రాజెక్ట్ ద్వారా ప్రత్యక్షంగా, పరోక్షంగా దాదాపు 700 మందికి పైగా ఉపాధి లభిస్తుండగా, ఇందులో సింహభాగం అంటే 80 శాతం కంటే ఎక్కువ ఉద్యోగ అవకాశాలను స్థానిక ప్రాంతాల యువతకే కేటాయించారు.

ఈ ప్రాజెక్ట్ ద్వారా కేవలం ఉపాధి కల్పించడమే కాకుండా, మైనింగ్ రంగంలో వాడే అత్యంత భారీ వాహనాలను సురక్షితంగా నడిపేందుకు వీలుగా ‘సిమ్యులేటర్ యంత్రాల’ సహాయంతో స్థానిక మహిళలకు, యువతకు ప్రత్యేక నైపుణ్య శిక్షణ ఇస్తున్నారు. ఈ శిక్షణా కేంద్రాన్ని స్వయంగా సందర్శించిన సీఎం చంద్రబాబు, అనంతరం జెండా ఊపి ఖనిజంతో కూడిన మట్టిని తరలించే భారీ వాహనాలను ప్రారంభించారు. ఒకప్పుడు కేజీఎఫ్ (KGF) ఎలాగో, ఇప్పుడు జేజీఎఫ్ (JGF – జొన్నగిరి గోల్డ్ ఫీల్డ్) అలాగని ఈ సందర్భంగా సీఎం అభివర్ణించారు.

మూడు దశల్లో ఉత్పత్తి లక్ష్యాలు.. ఏపీ ఖజానాకు కాసుల వర్షం

జొన్నగిరి మైనింగ్ క్షేత్రంలో బంగారు ఉత్పత్తిని దశలవారీగా పెంచేందుకు సమగ్ర ప్రణాళికలు సిద్ధం చేశారు. తొలి దశలో ఏడాదికి 400 కేజీల బంగారు ఉత్పత్తితో మైనింగ్ ప్రారంభం కానుండగా, రెండో దశలో దీనిని ఏడాదికి 900 కేజీలకు పెంచుతారు. ప్రాజెక్ట్ పూర్తిస్థాయిలోకి వచ్చాక ఏడాదికి ఏకంగా 2 టన్నుల బంగారం ఉత్పత్తి చేయడమే లక్ష్యంగా పెట్టుకున్నారు. ఇందుకు అదనంగా సీఎం చంద్రబాబు రెండో ప్రాసెసింగ్ యూనిట్ విస్తరణ పనులకు కూడా శంకుస్థాపన చేశారు.

ఈ గని నుండి వెలికితీసే బంగారం విలువలపై రాష్ట్ర ప్రభుత్వానికి 4 శాతం రాయల్టీ లభించనుంది. దీని ద్వారా ఏడాదికి 400 కిలోల ఉత్పత్తి జరిగితే రూ. 57 కోట్లు, అదే ఉత్పత్తి 900 కిలోలకు చేరితే ఏటా రూ. 144 కోట్ల చొప్పున ఏపీ ఖజానాకు భారీ ఆదాయం సమకూరనుంది. ఈ ప్రాజెక్టుకు అవసరమైన 0.021 టీఎంసీల నీటిని హంద్రీనీవా సుజల స్రవంతి కాలువ ద్వారా కేటాయించి, 18 కిలోమీటర్ల మేర పైపులైన్ కూడా నిర్మించారు.

స్వాతంత్య్రం వచ్చిన తర్వాత దేశంలోనే మొట్టమొదటి భారీ ప్రైవేట్ ప్రాథమిక బంగారు గనిగా వాణిజ్య కార్యకలాపాలు ప్రారంభించిన ఈ ప్రాజెక్టు, వెనుకబడిన రాయలసీమ ప్రాంతీయ అభివృద్ధిని పరుగులు పెట్టించడంలో గేమ్ ఛేంజర్‌గా మారబోతోంది. ఈ చారిత్రాత్మక మైనింగ్ ప్రారంభోత్సవ వేదికగా రాష్ట్ర పారిశ్రామిక పురోగతి మరియు ఉపాధి కల్పనపై ప్రభుత్వం తమ పటిష్టమైన సంకల్పాన్ని చాటింది.

ఈ కార్యక్రమంలో రాష్ట్ర గనులు మరియు భూగర్భ శాఖ మంత్రి కొల్లు రవీంద్ర, జలవనరుల శాఖ మంత్రి నిమ్మల రామానాయుడు, పారిశ్రామిక శాఖ మంత్రి టీజీ భరత్ తదితర ఉన్నతాధికారులు పాల్గొన్నారు.