బీజేపీ, బీఆర్ఎస్‌ పార్టీలు వేరు కావొచ్చు, కానీ వాటి లక్ష్యం ఒక్కటే – సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి ప్రతిపక్షాలైన భారతీయ జనతా పార్టీ (భాజపా), భారత్ రాష్ట్ర సమితి (బీఆర్ఎస్)లపై తీవ్రస్థాయిలో ధ్వజమెత్తారు. తన ప్రభుత్వం చేస్తున్న అభివృద్ధిని, ఆ పార్టీల తప్పులను నిలదీస్తున్నందుకే తనపై రాజకీయ కుట్రలకు పాల్పడుతున్నారని ఆయన ఆరోపించారు. ఆ రెండు పార్టీలు వేర్వేరుగా కనిపించినప్పటికీ, వారి ప్రధాన లక్ష్యం మాత్రం ఒక్కటేనని విమర్శించారు.

ఈ మేరకు తాజాగా కొడంగల్ నియోజకవర్గంలో ఓటరు జాబితా సమగ్ర సవరణ (ఎస్‌ఐఆర్‌ – SIR) ప్రక్రియపై బూత్ లెవల్ ఏజెంట్లతో (బీఎల్‌ఏలు) నిర్వహించిన ప్రత్యేక సమావేశంలో సీఎం రేవంత్ రెడ్డి మాట్లాడారు. రాష్ట్రంలోని పేదలకు మంచి చేసేందుకు రోజుకు 18 గంటలు శ్రమిస్తున్నామని, క్షేత్రస్థాయిలో నేరుగా ఎదుర్కొనే ధైర్యం లేక కొడంగల్‌లో కాంగ్రెస్‌కు మద్దతుగా నిలిచే ఎస్సీ, ఎస్టీ, మైనార్టీ ఓటర్ల పేర్లను జాబితా నుంచి తొలగించేందుకు కుట్రలు చేస్తున్నారని ఆయన మండిపడ్డారు.

ఈ సమావేశంలో ముఖ్యమంత్రి రేవంత్ రెడ్డి మాట్లాడిన ముఖ్యాంశాలు క్రింది విధంగా ఉన్నాయి..

• 100% ఎస్‌ఐఆర్ పూర్తి లక్ష్యం: ఈ నెలాఖరు నాటికి కొడంగల్ నియోజకవర్గంలో 100 శాతం సమగ్ర ఓటరు జాబితా సవరణ ప్రక్రియను పూర్తి చేయాలని, అర్హులైన ఏ ఒక్క ఓటరు పేరు కూడా తొలిగిపోకుండా కఠినంగా వ్యవహరించాలని ఆదేశించారు.

• బీఎల్‌ఏలకు దిశా నిర్దేశం: కొడంగల్‌లో ఇప్పటివరకు 78 శాతం ఓటర్ల నమోదు పూర్తయిందని, మిగిలిన 22 శాతం అర్హులైన ప్రతి ఒక్కరినీ ఓటర్లుగా నమోదు చేయించే బాధ్యత బీఎల్‌ఏలపై ఉందన్నారు.

• ఇంటింటికీ తిరగాలి: ప్రభుత్వ అధికారులైన బీఎల్‌ఓల నివేదికలపైనే కాకుండా, పార్టీ కార్యకర్తలైన బీఎల్‌ఏలు స్వయంగా ఇంటింటికీ తిరిగి ఓటర్ల వివరాలను సరిచూసుకోవాలని పిలుపునిచ్చారు.

• కుట్రలను తిప్పికొట్టాలి: తనను రాజకీయంగా దెబ్బతీయాలని చూసే కుట్రదారులకు కొడంగల్ ప్రజలు, పార్టీ శ్రేణులు తమ నిబద్ధతతో తగిన బుద్ధి చెప్పాలని కోరారు.

• సంక్షేమానికి ఓటే ప్రామాణికం: ఓటరు జాబితాలో పేరు లేకపోతే ప్రభుత్వ సంక్షేమాభివృద్ధి పథకాలు వర్తించవని, సరైన ఆధారాలు చూపి అనుమానాస్పద వివరాలను సరిదిద్దుకోవాలని సూచించారు.

ఓటరు జాబితా సవరణ ప్రక్రియ అనేది కేవలం ఎన్నికల ప్రక్రియ మాత్రమే కాకుండా, పేదల సంక్షేమ హక్కులను కాపాడే బృహత్తర కార్యక్రమని ముఖ్యమంత్రి స్పష్టం చేశారు. వచ్చే ఎన్నికల్లో ప్రజాస్వామ్య బలాన్ని నిరూపించుకోవడానికి ఓటు హక్కు ప్రాథమిక ఆయుధమని, అర్హులైన ప్రతి పౌరుడికి ఓటు హక్కు కల్పించేంత వరకు బీఎల్‌ఏలు అప్రమత్తంగా పనిచేయాలని ఆయన ఉద్ఘాటించారు.