ప్రముఖ సినీ నిర్మాత, నటుడు బండ్ల గణేష్ కుమార్తె జనని వివాహం సూర్యతేజతో అత్యంత వైభవంగా జరిగింది. హైదరాబాద్లోని జేఆర్సీ కన్వెన్షన్ సెంటర్లో ఆదివారం రాత్రి నిర్వహించిన ఈ వివాహ వేడుకకు రాజకీయ, సినీ రంగానికి చెందిన ప్రముఖులు పెద్ద సంఖ్యలో హాజరై నూతన వధూవరులను ఆశీర్వదించారు.
ముఖ్యంగా రెండు తెలుగు రాష్ట్రాల ముఖ్యమంత్రులు సీఎం రేవంత్ రెడ్డి, ఏపీ సీఎం చంద్రబాబు సతీసమేతంగా ఈ వేడుకకు విచ్చేసి ప్రత్యేక ఆకర్షణగా నిలిచారు. వీరితో పాటు తెలంగాణ గవర్నర్ జిష్ణు దేవ్ వర్మ, పలువురు కేంద్ర, రాష్ట్ర మంత్రులు కూడా హాజరై కొత్త జంటకు తమ శుభాకాంక్షలు అందజేశారు.
ఈ వివాహ మహోత్సవంలో టాలీవుడ్ ప్రముఖులు పెద్ద ఎత్తున పాలుపంచుకున్నారు. మెగాస్టార్ చిరంజీవి దంపతులు, విక్టరీ వెంకటేష్, కింగ్ నాగార్జున, అక్కినేని నాగచైతన్య – శోభిత ధూళిపాళ దంపతులు వధూవరులను ఆశీర్వదించారు. వీరితో పాటు నటులు గోపీచంద్, తేజ సజ్జ, కిరణ్ అబ్బవరం, శ్రీకాంత్, సీనియర్ నటి జయప్రద తదితరులు పాల్గొన్నారు.
దర్శకులు కే రాఘవేంద్రరావు, బోయపాటి శ్రీను, కొరటాల శివ, త్రివిక్రమ్ శ్రీనివాస్, శ్రీను వైట్ల, అనిల్ రావిపూడి, మెహర్ రమేష్, నిర్మాతలు అల్లు అరవింద్, నాగవంశీ, అనిల్ సుంకర, శిరీష్, సాహు గారపాటి తదితరులు విచ్చేసి బండ్ల గణేష్ కుటుంబానికి శుభాకాంక్షలు తెలిపారు.
సినిమా మరియు రాజకీయ ప్రముఖుల సమ్మేళనంతో జరిగిన ఈ వివాహ వేడుక అత్యంత కోలాహలంగా సాగింది. బండ్ల గణేష్ తన కుమార్తె పెళ్లిని ఎంతో ఘనంగా నిర్వహించడంతో పాటు విచ్చేసిన ప్రతి ఒక్క అతిథికి ఘన స్వాగతం పలికారు. ఇరు రంగాలకు చెందిన దిగ్గజాలు ఒకే చోట కలవడంతో ఈ వేడుక ప్రత్యేకతను సంతరించుకుంది.
