ఆంధ్రప్రదేశ్ ఉప ముఖ్యమంత్రి పవన్ కళ్యాణ్ సారథ్యంలోని రాష్ట్ర పర్యావరణ మరియు అటవీశాఖ పరిధిలో కీలక పరిణామం చోటుచేసుకుంది. ఆయన సోదరుడు, జనసేన పార్టీ ఎమ్మెల్సీ కొణిదెల నాగబాబుకు అత్యంత ముఖ్యమైన బాధ్యతలు అప్పగించారు. ఆంధ్రప్రదేశ్ సొసైటీ ఫర్ గ్రీనింగ్ అండ్ రీఫారెస్టేషన్ ఫర్ ఎకలాజికల్ ఎన్రిచ్మెంట్ (ఏపీ గ్రీన్) ఎగ్జిక్యూటివ్ కమిటీ చైర్పర్సన్గా శాసనమండలి సభ్యుడు కొణిదెల నాగేంద్రరావు (నాగబాబు)ను ప్రభుత్వం నియమించింది. ఈ మేరకు పర్యావరణ, అటవీ శాఖ G.O.Rt.No.93, తేదీ 17-08-2026న ఉత్తర్వులు జారీ చేసింది.
నాగబాబుకు క్యాబినెట్ హోదా
ఏపీ గ్రీన్ ఎగ్జిక్యూటివ్ కమిటీ చైర్పర్సన్గా నియమితులైన నాగబాబుకు ప్రభుత్వం ప్రత్యేకంగా క్యాబినెట్ హోదా కల్పించింది. రాష్ట్రవ్యాప్తంగా పచ్చదనం పెంపు, పునర్వనీకరణ, పర్యావరణ పరిరక్షణకు సంబంధించిన కార్యక్రమాలను సమన్వయం చేయడం ఆయన ప్రధాన బాధ్యతల్లో ఒకటిగా ఉండనుంది.
వివిధ ప్రభుత్వ శాఖలు, జిల్లాస్థాయి సంస్థల మధ్య సమన్వయం సాధించడం, ఏపీ గ్రీన్ కార్యక్రమాల అమలును వేగవంతం చేయడం, వాటి పురోగతిని పర్యవేక్షించడం వంటి కీలక బాధ్యతలను ఎగ్జిక్యూటివ్ కమిటీ చైర్పర్సన్గా నాగబాబు నిర్వహించనున్నారు.
2047 నాటికి 50 శాతం గ్రీన్ కవర్
రాష్ట్ర భౌగోళిక విస్తీర్ణంలో అటవీ పరిరక్షణతో పాటు పచ్చదనాన్ని పెంచి 2047 నాటికి 50 శాతం గ్రీన్ కవర్ సాధించాలన్నది ఏపీ గ్రీన్ ప్రధాన లక్ష్యంగా ప్రభుత్వం నిర్దేశించింది.
ఈ లక్ష్యాన్ని సాధించేందుకు రాష్ట్రవ్యాప్తంగా పచ్చదనం పెంపు, భారీ స్థాయిలో పునర్వనీకరణ, చెట్ల పెంపకం, పర్యావరణ పరిరక్షణ కార్యక్రమాలను చేపట్టనున్నారు.
జిల్లాస్థాయిలోనూ ప్రత్యేక వ్యవస్థ
ఏపీ గ్రీన్ కార్యక్రమాలను సమర్థవంతంగా అమలు చేసేందుకు గవర్నింగ్ బోర్డు, ఎగ్జిక్యూటివ్ కమిటీతో పాటు జిల్లాస్థాయిలో పాలక మండళ్లను ఏర్పాటు చేయనున్నట్లు ప్రభుత్వం తెలిపింది.
రాష్ట్రస్థాయిలో రూపొందించే ప్రణాళికలను జిల్లాస్థాయిలో సమర్థవంతంగా అమలు చేయడం, వివిధ శాఖలను అనుసంధానం చేయడం, కార్యక్రమాల పురోగతిని ఎప్పటికప్పుడు సమీక్షించడం ఈ వ్యవస్థ ద్వారా చేపట్టనున్నారు.
‘పచ్చని ఆంధ్రప్రదేశ్’ లక్ష్యంగా..
రాష్ట్ర భవిష్యత్ అవసరాలను దృష్టిలో ఉంచుకుని పర్యావరణ సమతుల్యతను కాపాడటం, అడవులు, చెట్ల విస్తీర్ణాన్ని పెంచడం, పునర్వనీకరణ కార్యక్రమాలను విస్తృతం చేయడంపై ప్రభుత్వం దృష్టి సారించింది. నాగబాబు నాయకత్వంలో ఏపీ గ్రీన్ కార్యక్రమాలు మరింత వేగంగా, సమర్థవంతంగా ముందుకు సాగుతాయని కూటమి వర్గాలు ఆశాభావం వ్యక్తం చేస్తున్నాయి.
ఆంధ్రప్రదేశ్లో పచ్చదనం పెంపు, అటవీ విస్తరణ, పర్యావరణ పరిరక్షణకు మరింత ప్రాధాన్యతనిస్తూ రాష్ట్ర ప్రభుత్వం కీలక నిర్ణయం తీసుకుందని ఈ సందర్భంగా ప్రభుత్వ వర్గాలు పేర్కొన్నాయి.
