రేపు సుప్రీంకోర్టులో జరిగే రాజ్యాంగ దినోత్సవ వేడుకల్లో పాల్గొననున్న ప్రధాని మోదీ

November 25, 2022

ప్రధానమంత్రి నరేంద్ర మోదీ రేపు (నవంబర్ 26, శనివారం) ఉదయం 10 గంటలకు సుప్రీంకోర్టులో జరిగే రాజ్యాంగ దినోత్సవ వేడుకల్లో పాల్గొననున్నారు. ఈ మేరకు ప్రధానమంత్రి కార్యాలయం ఒక ప్రకటన విడుదల చేసింది. 1949లో రాజ్యాంగ సభ భారత రాజ్యాంగాన్ని ఆమోదించిన జ్ఞాపకార్థం, 2015 నుండి నవంబర్ 26న రాజ్యాంగ దినోత్సవంగా జరుపుకుంటున్నట్టు తెలిపారు. ఈ కార్య‌క్ర‌మంలో భాగంగా ప్ర‌ధాని మోదీ ఈ-కోర్ట్ ప్రాజెక్ట్ కింద వివిధ కొత్త కార్య‌క్ర‌మాల‌ను ప్రారంభించనున్నారు. ఈ ఈ-ప్రాజెక్ట్ అనేది న్యాయస్థానాల ఐసీటీ ఎనేబుల్మెంట్ ద్వారా న్యాయవాదులు మరియు న్యాయవ్యవస్థకు సేవలను అందించే ప్రయత్నమని తెలిపారు. ప్రధాని మోదీ ప్రారంభించబోయే కార్యక్రమాలలో వర్చువల్ జస్టిస్ క్లాక్, జస్టిస్ మొబైల్ యాప్ 2.0, డిజిటల్ కోర్ట్ మరియు S3WaaS వెబ్‌సైట్‌లు ఉన్నాయి.

వర్చువల్ జస్టిస్ క్లాక్ అనేది కోర్టు స్థాయిలో రోజు/వారం/నెల ప్రాతిపదికన నమోదైన కేసులు, పరిష్కరించబడిన కేసులు మరియు పెండింగ్‌లో ఉన్న కేసుల వివరాలను అందించే న్యాయ బట్వాడా వ్యవస్థ యొక్క ముఖ్యమైన గణాంకాలను ప్రదర్శించడానికి ఒక చొరవని పేర్కొన్నారు. న్యాయస్థానం ద్వారా కేసుల పరిష్కార స్థితిని ప్రజలతో పంచుకోవడం ద్వారా న్యాయస్థానాల పనితీరును జవాబుదారీగా మరియు పారదర్శకంగా చేయడమే ఈ ప్రయత్నమని అన్నారు. జిల్లా కోర్టు వెబ్‌సైట్‌లో ఏదైనా కోర్టు ఏర్పాటు యొక్క వర్చువల్ జస్టిస్ క్లాక్‌ను ప్రజలు యాక్సెస్ చేయవచ్చన్నారు. జస్టిస్ (JustIS) మొబైల్ యాప్ 2.0 అనేది న్యాయ అధికారులకు మాత్రమే కాకుండా వారి కింద పనిచేసే ఇండివిడ్యువల్ న్యాయమూర్తుల కోసం కూడా పెండింగ్‌ను మరియు డిస్పోజల్ ను పర్యవేక్షించడం ద్వారా సమర్థవంతమైన కోర్టు మరియు కేసు నిర్వహణ కోసం అందుబాటులో ఉన్న సాధనం అవుతుందన్నారు. ఈ యాప్ హైకోర్టు మరియు సుప్రీంకోర్టు న్యాయమూర్తులకు కూడా అందుబాటులో ఉంచబడిందని, వారు ఇప్పుడు వారి అధికార పరిధిలోని అన్ని రాష్ట్రాలు మరియు జిల్లాల పెండింగ్‌లు మరియు డిస్పోజల్ వ్యవహారాలను పర్యవేక్షించవచ్చని చెప్పారు.

అలాగే డిజిటల్ కోర్టు అనేది పేపర్‌లెస్ కోర్టులుగా మారడానికి వీలుగా కోర్టు రికార్డులను డిజిటలైజ్డ్ రూపంలో న్యాయమూర్తికి అందుబాటులో ఉంచడానికి ఒక చొరవని పేర్కొన్నారు. ఇక S3WaaS వెబ్‌సైట్‌లు అనేది జిల్లా న్యాయవ్యవస్థకు సంబంధించిన నిర్దిష్ట సమాచారం మరియు సేవలను ప్రచురించడం కోసం వెబ్‌సైట్‌లను రూపొందించడానికి, కాన్ఫిగర్ చేయడానికి, అమలు చేయడానికి మరియు నిర్వహించడానికి ఒక ఫ్రేమ్‌వర్క్ అని తెలిపారు.