ఢిల్లీ హైకోర్టు కీలక ఆదేశాలు.. అనుమతి లేకుండా అమితాబ్ బచ్చన్ పేరు, ఫోటో, వాయిస్ ఉపయోగించరాదు

November 25, 2022

బాలీవుడ్ లెజెండ్ యాక్టర్ అమితాబ్ బచ్చన్ అనుమతి లేకుండా అతని పేరు కానీ, ఫోటో కానీ లేదా వాయిస్‌ని కానీ ఉపయోగించరాదని ఢిల్లీ హైకోర్టు తీర్పునిచ్చింది. ‘బిగ్ బి’గా ప్రసిద్ధి చెందిన 80 ఏళ్ల అమితాబ్ బచ్చన్.. తన సమ్మతం లేకుండా తన ఇమేజ్ దెబ్బతీసేవిధంగా ఎలాంటి ప్రకటనలు చేయకుండా చూడాలని కోరుతూ పిటిషన్‌ వేశారు. దీనిపై విచారించిన కోర్టు శుక్రవారం ఈ మేరకు కీలక ఆదేశాలు జారీ చేసింది. ఇలా ఇప్పటికే వినియోగిస్తున్న కంటెంట్‌ను తొలగించాలని ఎలక్ట్రానిక్స్ మరియు ఇన్ఫర్మేషన్ టెక్నాలజీ మంత్రిత్వ శాఖ మరియు టెలికాం సర్వీస్ ప్రొవైడర్లను కోర్టు ఆదేశించింది. అయాచితంగా తన సెలబ్రిటీ హోదాను ఉపయోగించకుండా కట్టడి చేయాలనీ ఆయన తరపు సీనియర్‌ న్యాయవాది హరీశ్‌ సాల్వే కోర్టుని అభ్యర్ధించారు. ఎవరో ఎక్కడో తయారు చేసిన ప్రోడక్ట్ పైన అమితాబ్ చిత్రాన్ని ముద్రించి అమ్మడం వంటివి ఇందుకు ఉదాహరణలుగా ఆయన ప్రస్తావించారు. ఆయన వాదనతో ఏకీభవించిన ఢిల్లీ హైకోర్టు ఇకపై ఎవరూ అమితాబ్ బచ్చన్ అనుమతి లేకుండా ప్రచారాలు నిర్వహించరాదని ఆదేశాలు జారీ చేసింది.