నేడు (జూన్ 2, 2026) తెలంగాణ రాష్ట్ర అవతరణ దినోత్సవం సందర్భంగా రాష్ట్ర వ్యాప్తంగా సంబరాలు అంబరాన్నంటుతున్నాయి. పార్టీలకు అతితంగా నేతలందరూ తెలంగాణ ప్రజానీకానికి అభినందనలు తెలుపుతున్నారు. ఈ నేపథ్యాన్ని పురస్కరించుకుని తెలంగాణ మాజీ ముఖ్యమంత్రి, బీఆర్ఎస్ అధినేత కె.చంద్రశేఖర్ రావు (కేసీఆర్) రాష్ట్ర ప్రజలకు హృదయపూర్వక శుభాకాంక్షలు తెలియజేశారు. సుదీర్ఘ పోరాటాలు, అనేక మంది అమరవీరుల త్యాగాల ఫలంగా సిద్ధించిన తెలంగాణ గడ్డ.. ప్రగతి పథంలో ముందుకు సాగాలని ఆయన ఆకాంక్షించారు.
ఉద్యమ స్ఫూర్తి – అమరవీరుల త్యాగాలు
తెలంగాణ రాష్ట్ర ఏర్పాటు వెనుక దశాబ్దాల కాలం నాటి ప్రజల ఆకాంక్ష, ఉద్యమకారుల త్యాగాలు దాగి ఉన్నాయని కేసీఆర్ ఈ సందర్భంగా గుర్తుచేసుకున్నారు. ప్రత్యేక రాష్ట్ర సాధన కోసం ప్రాణాలర్పించిన అమరవీరుల బలిదానాలను స్మరించుకుంటూ వారికి ఘనంగా నివాళులర్పించారు. తెలంగాణ అస్తిత్వాన్ని, ఆత్మగౌరవాన్ని కాపాడుకోవడానికి ప్రతి ఒక్కరూ ఉద్యమ స్ఫూర్తితో ముందుకు సాగాలని ఆయన పిలుపునిచ్చారు.
ప్రగతి పథంలో తెలంగాణ
గత పదేళ్ల కాలంలో తెలంగాణ సాధించిన అభివృద్ధిని, సంక్షేమ పథకాల విజయాలను కేసీఆర్ గుర్తుచేశారు. సాగునీరు, తాగునీరు, విద్యుత్, వ్యవసాయ రంగాల్లో రాష్ట్రం సాధించిన మైలురాళ్లు దేశానికే ఆదర్శంగా నిలిచాయని పేర్కొన్నారు. భవిష్యత్తులో కూడా తెలంగాణ అన్ని రంగాల్లో అగ్రగామిగా నిలవాలని, ప్రజల జీవితాల్లో వెలుగులు నిండాలని ఆయన ఆకాంక్షించారు.
