యూట్యూబ్ ప్రీమియమే లక్ష్యంగా.. అన్-స్కిప్పబుల్ యాడ్స్ నిడివి పెంచనున్న గూగుల్

యూట్యూబ్ తన వినియోగదారులకు, ముఖ్యంగా స్మార్ట్ టీవీల్లో వీడియోలు వీక్షించే వారికి మరింత కొత్త అనుభవాన్ని అందించేందుకు మార్పులను తీసుకువస్తోంది. టీవీ యాప్‌లో ప్రసారమయ్యే అన్‌స్కిప్పబుల్ యాడ్స్ నిడివిని 90 సెకన్ల వరకు విస్తరించే విధానాన్ని కంపెనీ పరిశీలిస్తోంది. ఏప్రిల్ 8, 2026 నాటి తాజా సమాచారం ప్రకారం, ఈ ఫీచర్‌ను ప్రస్తుతం టెస్ట్ చేస్తున్నట్లు తెలుస్తోంది.

అయితే ఇది 20 నిమిషాల నుండి 40 నిమిషాలు నిడివి ఉండే వీడియోలకు మాత్రమే దీనిని వర్తింప చేయనున్నట్టు సమాచారం. ఈ మార్పుల ద్వారా కంటెంట్ క్రియేటర్లకు మెరుగైన అవకాశాలు కల్పించడం, ప్లాట్‌ఫామ్‌ను మరింత స్థిరంగా అభివృద్ధి చేయడం లక్ష్యంగా యూట్యూబ్ ముందుకు సాగుతోంది. వినియోగదారులకు కూడా కొత్త అనుభవాన్ని అందించేందుకు సంస్థ వివిధ మార్పులను పరిశీలిస్తున్నట్లు సమాచారం.

వినియోగదారుకు పరీక్షే

గతంలో యూట్యూబ్ టీవీ యాప్‌లో 15 నుండి 30 సెకన్ల వరకు అన్-స్కిప్పబుల్ యాడ్స్ ఉండేవి. కానీ, తాజా అప్‌డేట్‌తో వినియోగదారులు దాదాపు ఒకటిన్నర నిమిషం పాటు ప్రకటనలు చూడాల్సిందే. ఇది కేబుల్ టీవీ అనుభవాన్ని తలపిస్తోందని నెటిజన్లు పెదవి విరుస్తున్నారు. అయితే ఈ మార్పు ప్రస్తుతం స్మార్ట్ టీవీలు మరియు కనెక్టెడ్ టీవీ (CTV) పరికరాలకు మాత్రమే పరిమితం చేయబడింది. మొబైల్ మరియు డెస్క్‌టాప్ వినియోగదారులకు పాత పద్ధతే కొనసాగుతోంది.

ఇందుకోసం ఈ మార్పు?

యూట్యూబ్ ఈ నిర్ణయం తీసుకోవడం వెనుక ప్రధానంగా రెండు కారణాలు ఉన్నట్లు విశ్లేషకులు భావిస్తున్నారు:

• సాంప్రదాయ టీవీ ప్రకటనల మోడల్: టీవీ చూసే వారు సోఫాలో రిలాక్స్‌గా కూర్చుని ఉంటారు కాబట్టి, వారు సుదీర్ఘ ప్రకటనలను చూసే అవకాశం ఎక్కువగా ఉంటుందని యూట్యూబ్ భావిస్తోంది. ఇది పెద్ద బ్రాండ్లు తమ ఉత్పత్తులను వివరించడానికి మంచి అవకాశం కల్పిస్తుంది.

• ప్రీమియం సబ్‌స్క్రిప్షన్ల పెంపు: ప్రకటనల నిడివి పెంచడం ద్వారా వినియోగదారులను ‘యూట్యూబ్ ప్రీమియం’ (YouTube Premium) వైపు మళ్లించడం గూగుల్ వ్యూహంగా కనిపిస్తోంది. ప్రకటనలు లేకుండా చూడాలనుకునే వారు తప్పనిసరిగా సబ్‌స్క్రిప్షన్ తీసుకోవాల్సిందే.

కేబుల్ టీవీ అనుభవం

ఈ నిర్ణయంపై సోషల్ మీడియాలో కొంత వ్యతిరేకత వస్తోంది. ముఖ్యంగా 20 నిమిషాల నిడివి ఉండే చిన్న వీడియోలకు కూడా 90 సెకన్ల యాడ్స్ రావడంపై నెటిజన్లు మండిపడుతున్నారు. “కేబుల్ టీవీలో ప్రకటనలు ఎక్కువగా ఉన్నాయనే యూట్యూబ్‌కు వచ్చాము, ఇప్పుడు ఇక్కడ కూడా అదే పరిస్థితి ఉంటే ఎలా?” అని వినియోగదారులు ప్రశ్నిస్తున్నారు.

యూట్యూబ్ ప్రీమియం లైట్ (Premium Lite)

మరోవైపు, ప్రకటనల భారాన్ని తగ్గించేందుకు గూగుల్ ‘యూట్యూబ్ ప్రీమియం లైట్’ అనే కొత్త ప్లాన్‌ను కూడా కొన్ని దేశాల్లో ప్రయోగాత్మకంగా అందుబాటులోకి తెచ్చింది. ఇది తక్కువ ధరలో ప్రకటనలను తగ్గిస్తుంది కానీ, బ్యాక్‌గ్రౌండ్ ప్లే వంటి ఇతర ప్రీమియం ఫీచర్లను అందించదు.